រុស្ស៊ី បញ្ជាក់ថា មិនចាំបាច់ខ្ចី ឬឱនក្បាលអង្វរសុំលុយពីបរទេសឡើយ

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បាននិយាយនៅក្នុងសុន្ទរកថាទៅកាន់សភាសហព័ន្ធកាលពីថ្ងៃអង្គារថា ប្រទេសរុស្ស៊ីមិនចាំបាច់ខ្ចីប្រាក់ ឬអង្វរសុំមូលនិធិពីបរទេសនោះទេ ដោយសារតែរុស្ស៊ីមានប្រព័ន្ធធនាគារដ៏រឹងមាំ និងមានតុល្យភាព ។

លោក ពូទីន បានលើកឡើងថា “ប្រភពហិរញ្ញវត្ថុ និងការវិនិយោគថ្មី គឺជាបញ្ហាសំខាន់បំផុតនៅក្នុងរបៀបវារៈសម្រាប់ការអភិវឌ្ឍកំណើនសេដ្ឋកិច្ច ។ ដូច្នេះយើងសូមអរគុណចំពោះសមតុល្យនៃការទូទាត់ដ៏រឹងមាំរបស់ធនាគាររុស្ស៊ី” ។

លោកប្រធានាធិបតីបញ្ជាក់ថា “យោងតាមរបាយការណ៍នេះ រុស្ស៊ីមិនចាំបាច់ខ្ចីប្រាក់ ឬឱនក្បាលអង្វរសុំលុយពីបរទេសនោះទេ ហើយ​បន្ទាប់​មកយើងនឹង​មាន​ការ​ពិភាក្សា​គ្នាអំពីចំនួន និងលក្ខខណ្ឌដែលត្រូវផ្ដល់ឲ្យធនាគារជាតិរបស់យើងវិញផងដែរ” ។

លោក ពូទីន បានបន្ថែមថា ធនាគាររុស្ស៊ីកំពុងដំណើរការបានយ៉ាងល្អជាលំដាប់ ហើយបរិមាណកម្ចីធនាគារដល់វិស័យសាជីវកម្មក្នុងឆ្នាំ ២០២២ បានកើនឡើង ១៤ ភាគរយ បើធៀបនឹងឆ្នាំ ២០២១ ។

គួរបញ្ជាក់ថា ការអះអាងរបស់លោក ពូទីន បានកើតឡើង អំឡុងពេលលោកថ្លែងសុន្ទរកថាទៅកាន់សភាសហព័ន្ធរុស្ស៊ីនៅទីក្រុងមូស្គូកាលពីថ្ងៃទី២១ ខែកុម្ភៈ ឆ្នាំ២០២៣ ពោលត្រឹមតែរយៈពេល ៣ ថ្ងៃប៉ុណ្ណោះ មុនខួបគម្រប់ ១ ឆ្នាំនៃប្រតិបត្តិការសឹករបស់រុស្ស៊ីលើអ៊ុយក្រែន ខណៈលោកក៏ផ្ដោតលើវិបត្តិសន្តិសុខពិភពលោកផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ លោក ពូទីន ថា រុស្ស៊ី នឹងកាន់តែខ្លាំងជាងមុន បើបង្រួបបង្រួមជាមួយតំបន់ Donbass