សត្វឱម៉ាល់ទិចក្មេងស្រីម្នាក់ប្រមាណ ១០០មេ ស្លាប់មុនបញ្ជូនដល់មន្ទីរពេទ្យគន្ធបុប្ឋា

(ខេត្តស្វាយរៀង): ក្មេងស្រីអាយុ០៧ឆ្នាំម្នាក់ បានបាត់បង់ជីវិត ក្រោយពីត្រូវសត្វឱម៉ាល់ទិច ប្រមាណ ១០០មេ នៅរសៀលថ្ងៃទី ២២ ខែ សីហា ឆ្នាំ ២០២២ ស្ថិតនៅភូមិមេលោង សង្កាត់ចេក ក្រុងស្វាយរៀង ចម្ងាយ​ពីផ្ទះ២០០ម៉ែត្រ។

បើតាមស្ត្រីឈ្មោះ ហ៊ូ ស៊ីណា អាយុ៣៦ឆ្នាំ ត្រូវជាម្តាយជនរងគ្រោះ និងឳពុកឈ្មោះ ខៀវ  ថេន អាយុ៣៥ឆ្នាំ បានឲ្យដឹងថា មុនពេលកើតហេតុកូនស្រីឈ្មោះ ភឿន ចន្ថា អាយុ៧ឆ្នាំ រៀនថ្នាក់ទី១ នៅសាលាបឋមសិក្សា២ធ្នូ បានជិះកង់ទៅលេងនៅវាលស្រែ តាមជីតា ទៅឃ្វាលគោ នៅមាត់បឹងតាបែន ខណៈដែលកំពុងជិះកង់ទៅដល់បឹង ស្រាប់តែមានខ្យល់យ៉ាងខ្លាំងបោកបក់បណ្តាលឲ្យដាច់ធ្លាក់សំបុកឳម៉ាល់ប៉ុនល្អី ពីលើចុងត្នោត មកដីចំពីមុខកង់​ជនរងគ្រោះ ស្រាប់តែសត្វឳម៉ាល់ហើរចេញពីសំបុកមកព្រួតទិច សុសខ្លួនប្រមាណ ១០០មេ ភ្លាមៗ នាងក៏ផ្តួលកង់​រួចរត់ចេញ ហើយស្រែកហៅតាឲ្យជួយ។ លោកតាក៏រត់ទៅជួយអូសចេញចម្ងាយពីសំបុកឳម៉ាល់ប្រមាណជា៥០ម៉ែត្រ សត្វឳម៉ាល់ក៏លែងដេញ។

ប្រភពបន្តថា ពេលនោះក្មេងស្រីរងគ្រោះឈឺចុកចាប់យ៉ាងខ្លាំងក៏ប៉ុន្តែនៅមានស្មារតីរឹងមាំ  ជីតា ក៏នាំត្រឡប់មកផ្ទះ ដើរមកដល់ផ្ទះខ្លួនឯងហើយបានឲ្យឳពុកម្តាយដឹកនាងតាមម៉ូតូទៅមន្ទីរពេទ្យខេត្តស្វាយរៀង ដើម្បីសង្គ្រោះ។

ឪពុកម្តាយក្មេងស្រី បានរៀបរាប់ទាំងទឹកភ្នែកថា ពេលទៅដល់មន្ទីរពេទ្យខេត្តស្វាយរៀងគឺនៅវេលាម៉ោង៥និង០០​នាទីល្ងាច ក្រុមគ្រូពេទ្យ បានធ្វើតេស្តកូវីដ-១៩ (លទ្ធផល់អវិជ្ជមាន) ទើបពេទ្យឲ្យឳពុកបីកូន ទៅអគារកុមារ រួចដាក់សេរ៉ូមមួយកំប្លោក និងចាក់ថ្នាំ២ម្ជុល ក៏ទៅបាត់ រហូតដល់ម៉ោ៧ និង៣០នាទីយប់ មានលោកគ្រូពេទ្យម្នាក់​មកមើល ហើយនិយាយថា “កូននេះធ្ងន់ណាស់ហើយ បើមានលទ្ធភាពបញ្ជូនទៅមន្ទីរពេទ្យគន្ធបុប្ផាទៅៗ” ហើយក៏ទៅបាត់ក្រោយមកមានគ្រូពេទ្យក្មេងៗ ២នាក់មកមើល គាត់ក៏និយាយថា “បើគ្មានលទ្ធភាពព្យាបាលកូនខ្ញុំទេ ខ្ញុំសុំបញ្ជូនទៅភ្នំពេញ“? ខណៈនោះគ្រូពេទ្យសុំទុកតាមដានរយៈពេល១ម៉ោងទៀតសិន មិនអីទេចាំឲ្យកូន​បត់ជើងតូច(នោម)សិនក្រែងធូរ ក៏បន្តែកូនស្រីកាន់តែឈឺចុកចាប់ពេញខ្លួនប្រាណខ្លាំងឡើងៗ រហូតម៉ោង​៨និង១០នាទីយប់ ទើបបញ្ជូនបន្តទៅមន្ទីរពេទ្យគន្ធបុប្ឋាភ្នំពេញ តាមរយៈរថយន្តសាមុយឯកជន។

អ្នកស្រី ជាម្តាយ បានឲ្យដឹងដូច្នេះថា «ម្ចាស់រថយន្តយកតម្លៃ ១៨០ដុល្លារ ដឹកដល់មន្ទីរពេទ្យគន្ធបុប្ផាភ្នំពេញ  ដោយរថយន្តសាមុយ ឯកជននោះចាស់បើកយឺត រហូតដល់ម៉ោង១០និង៣០ យប់ទើបដល់មន្ទីរ ពេលគ្រូពេទ្យលើក​យកចុះពីររថយន្តក៏បានដាច់ខ្យល់ស្លាប់តែម្តង»។

ស្រ្តីជាម្តាយនិយាយទាំងអួលដើមករថា “អាណិតកូនស្រីខ្លោចចិត្ត និយាយរហូត ឲ្យគ្រូពេទ្យជួយ និយាយរហូតដាច់ខ្យល់​ស្លាប់“។

អាណាព្យាបាលក្មេងស្រីរងគ្រោះ សូមឱ្យគ្រូពេទ្យខេត្តស្វាយរៀង ទទួលខុសត្រូវចំពោះការស្លាប់របស់កូនស្រីគាត់ និងស្នើដល់លោកប្រធានមន្ទីរសុខាភិបាលខេត្ត រដ្ឋមន្ត្រីក្រសួងសុខាភិបាល អភិបាលខេត្តស្វាយរៀង ជួយចុះអធិការកិច្ច បញ្ហាគ្រូពេទ្យ មិនសូវយកចិត្តទុកដាក់ផ្តល់សេវា ថែទាំព្យាបាលអ្នកជំងឺ ដែលត្រូវសង្គ្រោះបន្ទាន់ ឈានដល់​ការបាត់បង់ជីវិត៕ ដោយ:ភក្ដី