រុស្ស៊ី កំពុងប្រើប្រាស់អាវុធឡាស៊ែរស៊េរីថ្មី ដ៏មានឥទ្ធិពលនៅ អ៊ុយក្រែន ដុតកម្ទេចយន្តហោះសត្រូវត្រឹម ៥វិនាទី (មានវីដេអូ)

កាលពីថ្ងៃពុធទី១៨ខែឧសភា ប្រទេសរុស្ស៊ីបាននិយាយថា ខ្លួនកំពុងប្រើប្រាស់អាវុធឡាស៊ែរជំនាន់ថ្មី ដ៏មានឥទ្ធិពល នៅក្នុងប្រទេសអ៊ុយក្រែន ដើម្បីដុតកម្ទេចយន្តហោះគ្មានមនុស្សបើក។

ប្រធានាធិបតី វ្ល៉ាឌីមៀរ ពូទីន ក្នុងឆ្នាំ២០១៨ បានបង្ហាញអាវុធថ្មីជាច្រើនប្រភេទ រួមទាំងមីស៊ីលផ្លោងអន្តរទ្វីបស៊េរីថ្មី យានគ្មានមនុស្សបើកក្រោមទឹកបំពាក់អាវុធនុយក្លេអ៊ែ អាវុធលឿនជាងសំឡេង និងអាវុធឡាស៊ែរថ្មីផងដែរ។

ទោះបីជាយ៉ាងណាក៏ដោយ គេ​ដឹងព័ត៌មាន​តិច​តួចណាស់អំពី​អាវុធ​ឡាស៊ែរ​ថ្មីនេះ។ លោកពូទីន បានហៅវាថា Peresvet ដែលត្រូវបានដាក់ឈ្មោះតាមអ្នកចម្បាំងគ្រិស្តអូស្សូដក់នៅមជ្ឈិមសម័យឈ្មោះ Alexander Peresvet ដែលបានបាត់បង់ជីវិតនៅក្នុងសមរភូមិ។

លោក Yury Borisov ឧបនាយករដ្ឋមន្ត្រីទទួលបន្ទុកផ្នែកអភិវឌ្ឍន៍យោធា បានប្រាប់សន្និសីទនៅទីក្រុងមូស្គូថា Peresvet ត្រូវបានដាក់ពង្រាយយ៉ាងទូលំទូលាយរួចទៅហើយ ហើយវាអាចកម្ទេចផ្កាយរណបក្នុងចម្ងាយរហូតដល់ ១៥០០គីឡូម៉ែត្រពីផែនដី។

យ៉ាងណាក្តី លោកអះអាងថា រុស្ស៊ីមានប្រព័ន្ធ ដែលមានថាមពលខ្លាំងជាង Peresvet ដែលអាចដុតបំផ្លាញយន្តហោះគ្មានមនុស្សបើក និងឧបករណ៍ផ្សេងៗទៀត។

លោក Borisov បានលើកឡើងពីការសាកល្បងកាលពីថ្ងៃអង្គារ ដែលលោកនិយាយថា អាវុធនេះ បានដុតកម្ទេចយន្តហោះគ្មានមនុស្សបើកនៅចម្ងាយ ៥គីឡូម៉ែត្រក្នុងរយៈពេលត្រឹម ៥វិនាទី។

នៅពេលសួរថាតើសព្វាវុធបែបនេះត្រូវបានប្រើប្រាស់ក្នុងប្រទេសអ៊ុយក្រែនឬក៏អត់? លោក Borisov ឆ្លើយថា ពិតប្រាកដណាស់៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA

ចុចអាន៖ អាមេរិក កំពុងប្រមូល ភេរវករ ISIS ឲ្យទៅ ប្រយុទ្ធ នៅ អ៊ុយក្រែន