កម្ពុជាគ្រោងបំពាក់ឧបករណ៍ការពាររន្ទះនៅខេត្តប្រឈមខ្ពស់ចំនួន៣មុនគេ

មន្ត្រីអ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានអោយដឹងថា គណកម្មាធិការជាតិគ្រោងនឹងបំពាក់ឧបករណ៍ការពាររន្ទះបាញ់នៅខេត្តដែលប្រឈមខ្លាំងជាងគេចំនួន៣នៅប្រទេសកម្ពុជា ដើម្បីការពារអាយុជីវិតប្រជាពលរដ្ឋពីបាតុភូតរន្ទះ។

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានមានប្រសាន៍នៅថ្ងៃទី១៤ ខែកក្ក្ដានេះថា យើងនឹងបំពាក់ឧបករណ៍ការពាររន្ទះបាញ់នេះនៅខេត្តប្រឈមមុខខ្ពស់នឹងអត្រារងគ្រោះ និងស្លាប់ច្រើនជាងគេក្នុងនោះរួមមាន ខេត្តសៀមរាប ខេត្តបាត់ដំបង និងខេត្តពោធិសាត់។

លោកបានបន្តថា “តាមពិតនៅកម្ពុជាមានរាជធានី-ខេត្តស្ទើទាំង២៥ទៅហើយដែលបានទទួលរងគ្រោះដោយសាររន្ទះបាញ់នេះ តែខេត្តដែលលេចធ្លោជាងគេ គឺខេត្តទាំង៣ខាងលើដោយក្នុង១ឆ្នាំៗមានមនុស្សស្លាប់ និងរងគ្រោះដោយសារបញ្ហារន្ទះនេះច្រើនជាងគេ។ ដូចនេះហើយទើងយើងគ្រោងនឹងបំពាក់ឧបករណ៍ការពាររន្ទះមុនគេ”។

លោកបានបន្តទៀតថា ប៉ុន្តែមុននឹងឈានទៅបំពាក់ឧបករណ៍ការពាររន្ទះនេះ គណៈកម្មការជាតិគ្រោះមហន្តរាយត្រូវរៀបចំផែនការអោយបានច្បាស់លាស់ពិសេសស្វែងរកពីដៃគូក៏ដូចជារាជរដ្ឋាភិបាលក្នុងការទិញឧបករណ៍ទាំងនោះ។
លោកបានបន្ថែមថា នាពេលឆាប់ៗខាងមុខនេះ ក្រុមការងារគណៈកម្មការជាតិគ្រោះមហន្តរាយ និងចុះទៅសិក្សានៅខេត្តសៀមរាប ពោធិ៍សាត់ និងបាត់ដំបង ដើម្បីពិនិត្យមើលនិងវាយតម្លៃពីតម្រូវការជាក់ស្តែងដើម្បីធ្វើរបាយការណ៍ជូនថ្នាក់ដឹកនាំសម្រាប់អនុម័តបន្ត។

លោក សុទ្ធ គឹមកុលមុនី បានបញ្ជាក់ថា នៅក្នុងខែមិថុនា ឆ្នាំ២០២២ នេះ គ្រោះធម្មជាតិបានបណ្តាលឱ្យមនុស្សស្លាប់ និងរបួសចំនួន២៣នាក់ ក្នុងនោះស្លាប់ដោយរន្ទះបាញ់ចំនួន១០នាក់ និងរបួស៩នាក់ និងស្លាប់ដោយគ្រោះអគ្គិភ័យ ១ នាក់ រងរបួស ៣ នាក់។

លោកទេសរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍ថា គ្រោះថ្នាក់ដោយធម្មជាតិតែងតែកើតមានជារៀងរាល់ឆ្នាំនៅកម្ពុជា ដោយបានបំផ្លិតបំផ្លាញទ្រព្យសម្បត្តិ អាយុជីវិត ក្នុងនោះមានទឹកជំនន់ ខ្យល់កន្ត្រាក់ រន្ទះបាញ់ រាំងស្ងួត បាក់ច្រាំងទន្លេ និងជំងឺរាតត្បាតជាដើម។ ប៉ុន្តែក្នុងចំណោមគ្រោះធម្មជាតិទាំងនោះយើងមិនបានគិតចំពោះបញ្ហារន្ទះបាញ់ ដែលបង្កគ្រោះថ្នាក់ដល់អាយុជីវិតពលរដ្ឋជាច្រើនជារៀងរាល់ឆ្នាំ។

លោកទេសរដ្ឋមន្ត្រីបានណែនាំដល់លេខាធិការដ្ឋាន តាមបណ្ដារាជធានីខេត្ត ត្រូវមើលតំបន់ណាខ្លះដែលតែងកើតមានបាតុភូតុរន្ទះ ហើយនៅឆ្នាំនេះយើងនឹងគ្រោងស្នើសុំទៅក្រសួងសេដ្ឋកិច្ច និងហិរញ្ញវត្ថុជួយពិនិត្យលទ្ធភាពដោះស្រាយ​ទិញឧបករណ៍ការពាររន្ទះនេះ៕

អត្ថបទ៖ សំអឿន