ស្លាប់កើនដល់១២នាក់ ក្នុងហេតុការណ៍រត់ជាន់គ្នា អំឡុងពិធីបុណ្យសាសនាដ៏ធំ នៅឥណ្ឌា

គិតត្រឹមរសៀលថ្ងៃពុធទី២៩ខែមករាឆ្នាំ២០២៥ ប្រទេសឥណ្ឌា បានបញ្ជាក់ពីតូួលេខមនុស្សស្លាប់ចំនួន១២នាក់ ក្នុងហេតុការណ៍រត់ជាន់គ្នា អំឡុងពិធីបុណ្យ Kumbh Mela នៅទីក្រុង Prayagraj ភាគខាងជើងប្រទេសឥណ្ឌា ដែលគេស្មានថា មានអ្នកប្រតិបត្តិសាសនាហិណ្ឌូចូលរួមប្រមាណ ១០០លាននាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណាក៏ដោយ ក្រុមមន្ត្រីប៉ាន់ស្មានថា តួលេខមនុស្សស្លាប់នឹងកើនឡើងជាបន្តទៀត ខណៈអ្នករងរបួសក៏មានច្រើននាក់ផងដែរ។

ពេលកើតហេតុភ្លាមៗ ប៉ូលិសក៏បានរារាំងហ្វូងមនុស្ស កុំឲ្យសម្រុកទៅចំណុចប្រសព្វនៃទន្លេបីហៅថា សាំងហ្គាម (Sangam) ដើម្បីងូតទឹកពិសិដ្ឋលាងបាប ផងដែរ ប៉ុន្តែពួកគេមិនស្តាប់ឡើយ ហើយនៅតែរឹងទទឹង។

ប៉ូលិសក៏នៅមិនទាន់ហ៊ានអះអាងអំពីមូលហេតុបង្កឲ្យមានសោកនាដកម្មនេះផងដែរ។ យ៉ាងណា នាយករដ្ឋមន្ត្រីឥណ្ឌា បានផ្ញើសាររម្លែកទុក្ខទៅដល់ក្រុមគ្រួសារដែលបាត់បង់សមាជិក ក្នុងគ្រោះអកុសលនេះ។

សូមជម្រាបថា ហេតុការណ៍​មនុស្ស​រត់ជាន់គ្នា គឺកើតឡើង​ញឹក​ញាប់ណាស់​ក្នុង​ប្រទេស​ឥណ្ឌា ខណៈមូលហេតុចម្បងត្រូវបានគេចង្អុលទៅទីតាំងតូចចង្អៀត និងភាពណែនតាន់តាប់នៃមនុស្សចូលរួម។

យោងតាមទិន្នន័យរបស់រដ្ឋាភិបាល, ប្រទេសឥណ្ឌាមានហេតុការណ៍រត់ជាន់គ្នាចំនួន៤៧លើក ចន្លោះឆ្នាំ២០២១ដល់២០២២ ប៉ុន្តែមិនបញ្ជាក់ច្បាស់អំពីតួលេខជនរងគ្រោះនោះទេ។

ដោយឡែក កាលពីឆ្នាំមុន មនុស្សជាង១២០នាក់បានបាត់បង់ជីវិត ក្នុងស្រុក Hathras នៃរដ្ឋ Uttar Pradesh អំឡុងពិធីសាសនាមួយ៕

អត្ថបទ៖ សុខ សុវណ្ណ

ចុចអាន៖ រត់ជាន់គ្នាក្នុងពិធីបុណ្យសាសនាហិណ្ឌូ ដែលមានមនុស្សចូលរួម ១០០លាននាក់ នៅឥណ្ឌា