កីឡា

ហេតុអ្វី World Games ដែលប៉េតង់ខ្មែរឈ្នះមេដាយមាស២មិនសូវល្បីដូច អូឡាំពិក?

បានផុស

៤ years មុន

នៅ

ថ្ងៃសុក្រ ១៥ កក្កដា ២០២២

ដោយ

ព្រឹត្តិការណ៍ប្រកួត«កីឡាពិភពលោក ឬ World Games»ហាក់ដូចជាថ្មីសម្រាប់កម្ពុជា និងទើបតែស្គាល់ព្រឹត្តិការណ៍នេះនៅពេលកីឡាប៊ូល និងប៉េតង់កម្ពុជាចេញទៅប្រកួតឆ្នាំ២០២២នេះនៅសហរដ្ឋអាមេរិក និងឈ្នះបានមេដាយមាស២គ្រឿង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមពិតទៅកីឡា World Games នេះជាព្រឹត្តិការណ៍ប្រកួតពហុកីឡាដែលប្រភេទកីឡាទាំងអស់នោះមិនមានការប្រកួតនៅក្នុងកីឡាអូឡាំពិក។ កីឡានេះរៀបចំការប្រកួតរាល់៤ឆ្នាំម្តង និងមួយឆ្នាំ បន្ទាប់ពីកីឡាអូឡាំពិករដូវក្តៅ។ កីឡាពិភពលោកនេះរៀបចំ និងគ្រប់គ្រងដោយសហព័ន្ធកីឡាពិភពលោកអន្តរជាតិ (IWGA) ដែលទទួលស្គាល់ដោយគណៈកម្មាធិការអូឡាំពិកអន្តរជាតិ (IOC)។

គិតត្រឹមឆ្នាំ២០២២នេះគឺជាការប្រកួតលើកទី១១នៃព្រឹត្តិការណ៍ World Games បន្ទាប់ពីរៀបចំការប្រកួតលើកដំបូងនៅទីក្រុង Santa Clara សហរដ្ឋអាមេរិកកាលពីឆ្នាំ១៩៨១។ សហព័ន្ធកីឡាពិភពលោកអន្តរជាតិ (IWGA) មានសហព័ន្ធជាតិជាសមាជិកអន្តរជាតិចំនួន៣៧។

អ៊ុន ស្រីយ៉ា និង អ៊ុក ស្រីមុំ ឈ្នះមេដាយមាសពី World Games

និយាយឲ្យខ្លីងាយយល់គឺ World Games ជាព្រឹត្តិការណ៍ប្រកួតរាល់ប្រភេទកីឡាដែលមិនមាននៅក្នុងព្រឹត្តិការណ៍កីឡាអូឡាំពិក ហើយក៏មិនសូវមានកេរ្តិ៍ឈ្មោះល្បាញទូទាំងពិភពលោកឡើយ។ ជាទូទៅ កីឡាប្រហែលជា៣០ប្រភេទត្រូវបានដាក់ឲ្យប្រកួតជាផ្លូវការ ហើយអត្តពលិកសុទ្ធតែជម្រើសឆ្នើមៗរបស់ប្រទេសជាសមាជិកនីមួយៗចូលរួមប្រកួត ដូច្នេះមានន័យថា ការប្រកួតប្រជែងគឺកម្រិតស្តង់ដាខ្ពស់។

សម្រាប់កម្ពុជាគឺជាលើកដំបូងដែលបានបញ្ជូនកីឡាប៊ូល និងប៉េតង់ទៅចូលរួមប្រកួតតាមការអញ្ជើញរបស់សហព័ន្ធកីឡាប៊ូល និងប៉េតង់ពិភពលោក។ កម្ពុជាបញ្ជូនទៅតែកីឡាការិនីប៊ូល និងប៉េតង់តែ២រូបប៉ុណ្ណោះគឺ អ៊ុក ស្រីមុំ និង អ៊ុន ស្រីយ៉ា ហើយប្រកួតតែ២វិញ្ញាសា ប៉ុន្តែទទួលបានជោគជ័យ១០០%ពោលគឺឈ្នះមេដាយមាសទាំងពីរវិញ្ញាសាតែម្តង៕