ថ្មអណ្តែត ជាទីស័ក្ដិសិទ្ធិរបស់ពលរដ្ឋឃុំអណ្តូងទឹក តែអ្នកដឹងស្គាល់តិចតួច

ថ្មអណ្តែត ដែលស្ថិតនៅតាមដងព្រែកអណ្តូងទឹក ស្រុកបូទុមសាគរ ត្រូវបានគេចាត់ទុកថា ទីកន្លែងដ៏ស័ក្តិសិទ្ធិមួយសម្រាប់ការបន់ស្រន់របស់អ្នកឃុំអណ្តូងទឹក ដែលកម្រមានអ្នកស្គាល់ និងទៅដល់។

មុននឹងទៅដល់ថ្មអណ្តែត ត្រូវធ្វើដំណើរតាមទូកដោយផ្លូវទឹកហាក់បីដូចជាបត់បែនបន្តិចរយៈពេលកន្លះម៉ោង លុះទើបបានទៅដល់ថ្មអណ្តែត ហើយដោយមានអាស្រមលោកតាឥសីគង់លើថ្មនាកណ្តាលដងស្ទឹងទឹកថ្លាឈ្វេង។ ផ្លូវគោកក៏មានដែរ ប៉ុន្តែពិបាកធ្វើដំណើរចំណាយពេលវេលាយូរជាងផ្លូវទឹក។

អ្នកស្រី ហ៊ិន យ៉ាំ និងលោកយាយ ហាស តែម ជាពលរដ្ឋរស់នៅភូមិព្រែកតានង ក្បែរទីតាំងជំនឿលើថ្មអណ្តែត បានរៀបរាប់កាលពី១៤ ខែតុលា កន្លងទៅថា ពេលពួកគាត់ដឹងក្តី និងរស់នៅក្នុងភូមិ ភាពល្បីល្បាញជំនឿលើបារមីថ្មអណ្តែតកើតមានតាំងពីជំនាន់ជីតា ជីដូន របស់ពួកគាត់មកម្ល៉េះ។

ពលរដ្ឋវ័យចំណាស់ទាំង២រូបនេះបន្ថែមទៀតថា ថ្មអណ្តែតជាទីកន្លែងគោរពបូជាសក្ការៈយ៉ាងស័ក្តិសិទ្ធិខ្លាំងពូកែរបស់អ្នកស្រុកអ្នកភូមិ ដោយគេចាំបានថា ជំនាន់សម័យអណានិគមនិយមបារាំងមិនអាចធ្វើឆ្លងដងព្រែក ពិសេសថ្មអណ្តែតនេះបាននោះទេ ព្រោះតែឥទ្ធិពលបារមីថ្មអណ្តែតឃុំគ្រងការពារដែនដីគ្រាមានសង្រ្គាម។

បើតាមពលរដ្ឋម្ចាស់ស្រុកបញ្ជាក់ទៀតថា ហេតុអីបានជាគេហៅថ្មអណ្តែត ដោយសារដុំថ្មមួយដុំអណ្តែតមិនហូររសាត់ទៅណានោះទេ ខណៈសំគាំងខ្លួននៅលើផ្ទៃទឹក រីឯខាងក្រោមជាអន្លង់ទឹកដ៏ជ្រៅរាប់ម៉ែត្រ។ ជាជំនឿរបស់ពលរដ្ឋអាច​បែបន់អ្វីតែងសម្រេចក្តីប្រាថ្នា ប្រសិនយើងមានចិត្តបរិសុទ្ធគោរពទៅតាមពាក្យសម្តីសច្ចារចំពោះបារមីថ្មអណ្តែត។

ជាទម្លាប់របស់អ្នកភូមិព្រែកតានង រាល់ពេលថ្ងៃសិល៍ ពួកគាត់តែនាំកូនចៅទៅសែនព្រេងបែរបន់សុំសេចក្តីសុខសប្បាយ​តបតាមអ្វីដែលជីវភាពគ្រួសារនីមួយៗមានក្នុងនាមជាអ្នករស់នៅតំបន់ដាច់ស្រយាល គ្រាពួកគាត់មិនសូវមានពេលបានឡើងមកវត្តអារាមនៅទីរួមស្រុកបូទុមសាគរ។ ប្រសិនបើមាននរណាម្នាក់ប្រមាថម៉ាក់ងាយបារមីថ្មអណ្តែតនេះ នឹងធ្វើគ្រោះ​ថ្នាក់តាមរូបភាពផ្សេងៗគ្នា។

យោងតាមសៀវភៅប្រវត្តិ និងតំបន់សក្កានុពលទេសចរណ៍ខេត្តកោះកុង ដែលចងក្រងឡើងដោយមន្ទីរទេសចរណ៍ខេត្ត បង្ហាញថា ថ្មអណ្តែត ជាកន្លែងទីសក្ការៈបូជាមួយសម្រាប់អ្នកដំណើរគ្រប់រូបតាមផ្លូវទឹកពីឃុំអណ្តូងទឹក ទៅឃុំជីផាត ស្រុកថ្មបាំង ដែលមានទឹកស្ទឹងបារមីអ្នកថែរក្សា។ បើគ្មានអ្នកណាម្នាក់សែនអាហារដល់ព្រលឹងនោះទេ អ្នកថែរក្សា​ថ្មអណ្តែត នឹងខឹងសម្បារហើយការធ្វើដំណើរនោះនឹងគ្មានសេចក្តីសុខឡើយ។

លោក ក្រូច បូរីសីហា អភិបាលស្រុកបូទុមសាគរ នៅរសៀលថ្ងៃទី១៧ ខែតុលា ឆ្នាំ២០២២ ក៏ទទួលស្គាល់ពីជំនឿ​ថ្មអណ្តែត ដែលមរតករបស់ខ្មែរបុរេប្រវត្តិព្រឹក្សាព្រៃបារមីបង់បថ។ ដោយលោកមានបំណងពង្រីកការផ្សព្វផ្សាយព័ត៌មានឱ្យកាន់តែទូលំទូលាយដល់ប្រជាពលរដ្ឋ ព្រមទាំងអ្នកទេសចរដែលមិនទាន់ដឹង ឬស្គាល់អាចអញ្ជើញចូលរួមគោរពបូជាធ្វើបុណ្យទានតាមជំនឿរៀងៗខ្លួន។

លោកអភិបាលស្រុកបូទុមសាគរ លាន់មាត់ដែរពីបារមីលោកឥសីថ្មអណ្តែត ដោយឃើញថា សូម្បីតែពលរដ្ឋធ្វើដំណើរតាមទូកដែលឆ្លងកាត់ ឬរកផលនេសាទក្បែរតំបន់ថ្មអណ្តែតក៏ពួកគាត់ដោះមួក និងលើកដៃប្រណមសុំសេចក្តីសុខចំពោះការធ្វើដំណើរ។ ដូច្នេះលោកគ្រោងរៀបចំជាសហគមន៍ទូកដឹកជញ្ចូនភ្ញៀវទេសចរទៅកាន់ទីនោះ ដើម្បីបង្កើនភាពទាក់​ទាញ និងផ្តល់ឱកាសការងាររកចំណូលជូនប្រជាពលរដ្ឋមូលដ្ឋានលើវិស័យសេវាទេសចរណ៍ផងដែរ ខណៈស្រុកបុទុមសាគរ និងខេត្តកោះកុង មានសក្កានុពលផ្នែកអេកូទេសចរធម្មជាតិ៕

អត្តបទ៖ សិរីវឌ្ឍនៈ