រុស្ស៊ី អាចត្រលប់ទៅផលិតឧស្ម័នវិញនៅឆ្នាំ ២០២៥ ដោយសារប្រាក់ចំណូលពីវិស័យមួយនេះធ្លាក់ចុះ

យោងតាមការស្រាវជ្រាវរបស់ទីភ្នាក់ងារប្រឹក្សាយោបល់ Yakov & Partners បានឲ្យដឹងថា រុស្ស៊ីអាចត្រលប់ទៅផលិតកម្មឧស្ម័នវិញ ហើយការនាំចេញនឹងមានកំណើននៅឆ្នាំ ២០២៥ ដោយសារតែប្រាក់ចំណូលនៃវិស័យឧស្ម័នរុស្ស៊ីអាចធ្លាក់ចុះជាងពីរដងមកត្រឹម ៧១ ពាន់លានដុល្លារ ខណៈការនាំចេញឧស្ម័នក៏អាចនឹងបាត់បង់ប្រហែល ១ ភាគ ៤ ពោលធ្លាក់ចុះដល់ ១២៦ ពាន់លានម៉ែត្រគូប ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការព្យាករណ៍បានឲ្យដឹងថា ផលិតកម្មឧស្ម័ននៅរុស្ស៊ីអាចធ្លាក់ចុះ ៥ ភាគរយ ឬ ៣០ ពាន់លានម៉ែត្រគូប បើប្រៀបធៀបនឹងឆ្នាំមុន ។ ចំណែកការនាំចេញឧស្ម័នអាចធ្លាក់ចុះ ២៤ ភាគរយ ជាពិសេសការធ្លាក់ចុះលើគម្រោងបង្ហូរប្រេងតាមបំពង់ពី ១ ភាគ ៣ ដល់ ៨០ ពាន់លានម៉ែត្រគូប ។

ដោយឡែកចំពោះការផ្គត់ផ្គង់ឧស្ម័នធម្មជាតិរាវ (LNG) នៅក្រៅប្រទេសអាចកើនឡើងពី ២ ភាគរយ​ទៅ ៤៦ ពាន់លានម៉ែត្រគូប ហើយតាមរយៈទិន្នន័យនេះ អ្នកជំនាញបានកត់សម្គាល់ថា បណ្តាប្រទេសនៅអឺរ៉ុបកំពុងបន្ទាបការនាំចូលឧស្ម័នរបស់រុស្ស៊ីដល់កម្រិតអប្បបរមា ។

ទន្ទឹមនឹងនេះ រុស្ស៊ីអាចនឹងបង្កើនផលិតកម្មឧស្ម័នដល់ ៦៩៥ ពាន់លានម៉ែត្រគូប ចាប់ពីឆ្នាំ ២០២៥ ដោយលើសពីកម្រិតនៃឆ្នាំ ២០២១ និងឈានដល់ ៧៩៩ ពាន់លានម៉ែត្រគូបនៅឆ្នាំ ២០៣០ ខណៈការនាំចេញឧស្ម័នអាចនឹងមានចំនួនសរុប ១៥១ ពាន់លានម៉ែត្រគូបនៅឆ្នាំ ២០២៥ និង ២១១ ពាន់លានម៉ែត្រគូបនៅឆ្នាំ ២០៣០ ។

បន្ថែមពីនេះ អ្នកជំនាញនិយាយថា ការអនុវត្តគម្រោងបំពង់បង្ហូរប្រេងដែលបានគ្រោងទុកទាំងអស់នឹងមិនធ្វើឲ្យវាអាចបង្កើនការធ្លាក់ចុះនៃការដឹកជញ្ជូនទៅកាន់អឺរ៉ុបនោះទេ ខណៈដែលផលិតកម្មអាចនឹងកើនឡើង ដោយសារគម្រោងនាំចេញថ្មីៗ រួមទាំងការផលិត LNG អាម៉ូញាក់ និងជីអ៊ុយរ៉េ ក៏ដូចជាការប្រើប្រាស់ឧស្ម័នធម្មជាតិក្នុងស្រុកជាដើម ។

ទោះយ៉ាងណា សម្រាប់ប្រាក់ចំណូលឧស្ម័នរបស់រុស្ស៊ីពិតជាអាចឈានដល់កម្រិតក្នុងឆ្នាំ ២០២១ ហើយមានចំនួន ៩៧ ពាន់លានដុល្លារក្នុងលក្ខខណ្ឌតម្លៃមានស្ថិរភាព រួមជាមួយការអនុវត្តគម្រោងនាំចេញដែលបានគ្រោងទុក ។ ចំណែកការនាំចេញឧស្ម័នដែលជាផ្នែកមួយនៃប្រាក់ចំណូលរួម នឹងធ្លាក់ចុះមកត្រឹម ៥០ ទៅ ៦០ ភាគរយ បើធៀបនឹង ៧៤ ភាគរយក្នុងឆ្នាំ ២០២១ ៕

ប្រែសម្រួល៖ នាង រតនៈ

ប្រភព៖​ TASS