រត់ជាន់គ្នាស្លាប់មនុស្សច្រើននាក់ ពេលអ្នកគាំទ្រប្រជ្រៀតគ្នាចូលមើលការប្រកួត​​ AFCON

មនុស្សចំនួន៦នាក់ត្រូវបានគេរាយការណ៍ថា ស្លាប់និងរាប់សិបនាក់រងរបួសក្នុងការរត់ជាន់គ្នា នៅខាងក្រៅកីឡដ្ឋានដែលរៀបចំការប្រកួតពានរង្វាន់ Africa Cup of Nations (AFCON) ក្នុងប្រទេសកាមេរូន។

​វីដេអូខ្លីប បាន​បង្ហាញ​ពី​អ្នក​គាំទ្រ​កីឡា​បាល់​ទាត់ ប្រជ្រៀតគ្នា​ចូល​ទៅក្នុង​កីឡដ្ឋាន Paul Biya នៅ​សង្កាត់​មួយ​នៃ​រដ្ឋធានី Yaounde។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Naseri Paul Biya អភិបាលនៃតំបន់កណ្តាលរបស់ប្រទេស កាមេរូន បាននិយាយថា ប្រហែលជាមានអ្នកស្លាប់ និងរបួសច្រើនជាងនេះ ខណៈអ្នករបួសមួយចំនួន គ្មានសង្ឃឹមរស់។

ស្របពេលជាមួយគ្នានោះដែរ របាយការណ៍មួយទៀតបានឲ្យដឹងថា កុមារមួយចំនួនត្រូវសន្លប់។

កីឡដ្ឋាននេះមានសមត្ថភាពផ្ទុកមនុស្សបាន ៦ម៉ឺននាក់ ប៉ុន្តែដោយសារតែការរឹតបន្តឹងការពារកូវីដ កីឡដ្ឋាននេះត្រូវបានគេកំណត់មិនឲ្យដាក់មនុស្សលើស៨០%ទេ។

មន្ត្រី​ការប្រកួតបានអះអាងថា ​មានមនុស្ស​ប្រហែល ៥ម៉ឺននាក់ ​ព្យាយាម​ចូលទៅក្នុងកីឡដ្ឋាន។

សហព័ន្ធកីឡាបាល់ទាត់ទ្វីបអាហ្រ្វិក ហៅកាត់ CAF បាននិយាយនៅក្នុងសេចក្តីថ្លែងការណ៍មួយថា ខ្លួនកំពុងស៊ើបអង្កេតរឿងនេះ ហើយព្យាយាមដើម្បីទទួលបានព័ត៌មានលម្អិតបន្ថែមទៀតអំពីអ្វីដែលបានកើតឡើង។

គួរបញ្ជាក់ថា ការប្រកួតវគ្គ១៦ក្រុមចុងក្រោយរវាង កាមេរូន និង កូម័រ នៅតែធ្វើឡើង បើទោះបីជាមានឧបទ្ទវហេតុនេះក៏ដោយ និងបានបញ្ចប់ដោយលទ្ធផលម្ចាស់ផ្ទះឈ្នះក្នុងលទ្ធផល ២-១៕

ប្រែសម្រួល៖​​​ Vann Vann

ប្រភព៖ BBC

ចុចអាន៖ ទស្សនាវីដេអូ ប្រជាជនអាហ្វហ្គានីស្ថាន រត់ជាន់គ្នាស្លាប់នៅច្រកព្រំដែន ពេលសម្រុកចេញពីប្រទេស