ត្រីរាជ ពីរក្បាលមានទម្ងន់ប្រហែល៤៥ ទៅ៥០​គីឡូក្រាម ត្រូវបានលែងចូលក្នុងបឹងទន្លេសាប និងទន្លេមេគង្គ

ត្រីរាជ ដែលកំពុងរងគ្រោះជិតផុតពូជ រួមជាមួយត្រីជិតផុតពូជ និងត្រីសំខាន់ៗ ចំពោះអេកូឡូស៊ី រាប់ពាន់ក្បាលផ្សេងទៀត បានលែងចូលទៅក្នុងធម្មជាតិវិញ នៅព្រឹកថ្ងៃទី១៣ ខែមករា នេះ នៅចំណុចប្រសព្វទន្លេមេគង្គ និងទន្លេសាប ក្រោមវត្តមានឯកឧត្តម ហាស់ សារ៉េត រដ្ឋលេខាធិការនៃ ក្រសួងកសិកម្ម រុក្ខាប្រមាញ់ និងនេសាទ។

អ្នកស្រី ចេង មួយឆេង ជាកសិករចិញ្ចឹមត្រីរាជដែលបានយកទៅលែងបានប្រាប់ថា ត្រីរាជពីរក្បាលនេះមានទម្ងន់​ប្រហែល​៤៥ ទៅ ៥០គីឡូក្រាម និងមានប្រវែងជាង១.៦ម៉ែត្រ។

ក្នុងចំណោមត្រីដែលត្រូវលែងរួមមាន ត្រីគល់រាំង ដែលជាប្រភេទត្រីរងគ្រោះជិតផុតពូជ និងត្រូវបានគេស្គាល់ថា ជាមច្ឆានិម្មិតរូបនៃព្រះរាជាណាចក្រកម្ពុជា និងត្រីប្រាធំ ជាត្រីធ្វើចរាចរផ្លាស់ទីឆ្ងាយបំផុតមួយ ហើយក៏ជាអាហារសំខាន់ក្នុងតំបន់ ប៉ុន្តែចំនួនរបស់ពួកវាមានការថយចុះយ៉ាងខ្លាំង និងបច្ចុប្បន្ននេះត្រូវគេចាត់ទុកថា ជាប្រភេទត្រីរងគ្រោះជិតផុតពូជ។

ឯកឧត្តម ហាស់ សារ៉េត បានលើកឡើងថា «យើងសូមលើកទឹកចិត្តដល់គោលនយោបាយដែលអាចឱ្យធនធានដ៏សំខាន់​នេះ រីកលូតលាស់នៅក្នុងធម្មជាតិ»។

ត្រីរាជ ជាត្រីទឹកសាបដ៏ធំបំផុតរបស់ពិភពលោក។ វាអាចលូតលាស់ដល់ទំហំអតិបរមាប្រវែង ៣ម៉ែត្រ និងមានទម្ងន់ ៣០០គីឡូក្រាម ហើយប្រភេទនេះត្រូវបានរកឃើញតែនៅក្នុងទន្លេមេគង្គប៉ុណ្ណោះ។ នៅក្នុងប្រទេសកម្ពុជាឯណេះវិញ គេនៅតែចាប់បានត្រីរាជចំនួនតិចតួច ដោយដាយត្រីនៅតាមដងទន្លេសាប ក៏ដូចជាពីទន្លេមេគង្គកម្ពុជាផងដែរ។

ទន្លេធំៗដែលហូរដោយគ្មានរនាំងរបស់កម្ពុជា ជាមួយនឹងតំបន់ទំនាបលិចទឹកទាំងមូលជា «ជីពចរ» ដែលទ្រទ្រង់ជីវិត គឺរួមចំណែកយ៉ាងសំខាន់ក្នុងការរក្សាបាននូវជីវៈចម្រុះ និងផលនេសាទដ៏ច្រើនសន្ធឹកសន្ធាប់របស់អាងទន្លេ។ ការអភិរក្សត្រីរាជ ដែលជាប្រភេទត្រីសំខាន់នៃតំបន់មេគង្គ នឹងជួយការពារជីវភាពរស់នៅរបស់ប្រជាជនរាប់លាននាក់ ដែលពឹងផ្អែក​លើផលនេសាទ ប្រកបដោយផលិតភាពល្អនៅក្នុងអាងទន្លេ។

គម្រោងអច្ឆរិយភាពនៃទន្លេមេគង្គ ដែលគាំទ្រមូលនិធិដោយ USAID ធ្វើការជាមួយរដ្ឋាភិបាល អង្គការក្រៅរដ្ឋាភិបាល និងសហគមន៍ដៃគូ ក្នុងគោលបំណងបង្កើនចំណេះដឹង អំពីសារៈសំខាន់នៃទន្លេមេគង្គ និងលើកទឹកចិត្តដល់ការប្រើប្រាស់ធនធានជលផលរបស់កម្ពុជាប្រកបដោយនិរន្តរភាព៕