ភាគហ៊ុនក្រុមហ៊ុនទទួលសិទ្ធិផលិតទូរសព្ទ iPhone របស់ តៃវ៉ាន់ ធ្លាក់ចុះ ៣ ភាគរយ

ភាគហ៊ុនក្រុមហ៊ុន Foxconn របស់តៃវ៉ាន់ដែលជាអ្នកផ្គត់ផ្គង់ទូរសព្ទ iPhone ដ៏សំខាន់នៃក្រុមហ៊ុន Apple នៅថ្ងៃចន្ទនេះបានធ្លាក់ចុះដល់ទៅ ៣ ភាគរយ បន្ទាប់ពីក្រុមហ៊ុនជាប់ពាក់ព័ន្ធនឹងការត្រួតពិនិត្យពន្ធ និងស៊ើបអង្កេតការប្រើប្រាស់ដីធ្លីនៅក្នុងប្រទេសចិន ។

កាសែត Global Times បានចុះផ្សាយថា ក្រុមហ៊ុនបុត្រសម្ព័ន្ធសំខាន់ៗមួយចំនួនរបស់ Foxconn នៅក្នុងប្រទេសចិន គឺជាដើមហេតុនៃការត្រួតពិនិត្យពន្ធ ហើយមានការស៊ើបអង្កេតការប្រើប្រាស់ទីតាំងរបស់សហគ្រាស Foxconn នៅក្នុងខេត្ត Henan និង Hubei រួមជាមួយកន្លែងផ្សេងទៀត ពីសំណាក់នាយកដ្ឋានធនធានធម្មជាតិរបស់ប្រទេសចិនកាលពីថ្ងៃអាទិត្យ ។

Foxconn ជាក្រុមហ៊ុនទទួលសិទ្ធិផលិតទូរស័ព្ទ iPhone ដែលភាគច្រើននៅរោងចក្រ Zhengzhou ក្នុងខេត្ត Henan ដោយមានបុគ្គលិកប្រហែល ២០ ម៉ឺននាក់ ។

គួរឲ្យដឹងដែរថា កាលពីខែមុន ស្ថាបនិករបស់ក្រុមហ៊ុន Foxconn គឺលោកមហាសេដ្ឋី Terry Gou បានលាលែងពីក្រុមប្រឹក្សាភិបាលរបស់ក្រុមហ៊ុនផលិតគ្រឿងអេឡិចត្រូនិកដ៏ធំបំផុតរបស់ពិភពលោកមួយនេះ ដើម្បី​ចូលរួមជីវភាពនយោបាយប្រជែងតំណែងនាយករដ្ឋមន្ត្រីតៃវ៉ាន់ ៕​

ប្រែសម្រួល៖ នាង រតនៈ

ប្រភព៖ CNA