ឯកឧត្តម ឌី វិជ្ជា ណែនាំក្រុមការងារគណបក្សចុះមូលដ្ឋានក្រុងស្វាយរៀង ខិតខំបំពេញភារកិច្ចឱ្យកាន់តែសកម្ម ដើម្បីឆ្លើយតបតម្រូវការពលរដ្ឋ

ឯកឧត្តម​ ឌី​ វិជ្ជា​ សមាជិក​គណៈ​កម្មាធិការ​កណ្ដាល​ ជាប្រធានក្រុមការងារគណបក្សចុះមូលដ្ឋានក្រុងស្វាយរៀង​ បានដាក់ចេញទិសដៅឆ្នាំ២០២៦ ដោយណែនាំដល់សមាជិក សមាជិកាទាំងអស់ ត្រូវបន្តពង្រឹងសាមគ្គីភាពផ្ទៃក្នុង និងខិតខំបំពេញភារកិច្ចឱ្យកាន់តែសកម្មថែមទៀត ដើម្បីឆ្លើយតបទៅនឹងសេចក្តីត្រូវការរបស់ប្រជាពលរដ្ឋក្នុងក្រុងស្វាយរៀង។

ការណែនាំនេះ ធ្វើឡើងនាថ្ងៃសៅរ៍ ទី៧ ខែកុម្ភៈ ក្នុងឱកាស ឯកឧត្តម​ ឌី​ វិជ្ជា បានបើកកិច្ចប្រជុំបូកសរុបលទ្ធផលនៃការអនុវត្តការងារ របស់ក្រុមការងារគណបក្សចុះមូលដ្ឋានក្រុងស្វាយរៀង ប្រចាំឆ្នាំ២០២៥ និងទិសដៅភារកិច្ច ឆ្នាំ២០២៦។

ក្នុងអង្គប្រជុំបានវាយតម្លៃខ្ពស់ចំពោះសមិទ្ធផល ឆ្នាំ២០២៥ ដែលក្រុមការងារសម្រេចបានក្នុងរយៈពេលពេញមួយឆ្នាំកន្លងទៅ ជាពិសេស ការបម្រើសេវាសាធារណៈ ការចុះជាប់ជាមួយប្រជាពលរដ្ឋនៅតាមមូលដ្ឋាន និងការដោះស្រាយបញ្ហាប្រឈមនានាបានទាន់ពេលវេលា។

បន្ថែមពីការដាក់ចេញទិសដៅឆ្នាំ២០២៦ ឯកឧត្តម ឌី វិជ្ជា ក៏បានសង្កត់ធ្ងន់លើការពង្រឹងរចនាសម្ព័ន្ធរបស់បក្ស ដោយបន្តកសាងអំពើល្អ និងការរក្សាជំនឿចិត្តរបស់ប្រជាជនមកលើការដឹកនាំរបស់គណបក្សប្រជាជនកម្ពុជា។

កិច្ចប្រជុំនេះបានប្រព្រឹត្តទៅក្នុងបរិយាកាសស្និទ្ធស្នាល និងស្មារតីទទួលខុសត្រូវខ្ពស់ ដោយមានការអញ្ជើញចូលរួមពីសំណាក់អនុប្រធានក្រុមការងារ សមាជិកក្រុមការងារក្រុង សង្កាត់ និងផ្នែកដែលពាក់ព័ន្ធជាច្រើនរូបទៀត៕

ដោយ៖ភក្ដី