Breaking News! ទីបំផុត បំណែកយានជ្រមុជទឹក Titan ត្រូវបានស្រង់ឡើង​លើគោក (មានវីដេអូ)

ទីបំផុតបំណែកពីយានជ្រមុជទឹក Titan ត្រូវបានស្រង់ឡើងមកលើគោកហើយ បន្ទាប់ពីវាបានផ្ទុះនៅបាតសមុទ្រអាត្លង់ទិកកាលពីជិត ២ សប្ដាហ៍មុន ។

រូបភាពជាច្រើនបង្ហាញពីបំណែកនៃកម្ទេចកម្ទីដែកធំៗពណ៌សរបស់នាវាជ្រមុជទឹក Titan និងគ្របដោយក្រណាត់ត្រូវបានស្ទូចយកចេញពីកប៉ាល់មេ Horizon Arctic នៅកំពង់ផែឆ្មាំឆ្នេរសមុទ្រកាណាដាក្នុងទីក្រុង St. John’s រដ្ឋ Newfoundland ។

ប្រតិបត្តិការស្វែងរក និងជួយសង្គ្រោះលើយានជ្រមុជទឹក Titan បានចាប់ផ្តើមកាលពីថ្ងៃទី១៨ ខែមិថុនា បន្ទាប់ពីយានមួយនេះបានបាត់បង់ទំនាក់ទំនងជាមួយកប៉ាល់មេ Horizon Arctic ប៉ុន្តែរយៈពេល ៥ ថ្ងៃក្រោយមកបំណែកនៃកម្ទេចកម្ទីរបស់យាន Titan ត្រូវបានរកឃើញនៅចម្ងាយប្រហែល ៤៨៧ ម៉ែត្រពីបំណែកនៃខ្មោចកប៉ាល់ Titanic ។

គួរបញ្ជាក់ថា មនុស្ស ៥ នាក់ រួមទាំងនាយកប្រតិបត្តិក្រុមហ៊ុន OceanGate លោក Stockton Rush ផងដែរនោះបានបាត់បង់ជីវិតក្នុងការផ្ទុះដ៏មហន្តរាយរបស់យាន Titan ក្នុងជម្រៅជិត ៤ គីឡូម៉ែត្រក្រោមនីវ៉ូទឹកសមុទ្រ ខណៈដែលអ្នកដំណើរទាំងនោះព្យាយាមមើលខ្មោចកប៉ាល់ Titanic ហើយរហូតមកដល់ពេលនេះ ឆ្មាំឆ្នេរសមុទ្រអាមេរិកក៏បានបើកការស៊ើបអង្កេតលើមូលហេតុនៃការផ្ទុះនេះផងដែរ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Sky News