រដ្ឋមន្ត្រីអប់រំ៖ ការសិក្សាភាសាវៀតណាមមិនមានការបង្ខិតបង្ខំ រៀនតាមតម្រូវការ

លោក បណ្ឌិត ហង់ជួន ណារ៉ុន រដ្ឋមន្ត្រី ក្រសួងអប់រំយុវជន និងកីឡា បានលើកឡើងថា មិនមានការតម្រូវ ឬបង្ខិតបង្ខំឱ្យសិស្សនិស្សិតចូលសិក្សាភាសាវៀតណាមនៅសាកលវិទ្យាល័យភូមិន្ទភ្នំពេញនោះទេ ពោលគឺការបើកថ្នាក់បង្រៀនភាសាវៀតណាមនេះ តម្រូវឱ្យនិស្សិតត្រូវប្រឡងចូល និងត្រូវបង់លុយទើបអាចចូលរៀនបាន។

នៅក្នុងសន្និសិទសារព័ត៌មាន ស្ដីពី ការបង្កើតវិទ្យាស្ថានសិក្សាអន្តរជាតិ និងគោលនយោបាយសាធារណៈ នៅសាកលវិទ្យាល័យភូមិន្ទភ្នំពេញ ដែលក្នុងនោះមានដេប៉ាតឺម៉ង់សិក្សាវៀតណាម នៅថ្ងៃទី១៩ សីហា នៅទីស្ដីការក្រសួង លោករដ្ឋមន្ត្រីបានបន្តថា៖ “សូមសាធារណមតិកុំឱ្យមានការយល់ច្រឡំថា ការបើកបង្រៀនភាសាវៀតណាមនេះបង្រៀនដោយឥតគិតថ្លៃ គឺការរៀនដោយបង់លុយ ហើយទៅតាមតម្រូវការ ដោយមិនមានការបង្ខិតបង្ខំឡើយ បើអត់មានអ្នកចុះឈ្មោះចូលរៀន ក៏មានអាចដំណើរការបានដែរ។ ម្យ៉ាងទៀតអ្នកដែលចង់ចូលរៀនត្រូវប្រឡងចូល មិនមែនចេះតែឱ្យរៀននោះទេ”។

លោករដ្ឋមន្ត្រីបានឱ្យដឹងបន្ថែមថា៖ “ខ្ញុំយល់ពីការព្រួយបារម្ភរបស់សាធារណមតិ។ ដូច្នេះហើយបានជាក្រសួងចាំបាច់ត្រូវរៀបចំសន្និសីទសារព័ត៌មាននេះឡើងដើម្បីបញ្ជាក់ដល់ពួកគាត់ឱ្យបានជ្រាបកាន់តែច្បាស់ថា ការបង្កើតដេប៉ាតឺម៉ងភាសាវៀតណាមនៅសាកលវិទ្យាល័យភូមិន្ទភ្នំពេញនេះ គឺបង្រៀនដោយបង់លុយ ហើយមិនមែនបញ្ចូលទៅក្នុងកម្មវិធីសិក្សាទេ គឺដើម្បីឆ្លើយតបទៅនឹងតម្រូវការចាំបាច់សម្រាប់និស្សិតដែលត្រូវទៅបន្តការសិក្សា ក៏ដូចជាការរីកចម្រើនរបស់សេដ្ឋកិច្ចជាតិផងដែរ”។

លោករដ្ឋមន្ត្រីបានបន្តទៀតថា ការបើកថ្នាក់បង្រៀនភាសាវៀតណាមនេះក៏ជាការឆ្លើយតបទៅនឹងតម្រូវការរបស់និស្សិតខ្លះទទួលបានអាហារូបករណ៍ទៅសិក្សានៅវៀតណាម ត្រូវចេះភាសាវៀតណាម។ ដូចនេះបើមានការបង្រៀនភាសាវៀតណាម ងាយស្រួលឱ្យពួកគាត់រៀនរយៈពេលខ្លីដើម្បីបានបន្តការសិក្សានៅវៀតណាម តែត្រូវបង់លុយ។
លោករដ្ឋមន្ត្រីបានបន្តឱ្យដឹងទៀតថា មួយវិញទៀតស្របពេលដែលមានការវិនិយោគច្រើនពីប្រទេសវៀតណាម។ ដូចនេះមានតម្រូវការជ្រើសរើសបុគ្គលិកបម្រើការងារនៅតាមក្រមហ៊ុនានា ពិសេសនៅតាមតំបន់សេដ្ឋកិច្ចពិសេស ខេត្តស្វាយរៀងដែលត្រូវការអ្នកចេះភាសាវៀតណាមដើម្បីងាយស្រួលក្នុងការទំនាក់ទំនង។

លោករដ្ឋមន្ត្រីបានបន្ថែមថា មិនមែនតែបង្កើតដេប៉ាតឺម៉ងភាសាវៀតណាម ចិន និងថៃទេ ពេលអនាគតបើមានតម្រូវការក្រសួងនឹងបង្កើតដេប៉ាន់តឺម៉ង់ភាសាផ្សេងៗទៀតនៅតំបន់អាស៊ាន ព្រោះថាបើចេះភាសាបណ្តាប្រទេសទាំងនោះ វានឹងមានភាពងាយស្រួលក្នុងការទំនាក់ទំនងការងារ និងការទូតផងដែរ៕

អត្ថបទ៖ សំអឿន