តើថ្នាក់ដឹកនាំគណបក្សប្រជាជនកម្ពុជា ឈរឈ្មោះបោះឆ្នោតនៅខេត្តណាខ្លះ?

នៅសល់ប្រមាណ ១សប្ដាហ៍ទៀតប៉ុណ្ណោះ ការទទួលពាក្យសុំចុះបញ្ជីគណបក្សនយោបាយឈរឈ្មោះ​បោះឆ្នោត និងបញ្ជីបេក្ខជនឈរឈ្មោះបោះឆ្នោត សម្រាប់ការបោះឆ្នោតជ្រើសតាំង តំណាងរាស្ត្រ នីតិកាលទី ៧ នឹងត្រូវចាប់ផ្ដើមហើយ។

តាមសេចក្ដីជូនដំណឹងរបស់ គ.ជ.ប បានឲ្យដឹងថា ការទទួលពាក្យសុំចុះបញ្ជីគណបក្សនយោបាយឈរឈ្មោះបោះ ឆ្នោត និងបញ្ជីបេក្ខជនឈរឈ្មោះបោះឆ្នោត មានរយៈពេល ១៥ថ្ងៃ គឺចាប់ផ្ដើមពីថ្ងៃទី ២៤ ខែមេសា ឆ្នាំ ២០២៣ និងបញ្ចប់នៅថ្ងៃទី ៨ ខែឧសភា ឆ្នាំ ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សុខ ឥសាន អ្នកនាំពាក្យគណបក្សប្រជាជនកម្ពុជា មានប្រសាសន៍ប្រាប់កម្ពុជាថ្មី កាលពីថ្ងៃទី ១១ ខែមេសាថា គណបក្សប្រជាជនកម្ពុជា បានរៀបចំឯកសារគ្រប់គ្រាន់ហើយ សម្រាប់ការចុះបញ្ជីគណបក្សឈរឈ្មោះបោះឆ្នោត និងបេក្ខជនឈរឈ្មោះបោះឆ្នោត។

លោកបានបញ្ជាក់បន្ថែមថា គណបក្សប្រជាជនកម្ពុជា នឹងដាក់បេក្ខជនឈរឈ្មោះបោះឆ្នោតនៅគ្រប់ ២៥រាជធានី-ខេត្ត តែម្ដង ដោយលោកឲ្យដឹងបែបនេះថា «យើងដាក់ដូចពីលើកមុនៗដែរ យើងដាក់គ្រប់មណ្ឌលបោះឆ្នោតទាំងអស់»។

លោក សុខ ឥសាន ក៏បានឲ្យដឹងអំពីមណ្ឌលដែលថ្នាក់ដឹកនាំគណបក្សប្រជាជនកម្ពុជា ឈរឈ្មោះបោះឆ្នោត ដូចខាងក្រោម៖

-សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា ឈរឈ្មោះបោះឆ្នោតនៅមណ្ឌលខេត្តកណ្ដាល។

-សម្តេចអគ្គមហាពញាចក្រី ហេង សំរិន ប្រធានកិត្តិយសគណបក្សប្រជាជនកម្ពុជា ឈរឈ្មោះបោះឆ្នោតនៅមណ្ឌលខេត្តត្បូងឃ្មុំ។

-សម្ដេចក្រឡាហោម ស ខេង អនុប្រធានគណបក្សប្រជាជនកម្ពុជា ឈរឈ្មោះបោះឆ្នោតនៅមណ្ឌលខេត្តបាត់ដំបង។

-សម្តេចពិជ័យសេនា ទៀ បាញ់ អនុប្រធានគណបក្សប្រជាជនកម្ពុជា ឈរឈ្មោះបោះឆ្នោតនៅមណ្ឌលខេត្តសៀមរាប។

-សម្តេចកិត្តិសង្គហបណ្ឌិត​ ម៉ែន​ សំអន​ អនុប្រធានគណបក្សប្រជាជនកម្ពុជា ឈរឈ្មោះបោះឆ្នោតនៅមណ្ឌលខេត្តស្វាយរៀង។

សូមជម្រាបថា ការបោះឆ្នោតជ្រើសតាំង តំណាងរាស្រ្ដ នីតិកាលទី ៧ នឹងប្រព្រឹត្តទៅនៅថ្ងៃទី ២៣ ខែកក្កដា ឆ្នាំ ២០ ២៣ខាងមុខ ហើយគណបក្សនយោបាយទាំងអស់ ដែលបានចុះបញ្ជីត្រឹមត្រូវនៅក្រសួងមហាផ្ទៃ មានបំណងសុំចុះបញ្ជីគណបក្សឈរឈ្មោះបោះឆ្នោត និងបញ្ជីបេក្ខជនឈរឈ្មោះបោះឆ្នោត អាចចុះឈ្មោះពីថ្ងៃទី ២៤ ខែមេសា ដល់ថ្ងៃទី ៨ ខែឧសភា ឆ្នាំ ២០២៣៕