ព័ត៌មានជាតិ

មន្ត្រីជាន់ខ្ពស់អប់រំ ៖ កត្តា ៤ យ៉ាង នាំឲ្យការអប់រំប្រកបដោយគុណភាព និងជោគជ័យ

បានផុស

៣ years មុន

នៅ

ថ្ងៃអង្គារ ១៤ វិច្ឆិកា ២០២៣

ដោយ

លោកស្រី គឹម សេដ្ឋានី រដ្ឋលេខាធិការក្រសួងអប់រំ យុវជន និងកីឡា បានអះអាងថា មានកត្តា ៤ យ៉ាង ដែលនាំឲ្យការអប់រំប្រកបដោយគុណភាព និងទទួលបានលទ្ធផលផ្លែផ្កា ជោគជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីចែកវិញ្ញាបនបត្រ បណ្ណសរសើរ អាហារូបករណ៍ដល់សិស្ស នៃសាលាអន្តរជាតិអាស៊ាន និងសាលារៀនខេមវីសឌឹម សម្រាប់ឆ្នាំសិក្សា ២០២២-២០២៣ កាលពីចុងសប្ដាហ៍នេះ លោកស្រី បានបន្តថា កត្តា ៤ យ៉ាង រួមមាន ៖ ទី១.កក្តាសាលារៀនដូចជាសាលារៀនអន្តរជាតិអាស៊ាន ត្រូវបានចាត់ទុកជាសាលាមួយផ្តល់ការសិក្សាប្រកបដោយគុណភាព ឧត្ដមភាព និងគុណធម៌ និងបានជួយបណ្ដុះបណ្ដាលសិស្សឲ្យក្លាយជាសិស្សមានសក្ដានុពលនាសតវត្សទី ២១។ ទី២.កត្តាគ្រូបង្រៀនដែលទាមទារនូវការអភិវឌ្ឍសមត្ថភាពគ្រូបង្រៀនជាប្រចាំក្នុងស្ថាប័នអប់រំ។ ទី៣.កត្តាសិស្ស ទាមទារសិស្សត្រូវខិតខំប្រឹងប្រែងរៀនសូត្រ និងមានសុខភាពល្អ កាយសម្បទាមាំមួន និងមានបញ្ញាស្មារតីដើម្បីទទួលការបណ្តុះបណ្តាលប្រកបដោយគុណភាពខ្ពស់ និងទី៤.កត្តាឪពុកម្តាយ។ ការចូលរួមពីអាណាព្យាបាលពិតជារឿងសំខាន់ មិនអាចខ្វះបានឡើយ ទាំងការវិនិយោគ និងការចូលរួមគាំទ្រ លើកទឹកចិត្តដល់កូន។

លោកស្រីរដ្ឋលេខាធិការ បានបន្តទៀតថា នៅក្នុងនីតិកាលថ្មីនេះ រាជរដ្ឋាភិបាលបានដាក់ចេញនូវយុទ្ធសាស្ត្របញ្ចកោណ ដំណាក់កាលទី ១ ដែលចាត់ទុកការអភិវឌ្ឍធនធានមនុស្សជាអាទិភាពទី ១ ។ ក្នុងនោះ មុំទី ១ របស់យុទ្ធសាស្ត្របញ្ចកោណ ដំណាក់កាលទី ១ ដែលពាក់ព័ន្ធជាមួយវិស័យអប់រំស្ដីពី “ការពង្រឹងគុណភាពវិស័យអប់រំ កីឡា វិទ្យាសាស្ត្រ និងបច្ចេកវិទ្យា” ហើយអាទិភាពកំណែទម្រង់វិស័យអប់រំ យុវជន និងកីឡា សម្តេចធិបតី ហ៊ុន ម៉ាណែត បានកំណត់ អាទិភាពស្នូល ៤ ចំណុច គឺ ៖ (១)អាទិភាពស្នូលទី១-ការពង្រឹងអភិបាលកិច្ចសាលារៀន។ (២)អាទិភាពស្នូលទី២-ការពិនិត្យ កែសម្រួល និងរៀបចំកម្មវិធីសិក្សា និងសកម្មភាពក្រៅម៉ោងសិក្សាឲ្យស្របទៅតាមតម្រូវការក្នុងការពង្រឹងចំណេះដឹង វិន័យ សីលធម៌ និងឥរិយាបថរបស់សិស្ស។ (៣)អាទិភាពស្នូលទី៣-ការលើកកម្ពស់សុខភាពសិក្សា ដោយយកចិត្តទុកដាក់លើសុខភាពរបស់សិស្ស តាមរយៈកម្មវិធីអាហារូបត្ថម្ភដល់កុមារ និងការត្រួតពិនិត្យគុណភាពចំណីអាហារនៅតាមសាលា។ (៤)អាទិភាពស្នូលទី៤-ការជំរុញ និងលើកទឹកចិត្តការចូលរួមរបស់មាតាបិតា អាណាព្យាបាល និងសហគមន៍ក្នុងការអប់រំ ស្របតាមពាក្យស្លោកភាពជាដៃគូ រដ្ឋ និងសហគមន៍ ដើម្បីការអប់រំ៕

អត្ថបទ ៖ សំអឿន