មន្រ្តី​សុខាភិបាលខេត្តកោះកុង​ប្រើ​ពេល​៤ថ្ងៃ​ចាក់​វ៉ាក់សាំង​ជូន​ពលរដ្ឋ​បាន​ជាង ១ ពាន់​នាក់ ក្រោយ​ពង្រីក​វិសាល​ភាព

ក្រោយពង្រាយ​កម្លាំងកងទ័ព​អាវស​ចុះទៅតាមទីផ្សារ​ និងសាលារៀនតាម​មូលដ្ឋានក្នុង​ក្រុងស្រុក​នានា​ក្នុងខេត្តកោះកុង មន្រ្តីសុខាភិបាលបានទទួលចាក់វ៉ាក់​សាំងបង្ការការពារជំងឺកូវីដ១៩​ដល់ប្រជា​ពលរដ្ឋ និងសិស្សានុសិស្សបានប្រមាណ១.៥៧២នាក់។

គិតចាប់តាំងពីថ្ងៃទី២៥ដល់ថ្ងៃទី២៨ខែមេសា ឆ្នាំ២០២២ ពលរដ្ឋ និងសិស្សានុសិស្សនៅតាម​សាលា​រៀន ក៏ដូចជាទីផ្សារប្រមាណ ១.៥៧២ នាក់ ក្នុងនោះស្រ្តី៨៥៥នាក់ចាក់សាំងការពារជំងឺ​កូវីដដោយ​ស្ម័គ្រចិត្តគ្មានការបង្ខិតបង្ខំឡើយ។

លោកវេជ្ជបណ្ឌិត ទៅ ម៉ឺង ប្រធានមន្ទីរសុខាភិបាលខេត្តកោះកុង ថ្លែងនៅថ្ងៃទី២៩ ខែមេសា នេះថា យុទ្ធនាការពង្រាយកម្លាំងមន្រ្តីសុខាភិបាលចុះចាក់វ៉ាក់សាំងនៅពេលនេះ ជាការបង្ខិតសេវា​សាធារ​ណ​សុខាភិបាលដល់ក្បែរលំនៅដ្ឋានពលរដ្ឋ និងគ្រឹស្ថានសិក្សារបស់សិស្សានុសិស្ស។

ទោះយ៉ាងណា លោកវេជ្ជបណ្ឌិតប្រធានមន្ទីរសុខាភិបាល អះអាងក្នុងចំណោមពលរដ្ឋ១.៥៧២​នាក់​ខាងលើបានចាក់វ៉ាក់សាំងបង្ការជំងឺកូវីដ១៩ភាគច្រើនជាអ្នកមកចាក់ដូសទី៣ និងដូសទី៤ គ្រាពួក​គាត់​ទើបតែដល់ពេលវេលាមកចាក់ និងអ្នកខ្លះធ្លាប់ឆ្លងជំងឺកូវីដ១៩កាលពីពេលកន្លងទៅ។

ក្រៅពីសាលារៀន និងបណ្តាទីផ្សារក្នុងខេត្ត រដ្ឋបាលខេត្តបានកំណត់គោលដៅសំខាន់​ដែលនឹងត្រូវ​ចាក់វ៉ាក់សាំងប្រជាពលរដ្ឋ យុវជន កម្មករ កម្មការិនី រួមមាន៖តំបន់សេដ្ឋកិច្ចខេត្តកោះកុង តំបន់ទេស​ចរណ៍​តារាសាគរ ចំណតរថយន្ត និងចំណតទូក។

ដំណើរការផ្តល់សេវាចាក់វ៉ាក់សាំងតាមសាលារៀន និងទីផ្សារ ត្រូវបានរដ្ឋបាលខេត្តកោះកុង និងមន្ទីរ​សុខាភិបាល​ចាត់ទុកថា ជាយុទ្ធសាស្រ្តថ្មី ដើម្បីពន្លឿនវិសាលភាពយ៉ាងប្រសិទ្ធិភាព​តាមផែន​ការរបស់រាជរដ្ឋាភិបាលក្នុងន័យបង្កើនភាពសាំុក្នុងសហគមន៍នឹងជំងឺកូវីដ១៩។

ចំពោះប្រជាពលរដ្ឋដែលទើបតែមកចាក់វ៉ាក់សាំងដូសទី៣ និងដូសទី៤ ថ្លែងថា កាលដែលពួក​គាត់​មក​ចាក់វ៉ាកសាំងនៅពេលនេះ ដើម្បីឱ្យសិរីរាង្គកាយកាន់តែមានភាពស៊ាំនឹងជំងឺកូវីដ១៩បន្ថែម ទោះ​បីស្ថានភាពជំងឺនេះហាក់ធូរស្រាលច្រើនក៏ពិតមែន។

អ្នកស្រី ជា សំនាង ប្រជាពលរដ្ឋរស់នៅភូមិ២ ឃុំប៉ាក់ខ្លង ស្រុកមណ្ឌលសីមា លើកឡើងថា រូបគាត់​បាន​ចាក់វ៉ាក់សាំងបានដូសទី៣ហើយ កាលដែលទើបតែមកចាក់ព្រោះកន្លងទៅមិនទាន់ដល់ពេលវេលាតាមរយៈកាតបង្ហាញ។ អ្នកស្រី យល់ថា មានតែថ្នាំវ៉ាក់សាំងតែមួយគត់ ទើបធ្វើឱ្យសុខភាព​មនុស្សគ្រប់គ្នាអាច​រួចផុតពីសេច​ក្តីស្លាប់​បាន គ្មានវ៉ាក់សាំងទេនោះម្ល៉េះជាប្រទេសជាតិមិនអាច​បើកការស្តារសេដ្ឋកិច្ច​សង្គមដូចពេល​នេះ​ឡើយ​។

​ដោយឡែក​យុវសិស្ស​ ស្រី​ឃីម រៀន​នៅវិទ្យាល័យ​ប៉ាក់ខ្លង​ អះអាងថា​ នាងរីករាយ​ដែលមាន​គ្រូពេទ្យ​ចុះមកចាក់វ៉ាក់សាំងដល់សាលារៀន ព្រោះកន្លងទៅម្តាយរបស់នាងរវល់ការងាររកស៊ីមិន​មាន​​ពេលគ្រប់គ្រាន់ជូនទៅចាក់វ៉ាក់សាំង​នៅមណ្ឌលសុខភាព។ ​

​ក្នុងនាម័យុវសិស្សម្នាក់​ ស្រីឃីម សូមថ្លែងអំណអរគុណយ៉ាងជ្រោលជ្រៅ​ជូនចំពោះក្រុមគ្រូពេទ្យ​ និងសម្តេចតេជោ ហ៊ុន សែន នាយករដ្ឋមន្រ្តីដែលបានយកចិត្តទុកដាក់ផ្តល់​វ៉ាក់សាំងបង្ការជំងឺកូវីដ​បានទាន់ពេលវេលាដែលធ្វើឱ្យប្រទេសជាតិមានលទ្ធភាពស្តារសេដ្ឋកិច្ចឡើងវិញដូចសព្វថ្ងៃ។

​អត្ថបទ៖ សិរីវឌ្ឍនៈ