ឯកអគ្គរដ្ឋទូតទី ៤ របស់ មីយ៉ាន់ម៉ា ប្រចាំប្រទេស ចិន ទទួលមរណភាព

បើយោងតាមការចុះផ្សាយពីសារព័ត៌មានរដ្ឋមីយ៉ាន់ម៉ា និងប្រភពការទូតនៅទីក្រុងប៉េកាំងបានឲ្យដឹងថា ឯកអគ្គរដ្ឋទូតមីយ៉ាន់ម៉ាប្រចាំនៅប្រទេសចិនបានទទួលមរណភាពភ្លាមៗកាលពីថ្ងៃអាទិត្យនៅទីក្រុង Kunming ភាគនិរតីនៃប្រទេសចិន ។

ប្រភពមកពីអ្នកការទូតនៅទីក្រុងប៉េកាំង និងប្រព័ន្ធផ្សព្វផ្សាយមីយ៉ាន់ម៉ាផ្សាយជាភាសាចិនក៏បានឲ្យដឹងដែរថា ដំណឹងមរណភាពរបស់លោកឯកអគ្គរដ្ឋទូត U Myo Thant Pe ត្រូវបានបញ្ជាក់ដោយក្រសួងការបរទេសរបស់ប្រទេសមីយ៉ាន់ម៉ា ហើយមូលហេតុនៃការស្លាប់នេះទំនងជាគាំងបេះដូង ។

បើយោងតាមសេចក្តីរាយការណ៍ព័ត៌មានក្នុងស្រុកបានឲ្យដឹងថា លោក U Myo Thant Pe ត្រូវបានគេឃើញលើកចុងក្រោយកាលពីថ្ងៃសៅរ៍ក្នុងជំនួបជាមួយមន្ត្រីក្នុងតំបន់នៅខេត្ត Yunnan ភាគនិរតីនៃប្រទេសចិន ដែលមានព្រំប្រទល់ជាប់ប្រទេសមីយ៉ាន់ម៉ា ។

គួរបញ្ជាក់ថា លោក U Myo Thant Pe ត្រូវបានតែងតាំងជាឯកអគ្គរដ្ឋទូតមីយ៉ាន់ម៉ាប្រចាំប្រទេសចិនក្នុងឆ្នាំ ២០១៩ ហើយបានបន្តនៅក្នុងមុខតំណែងមួយនេះ បន្ទាប់ពីយោធាមីយ៉ាន់ម៉ាបានឡើងកាន់អំណាចក្នុងរដ្ឋប្រហារក្នុងខែកុម្ភៈ ឆ្នាំ ២០២១ ហើយលោក​ជា​ឯកអគ្គរដ្ឋទូត​ទី​ ៤ ​ដែល​បាន​ស្លាប់​នៅ​ប្រទេស​ចិន ​៕

ប្រែសម្រួលដោយ ៖ ជីវ័ន្ត

ប្រភព ៖ Tuoi Tre

ចុចអាន ៖ ចិន បញ្ចប់សមយុទ្ធយោធារយៈពេល ៤ ថ្ងៃ រកការសម្រេចចិត្តបង្រួបបង្រួម ជាមួយ តៃវ៉ាន់