ព័ត៌មានជាតិ

ក្រសួង ក្រើនរំលឹកឲ្យគ្រឹះស្ថានមធ្យមសិក្សាចំណេះទូទៅ ជ្រើសរើសសិស្សពូកែ ដើម្បីត្រៀមប្រឡងថ្នាក់ជាតិ នៅខែមិថុនាខាងមុខ

បានផុស

៣ years មុន

នៅ

ថ្ងៃពុធ ១៩ មេសា ២០២៣

ដោយ

ក្រសួងអប់រំ យុវជន និងកីឡា បានណែនាំ និងក្រើនរំលឹកដល់គ្រឹះស្ថានមធ្យមសិក្សាចំណេះទូទៅ និងឯកជនប្រឡងជ្រើសរើសសិស្សពូកែប្រចាំរាជធានី ខេត្ត របស់ខ្លួន ដើម្បីត្រៀមចូលរួមប្រឡងសិស្សពូកែទូទាំងប្រទេស ដែលនឹងប្រព្រឹត្តិទៅនៅខែមិថុនា ឆ្នាំ ២០២៣ ខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងអប់រំ បានណែនាំដល់មន្ទីរអប់រំ យុវជន និងកីឡា រាជធានី ខេត្ត ត្រូវម្ចាស់ការរៀបចំការប្រឡងជ្រើសរើសសិស្សពូកែប្រចាំរាជធានី ខេត្ត ផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា ថ្នាក់ទី ៩ និងថ្នាក់ទី ១២ ដែលនឹងប្រព្រឹត្តទៅនៅក្នុងសប្ដាហ៍ទី ១ ខែមេសា ដើម្បីដណ្ដើមជ័យលាភីថ្នាក់រាជធានី ខេត្ត តាមមុខវិជ្ជា តាមកម្រិតថ្នាក់ តាមចំនួនកំណត់ ក្នុងតារាងបែងចែកជូនភ្ជាប់មកជាមួយនេះ រួចបញ្ជូនបេក្ខភាពមកចូលរួមប្រឡងជ្រើសរើសសិស្សពូកែទូទាំងប្រទេស។

ជាមួយគ្នានេះដែរ មន្ទីរអប់រំ រាជធានី ខេត្ត ត្រូវបែងចែកចំនួនបេក្ខជនចូលរួមប្រឡងជ្រើសរើសសិស្សពូកែ ប្រចាំរាជធានី ខេត្ត ទៅតាមគ្រឹះស្ថានមធ្យមសិក្សាចំណេះទូទៅសាធារណៈ និងឯកជន តាមសមាមាត្រចំនួនសិស្សជាក់ស្ដែង តាមមុខវិជ្ជា តាមកម្រិតថ្នាក់។ ចំពោះគ្រឹះស្ថានមធ្យមសិក្សាចំណេះទូទៅឯកជនដែលមាន សិស្សតិចជាង ១០០ នាក់ ត្រូវផ្ដល់ចំនួនបេក្ខជនយ៉ាងតិច ០១ នាក់ ក្នុងមួយមុខវិជ្ជា ក្នុងមួយកម្រិតថ្នាក់ ប៉ុន្តែករណីនេះ គ្រឹះស្ថានមធ្យមសិក្សាចំណេះទូទៅឯកជននោះ ត្រូវបង់ថវិកាចំនួន ៤ ម៉ឺនរៀល ក្នុងបេក្ខជន ០១ នាក់ ជូនមន្ទីរអប់រំ យុវជន និងកីឡា រាជធានី ខេត្ត ដើម្បីរៀបចំការប្រឡង។

ក្រសួង បានបន្តថា ប្រធានវិញ្ញាសាប្រឡងជ្រើសរើសសិស្សពូកែប្រចាំរាជធានី ខេត្ត ជាសមត្ថកិច្ចរបស់មន្ទីរអប់រំ យុវជន និង កីឡារាជធានី ខេត្តសាមី គ្រឹះស្ថានមធ្យមសិក្សាសាធារណៈ ត្រូវផ្ញើសំណេរប្រធានវិញ្ញាសា និងអត្រាកំណែ សម្រាប់ការប្រឡងជ្រើសរើសសិស្សពូកែប្រចាំរាជធានី ខេត្ត មុខវិជ្ជាអក្សរសិល្ប៍ខ្មែរ គណិតវិទ្យា រូបវិទ្យា ដែលមានរយៈពេល ៣ ម៉ោង និងវប្បធម៌ទូទៅ មានរយៈពេល ២ ម៉ោង ថ្នាក់ទី ៩ និងថ្នាក់ទី ១២ មកមន្ទីរអប់រំ យុវជន និងកីឡារាជធានី ខេត្ត ដើម្បីធ្វើជាមូលដ្ឋានសម្រាប់រៀបចំប្រធានវិញ្ញាសា។

គួរបញ្ជាក់ថា ការប្រឡងជ្រើសរើសសិស្សពូកែទូទាំងប្រទេសនៅឆ្នាំនេះ នឹងប្រព្រឹត្តិទៅនៅវិទ្យាល័យនេតយ៉ង់ ខេត្តបាត់ដំបង នៅថ្ងៃទី ១២ ខែមិថុនា ឆ្នាំ ២០២៣ ដើម្បីពង្រឹងគុណភាពអប់រំ និងអភិវឌ្ឍន៍ធនធានមនុស្សប្រកបដោយសីលធម៌ និងចំណេះដឹងខ្ពស់៕

អត្ថបទ ៖ សំអឿន

Related Topics:ក្រសួងអប់រំ យុវជន និងកីឡា