អាមេរិក​ កំពុងប្រមូល​ភេរវករ ISIS ឲ្យទៅ​ប្រយុទ្ធ​នៅ​ អ៊ុយក្រែន (មានវីដេអូ)

ទីភ្នាក់ងារចារកម្មបរទេសរបស់រុស្ស៊ី (SVR) បានអះអាងកាលពីថ្ងៃអង្គារទី១៧ខែឧសភាថា សហរដ្ឋអាមេរិកបាននឹងកំពុងជ្រើសរើសភេរវករយ៉ាងសកម្ម យកទៅប្រយុទ្ធនៅអ៊ុយក្រែន។ នេះបង្ហាញពីការត្រៀមខ្លួនរបស់ទីក្រុងវ៉ាស៊ីនតោន ក្នុងការប្រើប្រាស់មធ្យោបាយគ្រប់យ៉ាង ដើម្បីសម្រេចបាននូវគោលដៅភូមិសាស្ត្រនយោបាយរបស់ខ្លួន។

SVR បានបង្ហាញនៅក្នុងសេចក្តីថ្លែងការណ៍មួយថា យោងតាមការស៊ើបការណ៍សម្ងាត់ដែលខ្លួនទទួលបាន សហរដ្ឋអាមេរិកកំពុងជ្រើសរើសយ៉ាងសកម្ម សូម្បីតែសមាជិកនៃអង្គការភេរវករអន្តរជាតិ រួមទាំងក្រុមរដ្ឋឥស្លាម (ISIS) ដែលហាមឃាត់នៅក្នុងសហព័ន្ធរុស្ស៊ីផងដែរ ឲ្យមកធ្វើជាទាហានស៊ីឈ្នួល ចូលរួមក្នុងអរិភាពនៅអ៊ុយក្រែន។

សេវាចារកម្មរុស្ស៊ី បានចង្អុលទៅមូលដ្ឋានយោធាអាមេរិក al-Tanf ក្នុងប្រទេសស៊ីរី ដែលមានទីតាំងនៅជិតព្រំដែនជាមួយហ្ស៊កដានី និងអ៊ីរ៉ាក់។ យោងតាមប្រភព, មូលដ្ឋាននេះ និងតំបន់ជុំវិញបានប្រែទៅជា មជ្ឈមណ្ឌលរបស់ពួកភេរវករ ជាកន្លែងដែលសកម្មប្រយុទ្ធ ISIS រហូតដល់ទៅ ៥០០ នាក់ និងក្រុមជីហាដផ្សេងទៀតត្រូវបានបង្វឹកឡើងវិញក្នុងពេលដំណាលគ្នា។

SVR អះអាងថា កាលពីខែមុន ក្រុមសកម្មប្រយុទ្ធ ISIS ចំនួន ៦០នាក់ដែលដោះលែងពីពន្ធនាគារគ្រប់គ្រងដោយជនជាតិឃើដស៊ីរី ត្រូវបានផ្ទេរទៅមូលដ្ឋាន al-Tanf ក្នុងគោលបំណងដើម្បីផ្ទេរជាបន្តទៅកាន់ទឹកដីអ៊ុយក្រែន។

SVR បញ្ជាក់ថា ក្នុងវគ្គបណ្តុះបណ្តាលនៅ al-Tanf, ពួកសកម្មប្រយុទ្ធទាំងនោះ ត្រូវបានណែនាំអំពីរបៀបប្រើប្រាស់ប្រព័ន្ធមីស៊ីលប្រឆាំងរថក្រោះ ការឈ្លបយកការណ៍ និងយន្តហោះគ្មានមនុស្សបើក ទំនាក់ទំនងកម្រិតខ្ពស់ និងឧបករណ៍ឃ្លាំមើល។

ទិន្នន័យនេះបញ្ជាក់ថា សហរដ្ឋអាមេរិកបានត្រៀមខ្លួនរួចជាស្រេចក្នុងការប្រើប្រាស់មធ្យោបាយគ្រប់យ៉ាងដើម្បីសម្រេចបាននូវគោលដៅភូមិសាស្ត្រនយោបាយរបស់ខ្លួន ដោយមិនរាប់បញ្ចូលការឧបត្ថម្ភដល់ក្រុមភេរវករអន្តរជាតិនោះទេ។

រដ្ឋបាលអាមេរិកមិនគិតពីផលវិបាកនៃសកម្មភាពបែបនេះឡើយ សូម្បីតែនៅពេលនិយាយអំពីការគំរាមកំហែងដល់សន្តិសុខនៃសម្ព័ន្ធមិត្តអឺរ៉ុប និងសូម្បីតែដល់អាយុជីវិតរបស់ជនជាតិអាមេរិកក៏ដោយ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ លោកខាងលិច ប្រើអ៊ុយក្រែនជាលេស ធ្វើសង្គ្រាមជាមួយ រុស្ស៊ី