ព័ត៌មានជាតិ

១១ កន្លែងសំខាន់នៅទីក្រុងភ្នំពេញ ទេសចរបរទេសចង់ស្គាល់ មិនអាចរំលងបាន

បានផុស

៤ years មុន

នៅ

ថ្ងៃពុធ ២៣ មីនា ២០២២

ដោយ

ភ្នំពេញជារាជធានីចំណាស់មានអាយុកាលជាង ៦០០ ឆ្នាំ ហើយមានទន្លេបួនមុខហូរប្រសព្វគ្នា។ ក្រៅពីជាមជ្ឈមណ្ឌលសេដ្ឋកិច្ច និងនយោបាយ រាជធានីដែលមានប្រជាជនជាង ៣ លាននាក់នេះក៏ជាប៉ូលទេសចរណ៍សំខាន់មួយដែរ។

មន្រ្តីមន្ទីរទេសចរណ៍រាជធានីភ្នំពេញបានបង្ហាញទីតាំងតំបន់ទេសចរណ៍សំខាន់ៗនៅរាជធានីភ្នំពេញដ៏ពេញនិយមបំផុត ដែលទេសចរបរទេសមិនអាចខកខានក្នុងការទៅទស្សនា។

១. ផ្សារធំថ្មី

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្សារធំថ្មីជាសំណង់បេតិកភណ្ឌដ៏លេចធ្លោក្នុងចំណោមសំណង់ដ៏គួរឲ្យចាប់អារម្មណ៍ក្នុងរាជធានីភ្នំពេញ ដែលត្រូវបានកសាងឡើងក្នុងពេលដែលប្រទេសកម្ពុជាស្ថិតនៅក្រោមការគ្រប់គ្រងរបស់អាណានិគមបារាំង។ សំណង់ប្រវត្តិសាស្រ្តនេះស្ថិតក្នុងចំណោមសំណង់អគារទាំង ៣០ ដ៏សំខាន់បំផុតជាអត្តសញ្ញាណរបស់រាជធានីភ្នំពេញ។

២. វាលពិឃាតជើងឯក

មានទីតាំងចម្ងាយប្រមាណ ១៥ គីឡូម៉ែត្រ នាប៉ែកនិរតីនៃរាជធានីភ្នំពេញ វាលពិឃាតជើងឯកជាទីតាំងប្រវត្តិសាស្ត្រ ដែលបង្កប់រឿងរ៉ាវព្រៃផ្សៃ ជាអតីតកន្លែងពិឃាតអ្នកទោសយ៉ាងរង្គាល ក្នុងរបបប្រល័យពូជសាសន៍ប៉ុលពត។

ជើងឯកគឺគ្រាន់តែជាវាលពិឃាដមួយក្នុងចំណោមវាលពិឃាដប្រហែលចំនួន៤០០ ដែលបានប្រព្រឹត្តទៅអំពើឧក្រិដ្ឋកម្មរបស់ខ្មែរក្រហមនៅទូទាំងប្រទេសកម្ពុជា។

៣. វិមានឯករាជ្យ

វិមានឯករាជ្យជាអត្តសញ្ញាណនៃរាជធានីភ្នំពេញ ដើម្បីរំលឹកទៅដល់វីរភាពរបស់បុព្វបុរសខ្មែរដែលបានតស៊ូពលីជីវិតក្នុងការដណ្ដើមឯករាជ្យពីបារាំងមកវិញ។

៤. សារមន្ទីជាតិ

សារមន្ទីរជាតិជាទីតម្កល់វត្ថុបុរាណធំជាងគេនៅប្រទេសកម្ពុជា ដែលជាទីតាំងប្រមូលផ្ដុំសម្បត្តិវប្បធម៌និងប្រវត្តិសាស្ត្រដ៏សំខាន់របស់ជាតិ។ សារមន្ទីរជាតិរក្សាទុករូបសំណាកនិងភស្ដុតាងប្រវត្តិសាស្ត្រកម្ពុជាជាង ១ ម៉ឺន ៤ ពាន់ តាំងពីសម័យបុរេប្រវត្តិ សម័យអង្គរ និងសម័យក្រោយៗមកទៀត។ សារមន្ទីរជាតិកសាងឡើងនៅឆ្នាំ ១៩១៧-១៩២០ ដែលមានទីតាំងជាប់ផ្នែកខាងជើងនៃព្រះបរមរាជវាំងក្នុងរាជធានីភ្នំពេញ។

៥. ផ្សាររាត្រី

ផ្សារនេះពេញនិយមក្នុងស្រទាប់យុវវ័យនិងភ្ញៀវបរទេសជាច្រើន ដែលប្រជុំទៅដោយតូបលក់សម្លៀកបំពាក់, ម្ហូបអាហារដោយមានការប្រគុំតន្រ្តីអមមានអ្នកចម្រៀង តន្រ្តីករនិងអ្នករបាំ ហើយមានទីតាំងសក្តានុពលតាមជួរមាត់ទន្លេ។

៦. ការជិះទូកកម្សាន្តតាមមាត់ទន្លេ

ការជិះទូកកម្សាន្ត ក៏ជាទីចាប់អារម្មណ៍ទាំងភ្ញៀវជាតិនិងអន្តរជាតិ។ ភ្ញៀវបរទេសមួយចំនួនតែងតែចំណាយពេលជិះទូកកម្សាន្ដតាមដងទន្លេងសាប និងដងទន្លេមេគង្គ ដើម្បីទស្សនាទេសភាព និងសម្រស់ដ៏ស្រស់ត្រកាលនាពេលរាត្រីរបស់រាជធានីភ្នំពេញ។

៧. ព្រះបរមរាជវាំង

ព្រះបរមរាជវាំងជាទីតាំងមិនអាចរំលងបានសម្រាប់ភ្ញៀវទេសចរបរទេសដែលមកទស្សនារាជធានីភ្នំពេញ ហើយក៏ជាទីប្រថាប់ព្រះមហាក្សត្រខ្មែរ។

៨. ផ្សារទួលទំពួង

ផ្សារទួលទំពូង ដែលបរទេសស្គាល់ផ្សាររុស្សីល្បីល្បាញសម្រាប់អ្នកស្វែងរកវត្ថុបុរាណ និងចំណីអាហារក្នុងស្រុក។ ក្រៅពីនេះក៏មានលក់វត្ថុអនុស្សាវរីយ៍ ដូចជារូបចម្លាក់ គ្រឿងអលង្ការ គ្រឿងមាស សំលៀកបំពាក់ជាដើម។

០៩. សារមន្ទីរគុកទួលស្លែង

សារមន្ទីរឧក្រិដ្ឋកម្មប្រល័យពូជសាសន៍ទួលស្លែង ឬសារមន្ទីរទួលស្លែង អតីតជាកន្លែងឃុំឃាំងសួរចម្លើយ និងធ្វើទារុណកម្មយ៉ាងព្រៃផ្សៃ និងសម្លាប់មនុស្សជំនាន់ប៉ុលពត។ មានរូបថត ហ៊្វីល សំណុំឯកសារសារភាពរបស់ជនរងគ្រោះ សម្ភារៈធ្វើទារុណកកម្ម រួមទាំងផ្នូរសពជនរងគ្រោះចំនួន ១៤ នាក់ ដែលស្លាប់ចុងក្រោយគេ ក៏ត្រូវបានកប់នៅទីនោះផងដែរ។

១០. វត្តភ្នំ

វត្តភ្នំមានប្រវត្តិពាក់ព័ន្ធការកកើតរាជធានីភ្នំពេញ ក្រោយព្រះបាទពញាយ៉ាតនាឆ្នាំ ១៤៣៤ បានយាងផ្លាស់រាជធានីពីក្រុងអង្គរ ដើម្បីកសាងរាជធានីថ្មីដោយយកឈ្មោះភ្នំរបស់លោកយាយពេញគឺ “ភ្នំពេញ”។

នៅក្នុងបរិវេណវត្តភ្នំមានចេតិយធំមួយតម្កល់ព្រះធាតុរបស់ព្រះបាទពញាយ៉ាត និងព្រះញាតិវង្សរបស់ព្រះអង្គ។ បច្ចុប្បន្នវត្តភ្នំបានក្លាយជាទីសក្តារៈពលរដ្ឋមានជំនឿមកបន់ស្រន់ផ្សេងៗ។

១១. មាត់ទន្លេ

មាត់ទន្លេគឺជាកន្លែងដែលមានប្រជាប្រិយភាពមួយនៅរាជធានីភ្នំពេញ តែងតែទាក់ទាញពលរដ្ឋមកអង្គុយលម្ហែ។ នាពេលល្ងាចៗក៏មានភ្ញៀវទេសចរជិះទូកកម្សាន្ត ស្រូបយកខ្យល់អាកាសនិងការញាំអីជួបជុំគ្នា៕

អត្ថបទ៖ ប៊ុណ្ណារ៉ា

Related Topics:រមណីយដ្ឋានទេសចរណ៍២៥ខេត្តក្រុង Featured