សម្ដេចតេជោ ស្នើឲ្យពិចារណាដាក់ជនជាតិខ្មែរឥស្លាមម្នាក់ ជាអភិបាលរងខេត្ត និងអភិបាលរងស្រុក

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បាន​ស្នើឲ្យពិចារណាមានការដាក់ ជនជាតិខ្មែរឥស្លាមម្នាក់ ជាអភិ​បាលរងខេត្ត អភិបាលរងស្រុក អភិបាលរងខណ្ឌ សម្រាប់ខេត្ត ស្រុក ឬខណ្ឌណា ដែលមានជនជាតិខ្មែរឥស្លាមរស់នៅច្រើន។

នៅក្នុងពិធីបិទសន្និបាតបូកសរុបការងារឆ្នាំ ២០២១ និងលើកទិសដៅការងារឆ្នាំ ២០២២ របស់ក្រសួងមហាផ្ទៃ នារសៀលថ្ងៃទី ២៣ ខែកុម្ភៈនេះថា សម្ដេចតេជោនាយករដ្ឋមន្ត្រី បានថ្លែងថា ការលើកឡើង ខាងលើនេះ មិនមែនជាកូតានោះទេ តែនេះជាបញ្ហាដែលទាក់ទងនឹងគោលនយោបាយ របស់រាជរដ្ឋាភិបាល និងសម្រួលដល់ការបំពេញការងារ។

សម្ដេចតេជោ ហ៊ុន សែន បានថ្លែងថា «ប៉ុន្តែបញ្ហាមួយ ដែលខ្ញុំស្នើឲ្យយកចិត្តទុកដាក់ នោះគឺទាក់ទងនឹងស្ថានភាពចម្រុះ នៅផ្នែកខាងក្នុង ដែលមានបងប្អូនជនជាតិឥស្លាម រស់នៅយ៉ាងច្រើន នៅតាមបណ្ដាខេត្ត និងស្រុកមួយចំនួន ខ្ញុំស្នើឲ្យបណ្ដាខេត្ត ដែលមានបងប្អូនឥស្លាមរស់នៅ យកចិត្តទុកដាក់រៀបចំ ដើម្បីឲ្យមានហោចណាស់អភិបាលរងម្នាក់ នៅក្នុងខេត្តដែលមានប្រជាជនច្រើន ហើយឲ្យមានអភិបាលរង ហើយបើអាចធ្វើទៅបាន មានសមត្ថភាព ធ្វើអភិបាលស្រុក ឬខណ្ឌ ដែលមានបងប្អូនឥស្លាមច្រើន»៕

អត្ថបទ៖ ឃួន សុភ័ក្រ