តំណាងរាស្រ្តហ្ស៊កដានី ផ្ទុះជម្លោះ វាយគ្នាផ្អើលសភា ពេលកំពុងប្រជុំ

ការវាយតប់គ្នា បានផ្ទុះឡើងនៅក្នុងសភាហ្ស៊កដានី អំឡុងពេលការជជែកដេញដោល អំពីកំណែទម្រង់រដ្ឋធម្មនុញ្ញ ដែលក៏ត្រូវបានផ្សាយផ្ទាល់តាមកញ្ចក់ទូរទស្សន៍ Al-Mamlaka ផងដែរ។

តំណាងរាស្រ្តជាច្រើនរូប បានពិភាក្សាគ្នាលើសេចក្តីព្រាងវិសោធនកម្ម ស្តីពីសិទ្ធិស្មើភាពរវាងស្រ្តីនិងបុរស នៅក្នុងរដ្ឋធម្មនុញ្ញកាលពីថ្ងៃទី២៨ខែធ្នូ។

ប៉ុន្តែសមាជិកសភាមានកំហឹងបានស្រែកថា វាគ្មានប្រយោជន៍ទេ អំឡុងពេលនៃការជជែកដេញដោលដ៏ក្តៅគគុកក្នុងសភាតំណាងរាស្រ្តនៅរដ្ឋធានី Amman របស់ប្រទេសហ្ស៊កដានី។

ឃ្លីបខ្លី ដែលត្រូវបានគេមើលជាង ៦០,០០០ដងនៅលើ Twitter មួយនេះ បានបង្ហាញពីសមាជិកសភា ដាល់និងវាយគ្នាទៅវិញទៅមក ថែមទាំងជេរប្រទេចគ្នាទៀតផង។

ជម្លោះរវាងលោក Suleiman Abu Yahya និង Abdul Karim Dughmi បានធ្វើឲ្យសភាជ្រួលច្របល់។ លោក Abu Yahya បានចោទប្រកាន់លោក Dughmi ថា មិនចេះអ្វីសោះ ហើយអះអាងថា គាត់មិនដឹងអ្វីទេ។

ជាការឆ្លើយតប លោក Dughmi បាននិយាយទាំងកំហឹងថា “បិទមាត់ ហើយចាកចេញពីសភាទៅ”។

ទោះបីជាយ៉ាងណាក៏ដោយ គ្មាននរណាម្នាក់រងរបួសក្នុងអំឡុងពេលជម្លោះនេះទេ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ តំណាងរាស្រ្ត បូលីវី ឈ្លោះគ្នាវាយបោចសក់ ផ្អើលពេញសភា (មានវីដេអូ)