ថ្ងៃ​សម្រាក​ចូលឆ្នាំ ពលរដ្ឋអាច​ទៅចាក់វ៉ាក់សាំងបាន​ជា​ធម្មតា

លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការ​និង​ជា​អ្នក​នាំ​ពាក្យ​ក្រសួង​សុខាភិបាល បាន​ក្រើនរំលឹក​ឱ្យ​ប្រជាពលរដ្ឋ​ដែល​មិនទាន់​ចាក់​វ៉ាក់សាំង​ការពារ​ជំងឺកូវីដ-១៩​ ដូស​មូលដ្ឋាន ទៅចាក់​នៅក្នុង​អំឡុង​ពេល​សម្រាក​បុណ្យ​ចូល​ឆ្នាំថ្មី ចាប់ពី​ថ្ងៃទី១៣ ដល់ថ្ងៃទី១៧ ខែមេសា ខាង​មុខ​នេះ។

មានប្រសាសន៍នៅព្រឹកថ្ងៃទី១០មេសានេះថា លោកស្រីវេជ្ជបណ្ឌិត ឱ វណ្ណឌីន បាន​បញ្ជាក់​ថា ការចាក់វ៉ាក់សាំង​កូវីដ​-១៩ គឺជួយអាយុជីវិត​មនុស្សពីការឈឺធ្ងន់និងសេចក្តីស្លាប់។

លោកស្រីបានអំពាវនាវដល់បងប្អូនប្រជាពលរដ្ឋ ដែលមិនទាន់បានចាក់វ៉ាក់សាំងទាំងដូសមូលដ្ឋាន ដូសទី៣  និង​ដូស​ទី៤ សូមអញ្ជើញទៅចាក់នៅតាមមូលដ្ឋាន​សុខាភិបាលសាធារណ: ដែលកំពុងតែផ្តល់សេវាចាក់ជារៀងរាល់ថ្ងៃ និងនៅតាមទីតាំងដែលរៀបចំឡើង​ដោយរដ្ឋបាល​រាជធានី-ខេត្តទាំង២៥ ចាប់ពីថ្ងៃទី១៣-១៧ ខែមេសា ឆ្នាំ២០២២។

គួរបញ្ជាក់ថាគិតត្រឹមថ្ងៃទី៩ ខែមេសា ឆ្នាំ២០២២ ការចាក់វ៉ាក់សាំងសរុបនៅទូទាំងប្រទេសបានចំនួន ១៤ ៨៤៤ ៥៨៤៩៩នាក់ ស្មើនឹង ៩២,៧៨% បើធៀបនឹងប្រជាពលរដ្ឋ​សរុប ១៦ លាននាក់៕

អត្ថបទ៖ សំអឿន