ព័ត៌មានជាតិ

ពលរដ្ឋស្រុកស្រែអំបិល និងស្រុកថ្មបាំង បន្តរងផលប៉ះពាល់ដោយជំនន់ទឹកភ្លៀង

បានផុស

៣ years មុន

នៅ

ថ្ងៃសុក្រ ២៩ កញ្ញា ២០២៣

ដោយ

អាជ្ញាធរខេត្តកោះកុង បង្ហាញថា ៣ ថ្ងៃមកនេះ លំនៅដ្ឋានពលរដ្ឋ ដីស្រែចម្ការ សត្វចិញ្ចឹម និងផ្លូវមួយ បានរងផលប៉ះពាល់ដោយសារជំនន់ទឹកភ្លៀងជាបន្តបន្ទាប់ ទោះយ៉ាងណាមិនមានមនុស្សស្លាប់ដោយហេតុការណ៍នេះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី អ៊ី នារីនេត អភិបាលរងខេត្តកោះកុង បានឲ្យដឹងកាលពីយប់ថ្ងៃទី ២៨ ខែកញ្ញា ឆ្នាំ ២០២៣ ថា ៣ ថ្ងៃមកនេះ មានប្រជាពលរដ្ឋក្នុងមូលដ្ឋានស្រុកស្រែអំបិល និងស្រុកថ្មបាំង សរុប ១៣៣ គ្រួសារ បានជន់លិចផ្ទះសម្បែង ក្រោយបរិមាណទឹកភ្លៀងហូរពីជ្រលងភ្នំធ្លាក់ចូលមកតាមដៃស្ទឹង។

បើតាមលោកស្រីអភិបាលរងខេត្ត ក្រៅពីលំនៅដ្ឋានពលរដ្ឋ ក៏មានផ្លូវលំជាច្រើនរងជន់លិច ខណៈទឹកមិនទាន់ស្រក។ រីឯផ្លូវតំបន់ខ្លះទៀត ទឹកក៏បានស្រកថមថយផងដែរ។ ទោះយ៉ាងណា មានសត្វគោ និងសត្វមាន់ទាសរុប ១០១ ក្បាល បានងាប់ ក៏ដូចជាបាត់ខ្លួន។ ចំពោះអាយុជីវិតពលរដ្ឋគ្មាននរណាម្នាក់បាត់បង់ឡើយ។ ហើយមូលដ្ឋានដែលរងផលប៉ះពាល់ខាងលើ មានពលរដ្ឋរស់នៅឃុំជំនាប់ ឃុំជីផាត ស្ថិតក្នុងស្រុកថ្មបាំង និងឃុំជីខលើ ស្រុកស្រែអំបិល។

អាជ្ញាធរខេត្ត និងសមត្ថកិច្ច ក៏បានអំពាវនាវដល់ពលរដ្ឋត្រូវបង្កើនការប្រុងប្រយ័ត្នអំពីការប្រែប្រួលអាកាសធាតុនេះ ពិសេសសូមប្រញាប់រាយការណ៍មកអាជ្ញាធរមូលដ្ឋានដែលនៅជិត ឲ្យបានទាន់ពេលវេលា ដើម្បីអន្តរាគមន៍សង្គ្រោះ។

កន្លងទៅ នៅពេលមានឥទ្ធិពលព្យុះភ្លៀងម្តងៗ ស្រុកស្រែអំបិល និងស្រុកថ្មបាំង ងាយនឹងប្រឈមរងផលប៉ះពាល់ជាងគេ ខណៈមូលដ្ឋានស្រុកទាំង ២ មានពលរដ្ឋរស់នៅតាមជ្រលងភ្នំ និងដៃព្រែកស្ទឹង៕

អត្ថបទ ៖ សិរីវឌ្ឍន

Related Topics:ខេត្តកោះកុង

សេចក្ដីជូនដំណឹង១ សប្តាហ៍ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា