ព័ត៌មានអន្ដរជាតិ

មុខរបរ៣ប្រភេទនៅប្រទេសថៃ ទទួលបានប្រាក់ឈ្នួលទាបជាងគេ

បានផុស

៣ years មុន

នៅ

ថ្ងៃចន្ទ ២៥ កញ្ញា ២០២៣

ដោយ

ត្បិតថាថៃមានវិស័យសេដ្ឋកិច្ចរីកចម្រើនទៅមុខជាដរាបក្ដី។ ប៉ុន្តែក្នុងនោះមានមុខរបរ៣ប្រភេទ ដែលជាប់ចំណាត់ថ្នាក់ជាអាជីពទទួលបានប្រាក់ឈ្នួលទាបបំផុត។ ស្របពេលដែលប្រាក់ឈ្នួលរបស់កម្មករនិងនិយោជិកម្នាក់ៗដែលទទួលបានអាស្រ័យលើប្រាក់ចំណេញផងដែរ។

១ កម្មករកសិកម្ម

ការងារមួយក្នុងចំណោមមុខរបរដែលទទួលបានប្រាក់ខែទាបបំផុតក្នុងប្រទេសថៃ គឺការងារកសិកម្ម។ កម្មករទាំងនេះចូលរួមក្នុងសកម្មភាពផ្សេងៗ ទាក់ទងនឹងការធ្វើកសិកម្មដូចជា ការដាំដុះ ការប្រមូលផល និងថែទាំដំណាំ ពួកគេច្រើនតែធ្វើការច្រើនម៉ោងក្នុងស្ថានភាពលំបាក។ ប៉ុន្តែប្រាក់ខែរបស់ពួកគេជាទូទៅទាប។ ប្រាក់ឈ្នួលប្រចាំខែជាមធ្យមសម្រាប់កម្មករកសិកម្មនៅក្នុងប្រទេសថៃគឺប្រហែល ៨ពាន់ ទៅ១ម៉ឺនបាត (ប្រហែល ២៥០ ទៅ ៣២០ ដុល្លារ) ប្រាក់ឈ្នួលទាបនេះគឺដោយសារតែផលិតភាពទាប និងប្រាក់ចំណេញនៃវិស័យកសិកម្មនៅក្នុងប្រទេស ក៏ដូចជាកង្វះកម្មករជំនាញនៅក្នុងឧស្សាហកម្ម។

២ ជំនួយការផ្នែកថែទាំផ្ទះ

អ្នកជំនួយការមេផ្ទះ រួមទាំងស្ត្រីមេផ្ទះ អ្នកសំអាត និងអ្នកមើលថែ ពួកគេក៏ទទួលបានប្រាក់ខែតិចដូចគ្នា។ គ្រួសារថៃជាច្រើនបានជួលអ្នកជំនួយតាមផ្ទះដើម្បីជួយការងារផ្ទះ និងមើលថែទាំកុមារ។ ទោះយ៉ាងណាក៏ដោយ កម្មករទាំងនេះច្រើនតែទទួលបានប្រាក់ឈ្នួលអប្បបរមា។ ជាទូទៅនេះគឺទាបជាងប្រាក់ឈ្នួលអប្បបរមាដែលកំណត់ដោយរដ្ឋាភិបាល។ ប្រាក់បៀវត្សរ៍ជាមធ្យមសម្រាប់ជំនួយការតាមផ្ទះនៅប្រទេសថៃគឺចន្លោះពី ៦ពាន់ ទៅ ៨ពាន់បាត (ប្រហែល ១៩០ ទៅ ២៥៥ ដុល្លារ)។ កម្មករទាំងនេះច្រើនតែប្រឈមមុខនឹងការងារយូរ អត្ថប្រយោជន៍តិចតួច និងស្ថេរភាពការងារតិចតួច ប្រាក់ឈ្នួលទាបក្នុងមុខរបរនេះ ភាគច្រើនមកពីកង្វះបទប្បញ្ញត្តិ និងការអនុវត្តក្នុងទីផ្សារការងារក្នុងស្រុក។

៣ អ្នកលក់ដូរតាមដងផ្លូវ

អាជីវករលក់អាហារ អាហារសម្រន់ សំលៀកបំពាក់ និងទំនិញផ្សេងៗទៀត នៅលើផ្លូវនិងចិញ្ចើមផ្លូវ ពួកគេក៏ទទួលបានប្រាក់ខែតិច មិនខុសពីអ្នកខាងលើដែរ។ អ្នកលក់ទាំងនេះតែងតែធ្វើការច្រើនម៉ោងក្នុងបរិយាកាសដែលមានមនុស្សច្រើន និងមានការប្រកួតប្រជែងខ្ពស់ដើម្បីរកប្រាក់ចំណូល។ ប្រាក់ចំណូលរបស់ពួកគេជាទូទៅមានកម្រិតទាបដោយសារតែប្រាក់ចំណេញទាបនៅក្នុងអាជីវកម្មលក់ដូរតាមចិញ្ចើមផ្លូវ។ ប្រាក់ចំណូលប្រចាំខែជាមធ្យមរបស់អាជីវករលក់ដូរតាមដងផ្លូវក្នុងប្រទេសថៃគឺចន្លោះពី ៥ពាន់ ទៅ ៨ពាន់បាត (ប្រហែល ១៦០ទៅ ២៥៥ ដុល្លារអាមេរិក)។ ប្រាក់ឈ្នួលទាបក្នុងអាជីពនេះភាគច្រើនកើតឡើងដោយសារលក្ខណៈក្រៅផ្លូវការនៃការលក់តាមចិញ្ចើមផ្លូវ។ ដែលខ្វះបទប្បញ្ញត្តិ និងការការពារផ្លូវការសម្រាប់និយោជិក។

សរុបមក មុខរបរទាំងបីនេះតំណាងឲ្យការងារដែលមានប្រាក់ខែទាបបំផុតនៅក្នុងប្រទេសថៃ។ ប្រាក់ឈ្នួលទាបក្នុងមុខរបរទាំងនេះជាចម្បងដោយសារកត្តាដូចជាផលិតភាពទាប។ កង្វះបទប្បញ្ញត្តិ និងឱកាសការងារមានកំណត់ វាមានសារៈសំខាន់សម្រាប់រដ្ឋាភិបាល និងអ្នកពាក់ព័ន្ធក្នុងការដោះស្រាយបញ្ហាទាំងនេះ និងកែលម្អលក្ខខណ្ឌការងារ និងប្រាក់ឈ្នួលសម្រាប់កម្មករក្នុងវិស័យទាំងនេះ ដើម្បីធានាបាននូវទីផ្សារការងារប្រកបដោយនិរន្តរភាព និងយុត្តិធម៌នៅក្នុងប្រទេសថៃ៕

ប្រែសម្រួល៖ សាង ស្រីល័ក្ខ

ប្រភព៖ Thailand

ចុចអាន៖ហេតុផលធំៗ ដែលមាសមានតម្លៃជាងពេជ្រក្នុងបច្ចុប្បន្ននេះ

ចុចអាន៖មុខរបរមួយប្រភេទនៅថៃ ជាប់បំណុលធនាគារខ្ពស់បំផុតក្នុងប្រទេស