លោក ពូទីន អនុញ្ញាតឲ្យកែនអតីតអ្នកទោស យកទៅប្រយុទ្ធនៅ អ៊ុយក្រែន

យោងតាមការចុះផ្សាយរបស់ BBC, ឃាតក​ដែល​ត្រូវ​បាន​កាត់ទោស ​និង​ឈ្មួញ​គ្រឿងញៀន​ដែល​ទើប​ចេញពី​ពន្ធនាគារ​ក្នុង​ប្រទេស​រុ​ស្ស៊ីនាពេលថ្មីៗនេះ ត្រូវ​ប្រឈម​នឹង​ការកែនឲ្យទៅ​ប្រយុទ្ធ​នៅប្រទេស​អ៊ុយ​ក្រែ​ន ​ក្រោម​ការ​កែប្រែ​ច្បាប់ថ្មី​។

លោកប្រធានាធិបតី វ្ល៉ាឌីមៀរ ពូទីន បានធ្វើវិសោធនកម្មច្បាប់ ស្តីពីការកោះហៅទាហានបម្រុងដោយក្នុងនោះរួមបញ្ចូលទាំងបុរសដែលត្រូវបានកាត់ទោសពីបទឧក្រិដ្ឋកម្មធ្ងន់ធ្ងរ ទើបចាកចេញពីពន្ធនាគារនាពេលថ្មីៗផងដែរ។

ទោះបីជាយ៉ាងណាក៏ដោយ អតីតអ្នកទោសដែលត្រូវបានកាត់ទោសពីបទឧក្រិដ្ឋកម្មផ្លូវភេទប្រឆាំងនឹងកុមារ ឬអំពើភេរវកម្មនៅតែត្រូវបានដកចេញពីលក្ខខណ្ឌនេះ។

លោក ពូទីន ប្រកាសថា ទាហានបម្រុងប្រហែល ៤៩០០០នាក់ ក្នុងចំណោម ៣០០ ០០០នាក់ដែលកោះហៅចាប់តាំងពីខែកញ្ញាមក គឺត្រូវបានដាក់ពង្រាយទៅកាន់អង្គភាពដែលបម្រើនៅអ៊ុយក្រែនរួចទៅហើយ។

លោកបានប្រាប់ក្រុមយុវជន និងស្ត្រី មកពីចលនា Popular Front គ្រប់គ្រងដោយវិមានក្រឹមឡាំង ថា “អ្នកស្ម័គ្រចិត្តប្រហែល ៥០ ០០០នាក់ក៏បានចុះឈ្មោះផងដែរ”។

អ្នកជំនាញខាងយោធានៅលោកខាងលិច និងអ៊ុយក្រែន និយាយថា ការសម្រេចចិត្តរបស់លោក ពូទីន ក្នុងការកោះហៅទាហានបម្រុង បានបង្ហាញថា ទាហានរុស្ស៊ីរងបរាជ័យយ៉ាងធ្ងន់ធ្ងរនៅលើសមរភូមិក្នុងប្រទេសអ៊ុយក្រែន។

ចាប់តាំងពីរុស្ស៊ីវាយលុកអ៊ុយក្រែននៅថ្ងៃទី២៤ខែកុម្ភៈមក ជនស៊ីវិល និងអ្នកប្រយុទ្ធរាប់ពាន់នាក់ត្រូវបានសម្លាប់ ឬរងរបួស ហើយទីក្រុង និងទីប្រជុំជននានា ត្រូវបានបំផ្លាញនៅក្នុងការប្រយុទ្ធ៕

ប្រែសម្រួល៖ Vann Vann

ប្រភព៖ BBC

ចុចអាន៖ រុស្ស៊ីព្រមានថា អង់គ្លេស លូកដៃជ្រៅពេកហើយ ក្នុងសង្គ្រាមអ៊ុយក្រែន