បាក់ច្រាំង អ្នក​ធ្វើ​ដំណើរ​ទៅ​ស្រុក​កងមាស កាត់​តាម​រកាកោង​​ សូម​ផ្អាក​​បណ្តោះអាសន្ន

បងប្អូនដែលមានរថយន្តធ្វើដំណើទៅស្រុក​កងមាសខេត្តកំពង់ចាម កាត់​តាម​រកាកោង​​ សូម​ពង្វាង​ផ្លូវ​មួយ​រយៈព្រោះផ្លូវបាក់បើកឡានលែងកើតហើយ។

ដោយសារចរន្តលំហូរទឹក បានបណ្តាលឲ្យមានការខូចខាតយ៉ាងធ្ងន់ធ្ងរនូវ​ផ្លូវបេតុង និងផ្លូវកៅស៊ូមួយចំនួនដែលស្ថិតនៅភូមិព្រែកផ្តៅ និងភូមិពាម ឃុំរកាកោង១ ស្រុកមុខកំពូល ខេត្តកណ្តាល ដែល​ភ្ជាប់ទៅ​ភូមិ​ឃុំ​មួយ​ចំនួន ក្នុង​ស្រុក​កងមាស​ ខេត្ត​កំពង់ចាម។

ចំពោះការខូចខាតនេះ រដ្ឋបាលខេត្តកណ្តាល​និងមន្ទីរជំនាញពាក់ព័ន្ធ កំពុងពិនិត្យពិភាក្សារកវិធីដោះស្រាយភ្លាមៗ ដើម្បីជៀសវាងកុំឲ្យមានការខូចខាតកាន់តែធ្ងន់ធ្ងរប្រព័ន្ធហេដ្ឋារចនាសម្ព័ន្ធដ៏សំខាន់នេះ។

តាមលោកមេឃុំរកាកោងទី ១ បានរៀបរាប់ថា កន្លែងដែលច្រាំងបាក់នោះ មិនមែនកន្លែងចាស់ទេគឺនៅផ្នែកខាងមុខ ទៀត​ ខណៈ​ដែល​កន្លែងច្រាំងបាក់ចាស់បានដាក់ដីខ្សាច់ និង​ដាក់បង្គោលដើម្បីជាការចំណាំឲ្យប្រជាពលរដ្ឋបានដឹងពីហានិភ័យហើយ។

លោកមេឃុំ​បានបន្ត​ថា ច្រាំងកំពុងតែបន្តបាក់ទៀត ហើយ​អាជ្ញាធរ​បាន​អំពាវនាវ​ឲ្យ​អ្នក​ប្រើប្រាស់​រថយន្ត ឬ ម៉ូតូបានផ្អាកការធ្វើចរាចរ ជាបណ្តោះអាសន្នហើយទម្រាំជួសជុលផ្លូវរួច៕

អត្ថបទ៖ រុងរឿង