អាជ្ញាធរប្រយុទ្ធជំងឺអេដស៍ ដាក់ផែនការជាតិ ឈានទៅបញ្ចប់ជំងឺអេដស៍ នៅឆ្នាំ២០២៨

អាជ្ញាធរជាតិប្រយុទ្ធនឹងជំងឺអេដស៍ បានដាក់ចេញផែនការជាតិ ៥ឆ្នាំ (២០២៤-២០២៨) ដើម្បីឆ្លើយតបមេរោគអេដស៍ និងជំងឺអេដស៍នៅកម្ពុជា ឈានទៅបញ្ចប់ជំងឺអេដស៍ មិនឱ្យក្លាយជាការគំរាមកំហែងសុខភាពសាធារណៈ នៅឆ្នាំ២០២៨ ខាងមុខនេះ។

ថ្លែងបើកសិក្ខាសាលាជាតិ ស្តីពី ការផ្តល់សុពលភាពលើផែនការយុទ្ធសាស្ត្រជាតិទូលំទូលាយ និងពហុវិស័យឆ្លើយតបនឹងមេរោគអេដស៍ និងជំងឺអេដស៍ លើកទី៦ (២០២៤-២០២៨) នៅថ្ងៃទី២៣ ខែវិច្ឆិកានេះ លោកទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ មានប្រសាសន៍ថា ការប្តេជ្ញាចិត្តរួមនៅថ្ងៃនេះ និងឆ្នាំខាងមុខនឹងធ្វើឱ្យបេសកកម្មរបស់ផែនការយុទ្ធសាស្ត្រជាតិទូលំទូលាយ និងពហុវិស័យឆ្លើយតប នឹងមេរោគអេដស៍ និងជំងឺអេដស៍ លើកទី៦ (២០២៤-២០២៨) អាចធ្វើទៅបានពិតប្រាកដ។ ក្នុងរយៈពេល ៥ ឆ្នាំខាងមុខ កម្ពុជានឹងអាចធានាការឆ្លើយតបមេរោគអេដស៍ និងជំងឺអេដស៍ជាពហុវិស័យ មានការសម្របសម្រួលយ៉ាងល្អ មានបរិយាបន្ន មានសហគមន៍ដែលម្ចាស់ការ មានការអនុវត្តអភិក្រមដែលយកប្រជាជនជាធំ មានភាពធន់ និងធានាបានចីរភាព ក្នុងការបញ្ចប់ជំងឺអេដស៍មិនឱ្យក្លាយជាការគំរាមកំហែងសុខភាពសាធារណៈ នាឆ្នាំ២០២៨ ខាងមុខនេះ បានក្លាយទៅជាពិតជាក់ស្តែង។

ជាមួយនឹងផែនការយុទ្ធសាស្រ្តជាតិ លើកទី៦ លោកទេសរដ្ឋមន្រ្តី ផ្ញើសេចក្តីសង្ឃឹមលើអ្នកចូលរួមទាំងអស់ ក្នុងការលើកទឹកចិត្តឱ្យសហការីធ្វើការជាមួយសហគមន៍ ពិសេសយុវជន ១. ក្នុងការបិទគម្លាត នៃគោលដៅ ៩៥ដំបូង ២. រក្សាបាននូវផលចំណេញ នៃការព្យាបាលដោយផ្តោតលើសមធម៌ និង៣. ជំរុញឱ្យមានចីរភាព និងភាពជាម្ចាស់ក្នុងការឆ្លើយនឹងមេរោគអេដស៍ និងជំងឺអេដស៍។

លោកទេសរដ្ឋមន្រ្តីបានបញ្ជាក់ថា ដោយឈរលើគោលនយោបាយជាតិបញ្ចប់ជំងឺអេដស៍ និងចីរភាព នៃការឆ្លើយតបនៅឆ្នាំ២០២៣-២០២៨ យើងគួរតែចាប់ផ្តើមពង្រីកវិសាលភាព នៃកម្មវិធីនានា ស្វែងយល់ស៊ីជម្រៅអំពីវិធីសាស្រ្តអន្តរាគមន៍ថ្មីៗ និងរៀបចំសកម្មភាពផ្លាស់ប្តូរ ដើម្បីបង្កើនប្រសិទ្ធភាព ប្រសិទ្ធផល និងចីរភាព នៃការឆ្លើយតបនឹងមេរោគអេដស៍ និងជំងឺអេដស៍។ ព្រោះការ​បញ្ចប់​ជំងឺ​អេដស៍​តម្រូវ​ឱ្យ​យើង​ទាំង​អស់​គ្នា​កសាង​ភាព​ជា​អ្នក​ដឹក​នាំដ៏រឹងមាំ ដើម្បីជំរុញភាពជាដៃគូដែលមានបរិយាបន្ន និងការវិនិយោគធនធាន និង​​ពេលវេលាក្នុងការដោះស្រាយតម្រូវការរបស់ជនងាយរងគ្រោះ និង​អ្នក​ដែល​រង​ផល​ប៉ះពាល់​ដោយ​សារ​មេរោគអេដស៍ និងជំងឺអេដស៍។

គួរបញ្ជាក់ថា កម្ពុជាមានអ្នកឆ្លងជំងឺអេដស៍ចំនួន ៧៤ ០០០ នាក់ ក្នុងនោះមានអ្នកទទួលបានការព្យាបាលដោយឱសថប្រឆាំងមរោគអេដស៍ចំនួន ៦២ ៨៣៨ នាក់ និងមានអ្នកឆ្លងមេរោគអេដស៍ថ្មីប្រមាណ ១ ៤០០ នាក់ ក្នុងមួយឆ្នាំ និងអ្នកស្លាប់ដោយសារជំងឺអេដស៍មានប្រមាណ ១ ១០០ នាក់ ក្នុងមួយឆ្នាំ៕

អត្ថបទ៖ សំអឿន