ចិន រកឃើញករណីជំងឺផ្តាសាយបក្សី H3N8 ឆ្លងពីសត្វទៅមនុស្ស ជាលើកដំបូង

ប្រទេស​ចិន ​បាន​បញ្ជាក់​ពី​ករណី​ទី១ ដែលមនុស្សឆ្លង​ជំងឺ​ផ្តាសាយ​បក្សីប្រភេទ H3N8 ប៉ុន្តែ​អាជ្ញាធរ​សុខាភិបាល​និយាយ​ថា មាន​ហានិភ័យ​ទាបណាស់​នៃ​ការ​ឆ្លង​រាលដាល​ក្នុង​ចំណោម​មនុស្ស។

H3N8 ត្រូវ​បាន​គេ​ដឹង​ថា ​ឆ្លង​រាតត្បាត​តាំង​ពី​ឆ្នាំ២០០២មកម្ល៉េះ បន្ទាប់​ពី​បាន​លេច​ចេញ​ជា​លើក​ដំបូង​នៅ​ក្នុង​ហ្វូង​សត្វ​ទឹក​នៅតំបន់​អាមេរិក​ខាង​ជើង។ ជំងឺនេះបាន​ឆ្លង​ដល់សត្វ​សេះ ឆ្កែ និងឆ្មាទឹក ប៉ុន្តែ​មិន​ត្រូវ​បាន​គេ​រក​ឃើញ​​លើ​មនុស្ស​ទេ ពី​មុន​មក។

គណៈកម្មាធិការសុខភាពជាតិចិន (NHC) កាលពីថ្ងៃអង្គារទី២៦ខែមេសាបាននិយាយថា ក្មេងប្រុសអាយុ៤ឆ្នាំម្នាក់ រស់នៅក្នុងខេត្ត Henan ភាគកណ្តាល បានធ្វើតេស្តវិជ្ជមានមេរោគនេះ បន្ទាប់ពី បញ្ជូនទៅមន្ទីរពេទ្យកាលពីដើមខែនេះ ដោយមានអាការគ្រុនក្តៅ និងរោគសញ្ញាផ្សេងទៀត។

NHC បាននិយាយនៅក្នុងសេចក្តីថ្លែងការណ៍មួយថា គ្រួសាររបស់ក្មេងប្រុសម្នាក់នេះ បានចិញ្ចឹមមាន់នៅផ្ទះ ហើយរស់នៅក្នុងតំបន់ដែលមានសត្វទាព្រៃ។

យោងតាមគណៈកម្មការ, ក្មេងប្រុសម្នាក់នេះ បានឆ្លងមេរោគដោយផ្ទាល់ពីសត្វ ប៉ុន្តែវីរុសមិនត្រូវបានរកឃើញថាមាន សមត្ថភាពក្នុងការចម្លងទៅមនុស្សនោះទេ។ ការ​ធ្វើ​តេស្ត​លើ​ទំនាក់ទំនង​របស់​ក្មេងប្រុស​នេះ ជាមួយ​មនុស្ស​ជិតស្និទ្ធ ​មិនបានរកឃើញ​អ្វី​ខុស​ប្រក្រតីឡើយ។

ទោះបីជាយ៉ាងណាក៏ដោយ គណៈកម្មការបានព្រមានសាធារណជនឲ្យនៅឆ្ងាយពីសត្វស្លាបដែលងាប់ ឬឈឺ ហើយស្វែងរកការព្យាបាលភ្លាមៗបើមានអាការគ្រុនក្តៅ ឬចេញរោគសញ្ញាផ្លូវដង្ហើម។

គួរបញ្ជាក់ថា ជំងឺគ្រុនផ្តាសាយបក្សី កើតមានជាចម្បងលើសត្វស្លាបព្រៃ និងបសុបក្សី ហើយករណីនៃការឆ្លងរវាងមនុស្សនិងមនុស្សគឺកម្រណាស់៕

ប្រែសម្រួល៖ Vann Vann

ប្រភព៖ CNA

ចុចអាន៖ ថៃ ប្រយ័ត្នខ្លាំង បន្ទាប់ពីស្រ្តីចិនម្នាក់ ស្លាប់ដោយសារជំងឺផ្តាសាយបក្សី (មានវីដេអូ)