ពលរដ្ឋ​កុះករ​ឈរ​អម​ទូកងដ៏ល្បី​​ប្រចាំ​វត្ត​ឯករង្សី​ចុះដងស្ទឹងសង្កែត្រៀមប្រកួតអុំទូក

ខុសប្លែកឆ្នាំកន្លងទៅក្រោយពីទូកងដ៏ល្បីឈ្មោះ «នរិន្ទរង្សីពិជ័យចិត្របុត្រ​វត្ត» ប្រចាំ​វត្ត​ឯករង្សីក្នុងស្រុកឯកភ្នំកាន់​តែ​មានសន្ទុះគាំទ្រនៅ​ឆ្នាំនេះ ក្រោយ​ជួបគ្រោះថ្នាក់ដោយមានដើមពង្រ​មួយ​ដើមបានរលំសង្កត់កាលពីយប់ថ្ងៃទី ០២ ខែតុលាឆ្នាំ២០២៣ ខណៈហេតុការណ៍​នេះ​បានបង្កឲ្យពុទ្ធបរិស័ទ្ធជាច្រើនរួមទាំងមហាជននិងមន្ត្រីរាជការមួយចំនួនកើតក្តីខ្វល់​ខ្វាយនិងសោកស្តាយគ្រប់ៗគ្នាថានឹងខកខានក្នុងការចូលរួមប្រណាំងទូក​ជាប្រពៃណីដែលជិតចូលមកដល់ក្នុងពេលដ៏ខ្លីខាងមុខនេះ។

ប៉ុន្តែគ្រោះថ្នាក់​នេះ​មិនអាចរំខានដល់ការចូលប្រកួតរបស់​ទូកង «នរិន្ទរង្សីពិជ័យចិត្របុត្រ» ក្នុងឆ្នាំនេះឡើយ។ ផ្ទុយទៅវិញសន្ទុះនៃការគាំទ្ររបស់ប្រជាពលរដ្ឋនិងពុទ្ធបរិស័ទ្ធព្រមទាំងព្រះសង្ឃផង ចេញមកអមដំណើរចុះដងស្ទឹងសង្កែយ៉ាងច្រើន​កុះករ​ជាងឆ្នាំកន្លងទៅក្នុងនោះក៏​មាន​វត្តមានរបស់ម្ចាស់ទូកគឺ លោកតា ចម ចិត្រ ព្រះចៅអធិការ វត្តឯករង្សីក្នុងស្រុកឯកភ្នំ។

ពលរដ្ឋដែលមកឈរអបអរ​បានឲ្យដឹងប្រហាក់ប្រហែលគ្នាថា ឆ្នាំនេះក៏ដូចឆ្នាំមុនៗដែរពួកគាត់សង្ឃឹមថា ទូកដ៏ល្បី ​«នរិន្ទរង្សីពិជ័យចិត្របុត្រ» ដែលមានឈ្មោះបោះសម្លេង​ប្រកួត​មិន​ដែល​ចាញ់​នឹងរក្សា​កំណត់​ត្រា​ឈ្នះ​បន្ត​ទៀត​ពីការ​ប្រកួតក្នុងខេត្ត និង​ការ​ប្រកួតថ្នាក់ជាតិនៅរាជធានីភ្នំពេញ។

ទូកងដ៏ល្បីឈ្មោះ «នរិន្ទរង្សីពិជ័យចិត្របុត្រ​វត្ត» មានប្រវែង ៣៤ ម៉ែត្រ និង មានចំណុះកីឡាករ ៧៥ នាក់។

បើតាម​មន្ត្រីទេចរណ៍ខេត្តបាត់ដំបង​រំពឹងថា ពិធីអុំទូកឆ្នាំនេះនឹងអាចមានកំណើនភ្ញៀវមកទស្សនាកម្សាន្តច្រើនជាងឆ្នាំមុន ស្រប​ពេលហេដ្ឋារចនាសម្ព័ន្ធក្នុង​ខេត្ត​មួយចំនួនទើបសាងសង់រួចរាល់នៅតាមដងស្ទឹងសង្កែមានដូចជាវិមានឯករាជ្យ​ដ៏ស្រស់ស្អាតដែលជាមេដែកមួយដុំបន្ថែមទៀត ដែលនឹងឆក់ទាញកំណើនភ្ញៀវទេសចរមកកម្សាន្តច្រើន​ជាងឆ្នាំកន្លងទៅ៕

អត្ថបទ៖ សៅ សារិទ្ធ