ប៉ូលិសបង្ហាញតម្រុយដែលជនសង្ស័យបន្សល់ទុក ក្រោយហេតុការណ៍បំផ្ទុះនៅកន្លែងសុន្ទរកថានាយករដ្ឋមន្ត្រីជប៉ុន

ក្រោយពេលប៉ូលិសចាប់ខ្លួនជនសង្ស័យ Kimura Ryuji អាយុ ២៤ឆ្នាំ លើករណី​បំផ្ទុះគ្រាប់បែក នៅកន្លែងសុន្ទរកថានាយករដ្ឋមន្ត្រីជប៉ុន Fumio Kishida មន្ត្រីស៊ើបបអង្កេតបានទម្លាយពីតម្រុយមួយចំនួនដែលជនសង្ស័យបានបន្សល់ទុក ខណៈសាក្សីនៅកន្លែងកើតហេតុក៏បានបំភ្លឺខ្លះៗដែរ។

មន្ត្រី​ស៊ើបអង្កេត​​ប្រាប់សារព័ត៌មាន NHK ថា ជនសង្ស័យ​មាន​វត្ថុរាង​ស៊ីឡាំងទ្រវែងចំនួន​ពីរ ដែល​មួយត្រូវបានបំ​ផ្ទុះ ចំណែក​មួយទៀត​ត្រូវ​សមត្ថកិច្ច​ចាប់​យក​បាន​។ មន្ត្រី​ស៊ើបអង្កេតបន្តថា វត្ថុរាងស៊ីឡាំងដែលបានបំផ្ទុះនៅកន្លែងនៃសុន្ទរកថារបស់នាយករដ្ឋមន្ត្រី Kishida ទំនងជាច្នៃពីដែក និងដោយដៃផ្ទាល់។

គ្រឿងផ្ទុះប្រភេទនេះ ធ្វើឡើងដោយការផ្សាភ្ជាប់ចុងបំពង់នីមួយៗ ដែលខ្ចប់ដោយរំសេវ និងបំពាក់ដោយឧបករណ៍បំផ្ទុះ។ គ្រាប់បែកបែបនេះនឹងផ្ទុះនៅពេលដែលសម្ពាធខ្យល់នៅខាងក្នុងបំពង់ឈានដល់កម្រិតជាក់លាក់មួយ បន្ទាប់ពីម្សៅកាំភ្លើងឆាបឆេះ។

ប៉ូលិស​ជឿថា ជនសង្ស័យ​មាន​គ្រាប់បែក​ដែល​នៅ​សេសសល់ នៅពេល​ចាប់ខ្លួន ប៉ុន្តែគ្រាប់ទាំងនោះ​មិន​មាន​ការ​ផ្ទុះ​ទេ ហើយ​មន្ត្រីជំនាញគ្រោង​នឹង​វិភាគឱ្យបាន​លម្អិតបន្ថែមទៀត។

ដោយឡែករបាយការណ៍​សាក្សី​បាន​ប្រាប់​ថា មុនពេលមានការបំផ្ទុះកើតឡើង គេឃើញមាន​ពន្លឺ​លើ​វត្ថុ​មួយចាំងផ្លេកៗ ហើយមិនបានប៉ុន្មាននាទីផង វាក៏មានការផ្ទុះកើតឡើងតែម្ដង៕

ប្រែសម្រួល៖ សន្យា

ប្រភព៖ NHK

ចុចអាន៖ ករណីបំផ្ទុះគ្រាប់បែកនៅកន្លែងសុន្ទរកថានាយករដ្ឋមន្ត្រីជប៉ុន កាលពីម្សិលមិញ ប៉ូលិសចាប់បានបុរសវ័យ ២៤ឆ្នាំម្នាក់

ចុចអាន៖ Breaking News! មានការផ្ទុះគ្រាប់បែកនៅកន្លែងជួបជុំរបស់នាយករដ្ឋមន្ត្រីជប៉ុន តែគ្មានគ្រោះថ្នាក់ដល់លោកទេ