រដ្ឋបាលខេត្តកំពតតុបតែងកែលម្អសោភ័ណភាពក្រុងរួចរាល់ហើយត្រៀមទទួលទេសចរថ្ងៃចូលឆ្នាំថ្មី

អាជ្ញាធរខេត្តកំពត បានររៀបចំតុបតែងលម្អសោភ័ណភាពនៅតាមទីធ្លាសាធារណៈក្នុងក្រុងកំពតរួចជាស្រេច ជាពិសេសនៅតាមរមណីយដ្ឋាននៅក្នុងភូមិសាស្រ្តខេត្តកំពត ដើម្បីត្រៀមរៀបចំសង្ក្រាន្តអបអរសាទរ​ពិធីបុណ្យចូលឆ្នាំថ្មីប្រពៃណីជាតិខ្មែរ និងទទួលភ្ញៀវទេស​ចរ។

យោងតាមលោកនាយករដ្ឋបាលខេត្តកំពតបានឱ្យដឹងថា នៅថ្ងៃទី១១ ខែមេសា ឆ្នាំ២០២៣នេះថា ការងាររៀបចំ​តុបតែងកែលម្អអំពូលភ្លើងនៅតាមទីធ្លាសាធារណៈនៅក្នុងក្រុងកំពត និងតាមរមណីយ​ដ្ឋានឱ្យមានសោភ័ណភាព បានសម្រេចរួចរាល់។

ជាមួយគ្នានេះ អាជ្ញាធរខេត្តកំពត ក៏បានអំពាវនាវដល់ប្រជាពលរដ្ឋ និងភ្ញៀវទេសចរជាតិ និងភ្ញៀវទេសចរអន្តរជាតិ មកពីគ្រប់មជ្ឈដ្ឋាននានា អាចមកចូលរួមលេងកម្សាន្តនៅក្នុងសង្ក្រាន្ដខេត្តកំពត ដែលធ្វើឡើងនៅតាម​រមណីយដ្ឋាន​ភូមិសាស្ត្រផ្សេងៗ រយៈពេល៣ថ្ងៃ គឺចាប់ពីថ្ងៃទី១៤រហូតដល់ថ្ងៃទី១៦ ខែមេសា ឆ្នាំ២០២៣ខាងមុខ។

បើតាមអាជ្ញាធរ សម្រាប់សង្ក្រាន្ដនេះ នឹងមានកម្មវិធីបែបប្រពៃណីសាសនា កម្មវិធីកម្សាន្ដសប្បាយៗជាច្រើន ដូចជា ពិធីពូនភ្នំខ្សាច់ ពិធីបុណ្យស្រង់ព្រះ ការសម្ដែងសិល្បៈ បុរាណផ្សេងៗ ការលេងល្បែងប្រជាប្រិយជាតិ (ទាញព្រ័ត្រ បោះអង្គញ់ វាយក្អម ចោលឈូង លាក់កន្សែង ចាប់កូនខ្លែង ដណ្តើមស្លឹកឈើ និងល្បែងប្រជាប្រិយជាតិផ្សេងទៀត) ការប្រគំតន្ត្រីបុរាណ-សម័យ ការរាំលេងកម្សាន្ត និងមានការដាក់តាំងបង្ហាញគំនូរបុរាណខ្មែរ១០មុខ វប្បធម៌ខ្មែររយៈ​ពេល៣ថ្ងៃ ក្នុងពិធីបុណ្យចូលឆ្នាំថ្មីប្រពៃណីជាតិខ្មែរនាថ្ងៃខាងមុខ។

អត្ថបទ៖ សឹង រ៉ាត់