ងាយឯណា បានឃើញតារាល្បីៗ ហែក្បួនឃោសនា បោះឆ្នោតឃុំ-សង្កាត់ តាមផ្លូវសាធារណៈបែបនេះ

នៅថ្ងៃទី០៣ ខែមិថុនា ឆ្នាំ២០២២នេះ គឺជាថ្ងៃបិទបញ្ចប់នៃយុទ្ធនាការណ៍ឃោសនារកសំឡេងឆ្នោតសម្រាប់ក្រុមប្រឹក្សាឃុំ-សង្កាត់ អាណត្តិទី៥។ តាមរយៈនេះគេសង្កេតឃើញមានប្រជាពលរដ្ឋយ៉ាងច្រើនកុះករបាននាំគ្នាចូលរួមក្បូនហែឃោសនាគាំទ្រ គណបក្សប្រជាជនកម្ពុជា នៅទូទាំងរាជធានីខេត្តក្រុងទាំងអស់។

មិនខុសគ្នាពីប្រជាពលរដ្ឋនៅតាមមូលដ្ឋាន នៃភូមិ ឃុំ ស្រុកនីមួយៗដែលបាននាំគ្នាសម្រុកទៅចូលរួមហែក្បូនឃោសនាគាំទ្រ គណបក្សប្រជាជនកម្ពុជា ពោលគឺមានវត្តមានរបស់តារា អ្នកសិល្បៈប្រុស-ស្រីល្បីៗជាច្រើនដួង ដែលមានស្ទើរតែគ្រប់ទម្រង់បាននាំគ្នាមកចូលរួមក្បូនហែឃោសនាគាំទ្រ គណបក្សប្រជាជនកម្ពុជា ផងដែរ។

តារាចម្រៀង តារាសម្ដែង និងតារាកំប្លែង ពិធីករ ទាំងនោះមានដូចជា មានអ្នកនាងគ្រត អ្នកស្រី ចាន់ តារាទី លោក ជា សំណាង លោក ប៊ុន សក្ដិ លោក ជា សុវណ្ណារិទ្ធិ លោក អៀង វិច្ឆ័យ លោក ណាខុន លោក ប៉ែន ចំរុង លោក ករុណា ពេជ្រ និង ពេជ្រ ថៃ ជាដើម។

តាមទិដ្ឋភាពជាក់ស្តែង គឺប្រជាពលរដ្ឋ និងសិល្បករ-សិល្បការិនីដែលបានចូលរួមទាំងអស់ សុទ្ធតែសម្តែងក្តីរីករាយផុសចេញពីក្រអៅបេះដូង និងគាំទ្រដោយស្មោះស្ម័គ្រជូន គណបក្សប្រជាជនកម្ពុជា ដែលដឹកនាំដោយ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

លើសពីនេះទៀត បងប្អូនប្រជាពលរដ្ឋគ្រប់រូបបានត្រៀមលក្ខណៈសម្បត្តិគ្រប់អស់ហើយ ដើម្បីរង់ចាំបោះឆ្នោតជូនគណបក្សប្រជាជនកម្ពុជា នៅថ្ងៃទី០៥ ខែមិថុនា ឆ្នាំ២០២២ ខាងមុខនេះ។ បោះឆ្នោតជូនគណបក្សប្រជាជនកម្ពុជា គឺដើម្បីខ្លួនយើង ក្រុមគ្រួសារយើង និងសង្គមជាតិយើង៕

អត្ថបទ៖ ចាន់រ៉ា