លោក ពូទីន នឹងចេញក្រៅប្រទេស ​លើក​ដំបូង​ ចាប់​តាំង​ពី​សង្គ្រាម​អ៊ុយក្រែន ផ្ទុះឡើង

លោកប្រធានាធិបតី វ្ល៉ាឌីមៀរ ពូទីន នឹងធ្វើទស្សនកិច្ចអតីតរដ្ឋសូវៀតតូចៗចំនួនពីរ នៅអាស៊ីកណ្តាលក្នុងសប្តាហ៍នេះ។ នេះបើយោងតាមសេចក្តីរាយការណ៍របស់ទូរទស្សន៍រដ្ឋរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះ​នឹង​ជា​ដំណើរ​ទស្សនកិច្ចទៅបរទេសលើក​ដំបូង ​របស់​មេដឹកនាំ​រុស្ស៊ី ​ចាប់​តាំង​ពី​លោកបាន​បញ្ជា​បើកការលុកលុយប្រទេសអ៊ុយក្រែន។

លោក Pavel Zarubin អ្នកឆ្លើយឆ្លងព័ត៌មានវិមានក្រឹមឡាំងនៃស្ថានីយ៍ទូរទស្សន៍រដ្ឋ Rossiya 1 បាននិយាយថា លោកពូទីន នឹងធ្វើទស្សនកិច្ចប្រទេសតាហ្ស៊ីគីស្ថាន និងតួកម៉េនីស្ថាន ហើយបន្ទាប់មកជួបជាមួយប្រធានាធិបតីឥណ្ឌូណេស៊ីលោក Joko Widodo សម្រាប់កិច្ចពិភាក្សានៅទីក្រុងមូស្គូ។

នៅទីក្រុង ឌូស្ហាន់បេ លោក ពូទីន នឹងជួបជាមួយប្រធានាធិបតី តាហ្ស៊ីគីស្ថាន លោក Imomali Rakhmon ដែលជាសម្ព័ន្ធមិត្តជិតស្និទ្ធរបស់រុស្ស៊ី និងជាមេដឹកនាំដែលកាន់អំណាចយូរបំផុតនៃអតីតរដ្ឋសូវៀតមួយនេះ។

ដោយឡែក នៅទីក្រុង អាសហ្គាបាត, លោកនឹងចូលរួមកិច្ចប្រជុំកំពូលនៃប្រជាជាតិកាសព្យែន រួមទាំងមេដឹកនាំនៃប្រទេស អាស៊ែបៃហ្សង់ កាហ្សាក់ស្ថាន អ៊ីរ៉ង់ និងតួកម៉េនីស្ថាន។

ទីភ្នាក់ងារសារព័ត៌មាន RIA បានរាយការណ៍ថា លោក ពូទីន ក៏មានគម្រោងទៅទស្សនកិច្ចទីក្រុង គ្រុដណូ នៃប្រទេសបេឡារុសផងដែរ ដើម្បីចូលរួមក្នុងវេទិកាមួយជាមួយប្រធានាធិបតីបេឡារុស លោក Alexander Lukashenko។

គួរបញ្ជាក់ថា ដំណើរ​ទស្សនកិច្ចលើក​ចុង​ក្រោយ​របស់​លោក​ពូទីន​ នៅ​ក្រៅ​ប្រទេស​រុស្ស៊ី​គឺ ​ទៅកាន់​ទីក្រុង​ប៉េកាំង​នៅ​ដើម​ខែ​កុម្ភៈ៕

ប្រែសម្រួល៖ Vann Vann

ប្រភព៖ Sky

ចុចអាន៖ លោក Biden ជំរុញ G7 ឲ្យឈររួមគ្នា ខណៈមេដឹកនាំ កំណត់គោលដៅលើ មាស និងតម្លៃប្រេងរបស់រុស្ស៊ី