ថ្ងៃស្អែក ខ្លាំងប៉ះខ្លាំងវគ្គ៨ក្រុមចុងក្រោយបាល់ទះជើងឯកកម្រិតពិភពលោក

ការប្រកួតបាល់ទះជើងឯកកម្រិតពិភពលលោក FIVB Volleyball Men’s Nations League ឆ្នាំ២០២៣ បានឈានដល់វគ្គ៨ក្រុមចុងក្រោយហើយ បន្ទាប់ពីធ្វើការប្រកួតជម្រុះ និងវិលជុំសន្សំពិន្ទុតាំងពីដើមខែមិថុនា។

សម្រាប់ការប្រកួតសន្សំពិន្ទុក្នុងពូលដែលមានចំនួន១៦ក្រុម ហើយមាន​៨​ក្រុម​ប៉ុណ្ណោះ​បាន​ឡើងទៅវគ្គ​បន្ត។ ក្រុមបាល់ទះជម្រើសជាតិអាមេរិក ជប៉ុន និងប៉ូឡូញ ជាក្រុមខ្លាំងជាងគេដែលស្គាល់បរាជ័យ២ដងដូចគ្នា ខណៈក្រុមជម្រើសជាតិផ្សេងទៀតក៏ល្អដែរ។

ការប្រកួតរវាងក្រុមជម្រើសជាតិខ្លាំងវគ្គ៨ចុងក្រោយត្រូវប្រកួតចាប់ពីថ្ងៃទី១៩ ខែកក្កដា ឆ្នាំ២០២៣ដោយក្រុមលេខ១ សហរដ្ឋអាមេរិក ប៉ះ ក្រុមចំណាត់ថ្នាក់លេខ៨ បារាំង ខណៈក្រុមចំណាត់ថ្នាក់លេខ២ ជប៉ុន ប៉ះ ក្រុមចំណាត់ថ្នាក់លេខ៧ ស្លូវ៉ានី ហើយក្រុមចំណាត់ថ្នាក់លេខ៣ ប៉ូឡូញ (ម្ចាស់​ផ្ទះ) ប៉ះ ក្រុមចំណាត់ថ្នាក់លេខ៦ ប្រេស៊ីល និងក្រុមចំណាត់ថ្នាក់លេខ៤ អ៉ីតាលី ប៉ះ ក្រុមចំណាត់ថ្នាក់លេខ៥ អាហ្សង់ទីន។

បន្ទាប់ពីធ្វើការប្រកួតវគ្គ៨ក្រុមចុងក្រោយចប់ ក្រុមដែលទទួលបានជ័យជម្នះត្រូវឡើងទៅវគ្គពាក់កណ្តាលផ្តាច់ព្រ័ត្រ ខណៈក្រុមដែលចាញ់ត្រូវគិតតាមពិន្ទុដើម្បីឈរចំណាត់ថ្នាក់ពីលេខ១ដល់លេខ៨៕

អត្ថបទ៖ វីរបុត្រ