អាមេរិក ឲ្យប្រទេសជុំវិញពិភពលោកបូមប្រេងបន្ថែម ទុកសម្រាប់ផ្គត់ផ្គង់

អនុរដ្ឋមន្ត្រីការបរទេសសហរដ្ឋអាមេរិកទទួលបន្ទុកផ្នែកកំណើនសេដ្ឋកិច្ច ថាមពល និងបរិស្ថានលោក Jose Fernandez បាននិយាយកាលពីថ្ងៃចន្ទថា សហរដ្ឋអាមេរិកកំពុងស្នើឲ្យប្រទេសជុំវិញពិភពលោកបូមប្រេងបន្ថែមទៀត ចំពេលមានការព្រួយបារម្ភអំពីការផ្គត់ផ្គង់ ។

លោក Fernandez បាននិយាយក្នុងអំឡុងកិច្ចប្រជុំមួយស្តីពីការព្រួយបារម្ភអំពីខ្សែសង្វាក់ផ្គត់ផ្គង់ដែលទាក់ទងនឹងជម្លោះនៅអ៊ុយក្រែន និងវិធានការជំងឺរាតត្បាតកូវីដ ១៩ ថា “ការពិតនៃបញ្ហាគឺថា យើងកំពុងស្នើសុំឲ្យប្រទេសនានាជុំវិញពិភពលោកបូមប្រេងបន្ថែមទៀត ក្នុងពេលតែមួយដែលយើងកំពុងផ្តោតលើអនាគតថាមពលស្អាត” ។

ទន្ទឹមនោះ បណ្តាប្រទេសនៅអឺរ៉ុបក៏កំពុងប្រឈមមុខនឹងវិបត្តិថាមពលដែលកើតឡើង ដោយសារតែអតិផរណា និងកង្វះការផ្គត់ផ្គង់ដែលទាក់ទងនឹងការដាក់ទណ្ឌកម្មលើថាមពលរុស្ស៊ី ។

ស្ថានភាពនេះបាននាំឲ្យមានការអំពាវនាវពីរដ្ឋមន្ត្រីហិរញ្ញវត្ថុអាល្លឺម៉ង់លោក Christian Lindner ឲ្យស្តារឡើងវិញនូវប្រតិបត្តិការនៃរោងចក្រថាមពលនុយក្លេអ៊ែរដែលត្រូវបានលុបចោលកាលពីឆ្នាំ ២០១១ ។

ដោយឡែកកាលពីថ្ងៃសុក្រ ប្រធានាធិបតីរុស្ស៊ីលោក វ្ល៉ាឌីមៀរ ពូទីន បាននិយាយថា វិបត្តិថាមពលនៅអឺរ៉ុបមិនបានចាប់ផ្តើមជាមួយនឹងប្រតិបត្តិការយោធាពិសេសរបស់ទីក្រុងមូស្គូនៅអ៊ុយក្រែន និងការដាក់ទណ្ឌកម្មជាបន្តបន្ទាប់នោះទេ ។ ផ្ទុយទៅវិញ វិបត្តិនេះបានចាប់ផ្តើម ដោយសារតែការអនុវត្តរបៀបវារៈ “បៃតង” ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ លោក Zelensky ឲ្យជម្រើស ២ ទៅទាហាន រុស្ស៊ី