ទេសចរបរទេសឆ្លងកាត់ច្រកអន្តរជាតិត្រពាំងក្រៀលខេត្តស្ទឹងត្រែងមានការកើនឡើង

សព្វថ្ងៃនេះមានភ្ញៀវទេសចរបរទេសជាច្រើនជាតិសាសន៍បានឆ្លងកាត់ពីប្រទេសឡាវចូលមកប្រទេសកម្ពុជា តាមច្រកទ្វារព្រំដែនអន្តរជាតិត្រពាំងក្រៀល ខេត្តស្ទឹងត្រែងខុសប្លែកពីឆ្នាំកន្លងទៅ។

លោក ទិន សត្យា ប្រធានសហគមគ្រប់គ្រងភ្ញៀវទេសចរប្រចាំច្រកត្រពាំងក្រៀល ខេត្តស្ទឹងត្រែងបានឱ្យដឹងថា ភ្ញៀវទេសបរទេសបច្ចុប្បន្ន​មានការកើនឡើងច្រើន ធ្វើដំណើរពីប្រទេសឡាវចូលមកកម្ពុជាប៉ុន្តែភ្ញៀវជាតិ ចេញចូលតាមច្រកមួយនេះគឺមិនច្រើនទេ នៅក្នុងរដូវមានភ្លៀងធ្លាក់ចាប់ពីខែឧសភាមកដល់ពេលនេះ។

លោកប្រធានសហគមបានបញ្ជាក់ថា ម្យ៉ាងវិញទៀតក្រោយពីប្រមុខរាជរដ្ឋាភិបាលប្រើគោលការណ៍ទទួលភ្ញៀវទេសចរលម្ហជើងមេឃស្វាគមន៍ទទួលភ្ញៀវទេសបរទេសគ្រប់ជាតិសាសន៍មកទស្សនា ក្នុងដំណើរកម្សាន្តនៅប្រទេសកម្ពុជានោះមកកត់សម្គាល់ឃើញថា មានភ្ញៀវចេញចូលច្រើនទៅតាមរដូវកាល។

លោកថា តែទោះបីជាយ៉ាងណាកំណើនភ្ញៀវទាំងជាតិ និងអន្តរជាតិ គឺនៅមិនទាន់កើនដល់កម្រិតកាលមុនពេលផ្ទុះជំងឺកូវីដ១៩នៅឡើយ។

លោក អ៊ន់ ប៉ោសឿន ប្រធានមន្ទីរទេសចរណ៍ខេត្តស្ទឹងត្រែងបាននិយាយឱ្យដឹងថា ចំពោះបញ្ហាមានសន្ទុះភ្ញៀវទេសចរពីប្រទេសជិតខាងនោះ គឺក្រោយប្រមុខដឹកនាំរាជរដ្ឋាភិបាលបើកឱ្យដំណើរការចេញចូលព្រំដែនអន្តរជាតិកម្ពុជាឡាវឡើងវិញ ក្រោយពីស្ថានភាពជំងឺកូវីដធូរស្រាល។

ម្យ៉ាងទៀតក៏ដោយសារប្រទេសកម្ពុជាមានសុខសន្តិភាពមានការអភិវឌ្ឍ ហើយភ្ញៀវក៏អាចធ្វើដំណើរទៅលេងនៅតាមតំបន់ទេសចរនានាក្នុងប្រទេសដោយមិនមានការភ័យខ្លាចអ្វីនោះឡើយ៕

អត្ថបទ៖ ងិនលីម