ឥណ្ឌាប្រើសុនខ ហិតក្លិនរកជំងឺកូវីដ ១៩ លើកងទ័ព (មានវីដេអូ)

យោធាឥណ្ឌាបានជ្រើសរើសឆ្កែដែលមានច្រមុះពូកែហិតក្លិនដើម្បីប្រយុទ្ធប្រឆាំងនឹងរោគរាតត្បាតតាមរយៈការបណ្តុះបណ្តាលសត្វជាច្រើនដើម្បីស្រង់ក្លិនជំងឺកូវីដ ១៩ នៅក្នុងជួរកងទ័ព ។ ការស្រាវជ្រាវបាននិយាយថា ការធ្វើតេស្តសត្វឆ្កែនៅនឹងកន្លែងគឺមានប្រសិទ្ធភាព ៩៥ ភាគរយ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពូជឆ្កែជនជាតិដើមភាគតិច Chippiparai ត្រូវបានបណ្តុះបណ្តាលដើម្បីកំណត់វីរុសនេះដែលបានឆ្លងដល់មនុស្សជាង ១០ លាននាក់ និងបានសម្លាប់មនុស្សជាង ១៥៥,០០០ នាក់នៅទូទាំងប្រទេសឥណ្ឌាដោយផ្អែកលើគំរូទឹកនោម និងញើសដែលយកពីមនុស្សឈឺ ។

យោធាបានពន្យល់នៅក្នុងសេចក្តីថ្លែងការណ៍មួយថា “ជាលិកានៃរាងកាយរបស់អ្នកកើតជំងឹកូវីដ ១៩ បានបញ្ចេញជីវគីមីរំលាយអាហារងាយនឹងបង្កជាហេតុ ហើយឆ្កែត្រូវបានប្រើដើម្បីសម្គាល់ជំងឺនេះ” ។

លោកវរសេនីយ៍ឯក Surender Saini អ្នកបង្ហាត់សត្វឆ្កែកងទ័ពបាននិយាយថា យោងតាមទិន្នន័យដែលបានប្រមូលមកទល់ពេលនេះសមត្ថភាពក្នុងការរកឃើញជំងឺកូវីដ ១៩ គឺមានច្រើនជាង ៩៥ ភាគរយក្នុងចំណោមសត្វឆ្កែហិតក្លិនទាំងនេះ” ។

រហូតមកដល់ពេលនេះសត្វឆ្កែនោះបានពិនិត្យសំណាកចំនួន ៣,០០០ ហើយបានរកឃើញករណីវិជ្ជមាននៃជំងឺកូវីដ ១៩ ចំនួន ១៨ ករណី ។

យោធាឥណ្ឌាជឿជាក់ថា ទេពកោសល្យរបស់សត្វឆ្កែដើម្បីកំណត់អត្តសញ្ញាណវីរុសនេះនឹងជួយទប់ស្កាត់ការរីករាលដាលនៃជំងឺកូវីដ ១៩ ក្នុងចំណោមកងទ័ព និងកាត់បន្ថយតម្រូវការសម្រាប់ការធ្វើតេស្តនៅទីតាំងដែលពិបាកទៅដល់កន្លែងដែលទាហានត្រូវបានដាក់ពង្រាយ ។

ទន្ទឹមនោះក៏មានឆ្កែចំនួន ៨ ក្បាលទៀតផងដែរក្នុងនោះពូជ Labradors ចំនួន ៤ ក្បាលក៏បានចាប់ផ្តើមបើកវគ្គបណ្តុះបណ្តាលហិតក្លិនរកជំងឺកូវីដ ២៩ ផងដែរ ។ កងទ័ពបាននិយាយថា ប្រទេសឥណ្ឌាបានបង្កើតកម្មវិធីនេះដោយទាញយកបទពិសោធន៍ពីប្រទេសដទៃទៀតដូចជា ចក្រភពអង់គ្លេស រុស្ស៊ីបា រាំង អាល្លឺម៉ង់ និងអារ៉ាប់រួម ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ RT