សម្តេចរាជបុត្រីព្រះអនុជ នរោត្តម អរុណរស្មី បដិសេធ​ជាប់ពាក់ព័ន្ធ​ជាមួយ​គណបក្សហ៊្វុនស៊ិនប៉ិច​

ខុទ្ទកាល័យ សម្ដេចនរោត្តម អរុណរស្មី​ បាន​ធ្វើសេចក្តីជូនដំណឹងមួយ​ ដោយបញ្ជាក់ថា ​សម្តេចរាជបុត្រីព្រះអនុជ នរោត្តម អរុណរស្មី ដែលបច្ចុប្បន្នជាឧត្តមប្រឹក្សាផ្ទាល់​ព្រះមហាក្សត្រ​ មិនជាប់​​ពាក់ព័ន្ធ​ជាមួយ​គណបក្សហ៊្វុនស៊ិនប៉ិចទេ។

ជាការកត់សម្គាល់ ការធ្វើសេចក្តីជូនដំណឹងនេះ បាន​ធ្វើឡើងបន្ទាប់ពីការ​យាងចូលទិវង្គត់​របស់​​សម្តេច​ក្រុមព្រះ នរោត្តម រណប្ញទ្ធិ ព្រះប្រធានគណបក្សហ៊្វុនស៊ិនប៉ិច​ ហើយ​ដោយសារតែ​មានបញ្ហាផ្ទៃក្នុង ថ្នាក់ដឹកនាំ​មួយក្រុម នៃ​​​គណបក្សហ៊្វុនស៊ិនប៉ិច​ បានធ្វើលិខិតមួយ​យាង​សម្តេច​រាជបុត្រី ព្រះអនុជ នរោត្តម អរុណរស្មី​ ​ដើម្បីដឹកនាំគណបក្សហ៊្វុនស៊ិនប៉ិច។​

​លិខិតពីខុទ្ទកាល័យ ចុះថ្ងៃទី០៤ ខែកុម្ភៈ បានបញ្ជាក់យ៉ាងដូច្នេះថា “​ខុទ្ទកាល័យ សម្តេចរាជបុត្រីព្រះអនុជ នរោត្តម អរុណរស្មី ឧត្តមប្រឹក្សាផ្ទាល់ ព្រះករុណាព្រះមហាក្សត្រ នៃព្រះរាជាណាចក្រកម្ពុជា សូមធ្វើសេចក្តីប្រកាសជូន​ដំណឹងជាផ្លូវ​ការដល់មតិសាធារណៈជន និងបណ្តាញសារព័ត៌មានជាតិថា សម្ដេច​រាជបុត្រី ព្រះអនុជ នរោត្តម អរុណរស្មី មិនជាប់ទាក់ទង ឬមានតួនាទីជាមួយ​គណបក្សហ៊្វុនស៊ិនប៉ិចទេ ចាប់ពីថ្ងៃ​នៃសេចក្តីប្រកាសនេះ”។​

ទាក់ទងទៅនឹងលិខិត​នេះ លោក ញឿន រ៉ាដែន អ្នកនាំពាក្យគណបក្សហ្វ៊ុនស៊ិនប៉ិច​បានថ្លែងប្រាប់ “កម្ពុជាថ្មី” នារសៀលថ្ងៃទី០៥ ខែកុម្ភៈ ឆ្នាំ២០២២នេះថា ខាងគណបក្សក៏​ទទួលបានលិខិតបែបនេះ ពីតាមបណ្ដាញព័ត៌មាន​ដែរ ហើយខាងគណបក្សហ៊្វុនស៊ិនប៉ិច ក៏មិនទាន់ដឹងច្បាស់ថា លិខិតនេះជាលិខិតពិត ឬលិខិតក្លែងក្លាយនោះទេ ប៉ុន្តែប្រសិនបើលិខិតនេះជាលិខិតពិត គណបក្សហ៊្វុនស៊ិនប៉ិច នឹងគោរពទៅតាមសេចក្តីសម្រេច​ព្រះទ័យរបស់សម្ដេច​រាជបុត្រី ព្រះអនុជ នរោត្តម អរុណរស្មី​ ជានិច្ច ហើយគណបក្សហ្វ៊ុនស៊ិនប៉ិច​នៅតែដឹងគុណចំពោះគុណូបការៈដ៏ធំធេងរបស់សម្ដេច​រាជបុត្រី ព្រះអនុជ នរោត្តម អរុណរស្មី ​ដែលបានដឹកនាំគណបក្សនាពេលកន្លងមក ក៏ដូចជាការជ្រោមជ្រែងដល់ព្រះអង្គម្ចាស់ នរោត្តម ចក្រាវុធ ដែលត្រូវជាក្មួយ ផង​ដែរ។ ដោយឡែកការរៀបចំសមាជវិសាមញ្ញ​គណបក្ស ដែលគ្រោង​នឹងធ្វើនៅថ្ងៃទី០៩ ខែកុម្ភៈ ខាងមុខ​នឹងប្រព្រឹត្តទៅតាមការគ្រោងទុកដដែល។

សូមបញ្ជាក់ថា គណបក្ស​ហ្វ៊ុនស៊ិនប៉ិច ​ក្រុមខាងព្រះអង្គម្ចាស់ នរោត្តម ចក្រាវុធ បានកំណត់យកថ្ងៃទី០៩ ខែកុម្ភៈ ឆ្នាំ២០២២ ខាងមុខ ដើម្បីរៀបចំសមាជវិសាមញ្ញ ដើម្បីជ្រើសរើសក្បាលម៉ាស៊ីនដឹកនាំគណបក្ស និងធ្វើវិសោធនកម្មប្រការមួយចំនួន នៃលក្ខន្តិកៈគណបក្ស ព្រមទាំងកំណត់យុទ្ធសាស្ត្រនយោបាយគណបក្ស​។

សម្តេចក្រុមព្រះ នរោត្តម រណឫទ្ធិ ព្រះប្រធានគណបក្សហ្វ៊ុនស៊ិនប៉ិច បានយាងចូលព្រះទិវង្គត នៅថ្ងៃអាទិត្យ ទី២៨ ខែវិច្ឆិកា ឆ្នាំ២០២១ វេលាម៉ោង៩ និង៤០ នាទីព្រឹក នៅប្រទេសបារាំង ត្រូវនឹងម៉ោង៣ និង៤០នាទីរសៀល ម៉ោងនៅព្រះរាជាណាចក្រកម្ពុជា ក្នុងព្រះជន្មាយុ៧៧ព្រះវស្សា ដោយព្រះរោគាពាធ។

ក្រោយយាងចូលព្រះទិវង្គត់របស់សម្តេចក្រុមព្រះ បានធ្វើផ្ទៃក្នុងគណបក្សហ្វ៊ុនស៊ិនប៉ិច ដែលតែងតែមានភាពប្រេះស្រាំស្រាប់នោះ បានឈានទៅបែកបាក់កាន់តែធ្ងន់ធ្ងរ ដោយថ្នាក់ដឹកនាំបានបែកចេញជាពីរក្រុម គឺទីមួយ ក្រុមខាងព្រះអង្គម្ចាស់ នរោត្តម ចក្រាវុធ ដែលជាបុត្រារបស់សម្តេចក្រុមព្រះ ហើយមួយក្រុមទៀត គឺក្រុមលោក សាយ ហាក់ លោក ហេង ចន្ថា លោក ញ៉េប ប៊ុនជិន និងលោក ផាន់ សិទ្ធី ជាដើម (ក្រុមនេះគ្រោងយាងព្រះអង្គម្ចាស់ នរោតម អរុណ រស្មី ធ្វើជាប្រធានបក្ស)។

ជាការកត់សម្គាល់ ថ្នាក់ដឹកនាំទាំងពីរក្រុមតែងតែអះអាងថា ក្រុមមួយធ្វើសកម្មភាពដោយខុសច្បាប់ ខុសលក្ខន្តិកៈ ហើយក្រុមមួយទៀត ក៏ប្រកាសដូចគ្នា ដូច្នេះគេមិនដឹងថា ក្រុមណាខុសក្រុមណាត្រូវនោះទេ។

កាលពីថ្មីៗនេះ ក្រសួងមហាផ្ទៃបានចេញលិខិតមួយថ្វាយព្រះអង្គម្ចាស់ នរោត្តម ចក្រាវុធ ដើម្បីធ្វើការសម្របសម្រួលផ្ទៃក្នុង មុននឹងធ្វើសសមាជរៀបចំក្បាលម៉ាស៊ីនដឹកនាំបក្ស។ បើទោះបីជាមានលិខិតក្រសួងមហាផ្ទៃនេះក្តី ផ្ទៃក្នុងគណបក្សហ្វ៊ុនស៊ិនប៉ិច ជាពិសេសថ្នាក់ដឹក​នាំទាំងពីរក្រុមនៅតែមិនអាចសម្របសម្រួលគ្នាឡើយ​៕

អត្ថបទ៖ កោះកែវ​​