ក្រសួងយុត្តិធម៌ បង្គាប់ឱ្យ លោក ជីវ កេង ទទួលបន្ទុកជា ប្រធានស្ដីទីតុលាការកំពូល

ក្រសួងយុត្តិធម៌ បានបង្គាប់មក ឯកឧត្តម ជីវ កេង អនុប្រធានតុលាការកំពូល ឱ្យទទួលបន្ទុកជា ប្រធានស្ដីទីតុលាការកំពូល រហូតដល់មានការតែងតាំងប្រធានតុលាការកំពូលជាផ្លូវការ។

នៅថ្ងៃទី១៤ ខែសីហានេះ លោក កើត រិទ្ធ រដ្ឋមន្រ្តីក្រសួងយុត្តិធម៌ បានចេញលិខិតបង្គាប់ការឱ្យ លោក ជីវ កេង អនុ ប្រធានតុលាការកំពូល ជាប្រធានស្ដីទីតុលាការកំពូល រហូតមានការតែងតាំង ប្រធានតុលាការកំពូលជាផ្លូវការ។

ការចាត់តាំងជាលិខិតផ្លូវការនេះ គឺបន្ទាប់ពី លោក ឌិត មុន្ទី ជាប្រធានតុលាការកំពូល ត្រូវបានព្រះមហាក្សត្រចេញព្រះរាជក្រឹត្យ ត្រាស់បង្គាប់ឲ្យលោកចូលនិវត្តន៍។

គួររម្លឹកថា កាលពីថ្ងៃពីថ្ងៃ១១ ខែសីហា ឆ្នាំ២០២៣នេះ ព្រះករុណាព្រះបាទ សម្ដេចព្រះបរមនាថ នរោត្តមសីហមុនី ព្រះមហាក្សត្រកម្ពុជា បានចេញព្រះរាជក្រឹត្យត្រាស់បង្គាប់ដាក់ឱ្យ លោក ឌិត មុន្ទី ប្រធានតុលាការកំពូល និងចៅក្រមតុលាការកំពូល ២រូបទៀត ចូលនិវត្តន៍ ចាប់ពីថ្ងៃ១៥ ខែសីហា ឆ្នាំ២០២៣ តបតាមសំណើរបស់សាមីខ្លួន៕