ព័ត៌មានអន្ដរជាតិ

ស្ថានទូតចិនឆ្លើយតបដែលចោទថា រុស្ស៊ីស្នើសុំជំនួយយោធាពីចិន

បានផុស

៤ years មុន

នៅ

ថ្ងៃចន្ទ ១៤ មីនា ២០២២

ដោយ

ស្ថានទូតចិនប្រចាំនៅសហរដ្ឋអាមេរិកបាននិយាយថា ខ្លួនមិនមានព័ត៌មានអំពីការចោទប្រកាន់ដែលលើកឡើងថា រុស្ស៊ីបានស្នើសុំជំនួយយោធាពីចិននោះទេ ខណៈខ្លួនផ្តោតសំខាន់ក្នុងការនាំយកភាពតានតឹងនៅអ៊ុយក្រែនឲ្យធូរស្រាល។

យោងតាមមន្ត្រីអាមេរិកមិនបញ្ចេញឈ្មោះ កាសែត Financial Times បានផ្សាយកាលពីថ្ងៃអាទិត្យថា រដ្ឋាភិបាលក្រុងមូស្គូបានស្នើទៅប្រទេសចិនដើម្បីជំនួយសម្ភារៈ និងជំនួយយោធាផ្សេងៗទៀតដើម្បីគាំទ្រដល់ការវាយប្រហាររបស់ខ្លួននៅអ៊ុយក្រែន។ ការផ្សាយនោះបានបន្ថែមថា សេតវិមានបានព្រួយបារម្ភពីទីក្រុងប៉េកាំងអាចធ្វើឲ្យខូចដល់កិច្ចខិតខំប្រឹងប្រែងរបស់ប្រទេសលោកខាងលិចដើម្បីជួយដល់កម្លាំងអ៊ុយក្រែនក្នុងការការពារប្រទេស ប្រសិនបើចិនយល់ព្រមតាមសំណើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចោទប្រកាន់ទាំងនោះក៏ត្រូវបានសារព័ត៌មានធំៗដូចជា New York Times, CNN និងសារព័ត៌មានលោកខាងលិចជាច្រើនទៀតបានចេញផ្សាយ។ ជាក់ស្តែង CNN បានផ្សាយថា រុស្ស៊ីបានស្នើសុំចិនដើម្បីជំនួយយន្តហោះអត់មនុស្សបើក (ដ្រូន) ខណៈកាសែត NYT បានផ្សាយថា ប្រភពរបស់ខ្លួនបានបដិសេធពិភាក្សាអំពីប្រភេទអាវុធ ឬជំនួយយោធាដែលទីក្រុងមូស្គូបានស្នើសុំ។

ជុំវិញករណីខាងលើ អ្នកនាំពាក្យស្ថានទូតចិន លោក Liu Pengyu បានប្រាប់សារព័ត៌មាន Reuters កាលពីយប់ថ្ងៃអាទិត្យថា លោកមិនធ្លាប់បានឮសំណើរសុំឡើយ និងនិយាយថា អាទិភាពរបស់ចិនគឺទប់ស្កាត់ស្ថានភាពតានតឹងពីការធ្វើឲ្យជម្លោះកាន់តែធំគ្រប់គ្រងលែងបាន។

ទីក្រុងប៉េកាំងបានប្រកាន់ជំហរអព្យាក្រឹតក្នុងជម្លោះរបស់រុស្ស៊ីជាមួយអ៊ុយក្រែន ដោយអំពាវនាវឱ្យបញ្ចប់សង្គ្រាម ប៉ុន្តែបដិសេធមិនចូលរួមជាមួយលោកខាងលិចក្នុងការថ្កោលទោសទីក្រុងម៉ូស្គូ៕

ប្រែសម្រួល៖ វីរបុត្រ
ប្រភព៖ RT

Related Topics:ប្រទេសចិន