ព័ត៌មានជាតិ

អ្នកផ្ទុកមេរោគអេដស៍ជាង២ម៉ឺននាក់ ទទួលបានបណ្ណមូលនិធិសមធម៌ ពីរដ្ឋាភិបាល

បានផុស

១ year មុន

នៅ

ថ្ងៃសៅរ៍ ៩ ធ្នូ ២០២៣

ដោយ

មន្ត្រីជាន់ខ្ពស់ នៃអាជ្ញាធរជាតិប្រយុទ្ធនឹងជំងឺអេសដ៍ (NAA) បានអះអាងថា រហូតមកដល់ពេលនេះមានអ្នកផ្ទុកមេរោគអេដស៍ប្រមាណជាង២ម៉ឺននាក់ក្នុងចំណោមអ្នកទទួលបានសេវាព្យាបាល ជាង ៦៧ ០០០នាក់ទទួលបានបណ្ណមូលនិធិសមធម៌ពីរាជរដ្ឋាភិបាលសម្រាប់ប្រើប្រាស់សេវាសុខាភិបាលដោយមិនបង់ប្រាក់។

លោក ឈឹម ឃិនដារ៉េត អគ្គលេខាធិការនៃអាជ្ញាធរជាតិប្រយុទ្ធនឹងជំងឺអេសដ៍ (NAA) បានមានប្រសាសន៍នៅព្រឹកថ្ងៃទី ០៩ ធ្នូ នេះថា តាមការសិក្សាឆ្នាំ២០២២កម្ពុជាមានអ្នកផ្ទុកមេរោគអេដស៍ប្រមាណ ៧៦ ០០០នាក់។ ក្នុងនោះអ្នកបានចូលក្នុងប្រព័ន្ធបង្ការ ព្យាបាល ថែទាំបន្តនៅតាមទីតាំងទាំង ៧៣ កន្លែងនៅទូទាំងប្រទេសមានចំនួន ៦៧ ៣៨៣នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអគ្គលេខាធិការបានបន្តទៀតថា គិតត្រឹមថ្ងៃទី៥ ខែធ្នូ ២០២៣មាន អ្នកផ្ទុកមេរោគអេដស៍ដែលកំពុងស្ថិតក្នុប្រព័ន្ធបង្ការ ព្យាបាល ថែទាំបន្ត ចំនួន ២០ ៣៧៩ បានចុះបញ្ជីទទួលបានបណ្ណមូលនិធិសមធម៌ និងនៅសល់ប្រមាណជាង ៤៧ ០០០នាក់ទៀតនៅមិនទាន់បានចុះបញ្ជីនៅឡើយទេហើយក្រុមការងារនឹងបន្តចុះបញ្ជីជាបន្តបន្ទាប់ដោយកិច្ចការចុះបញ្ជីទទួលបានបណ្ណមូលនិធិសមធម៌ ទើបចាប់ផ្តើមឱ្យអនុវត្តហើយសម្ភារៈដែលប្រើប្រាស់សម្រាប់ធ្វើបណ្ណមិនទាន់មានបំពាក់នៅគ្រប់កន្លែងផ្តល់សេវាបង្ការ ព្យាបាល ថែទាំបន្តនៅឡើយ។

លោកអគ្គលេខាធិការបានបន្ថែមថាការបំពាក់សម្ភារៈ នឹងត្រូវបន្តធ្វើជូនគ្រប់កន្លែងនាពេលខាងមុខឆាប់ៗនេះ ដែលអាចឱ្យយើងចុះបញ្ជីផ្តល់បណ្ណមូលនិធិសមធម៌ជូនបងប្អូនអ្នកផ្ទុកមេរោគអេដស៍ដែលស្ថិតក្នុងប្រព័ន្ធបានទាំងអស់គ្នា។

យ៉ាងណាក៏ដោយ លោកអគ្គលេខាធិការបានបញ្ជាក់ថាក្នុងចំណោមអ្នកផ្ទុកមេរោគអេដស៍៧៦ ០០០ នាក់ក្នុងនោះអ្នកផ្ទុកមេរោគអេដស៍ប្រមាណ ១២ ០០០នាក់មិនទាន់បានចូលក្នុងប្រព័ន្ធបង្ការ ព្យាបាល ថែទាំបន្តនិងមិនអាចមានព័ត៌មានសម្រាប់ចុះបញ្ជីទទួលបានបណ្ណមូលនិធិសមធម៌ទេ។

លោកអគ្គលេខាធិកាសូមអំពាវនាវដល់បង ប្អូន ដែលសង្ស័យថាបានប្រឈមនឹងការឆ្លងមេរោគអេដស៍ សូមអញ្ជើញប្រញាប់មកធ្វើតេស្តរកមេរោគអេដស៍ ដើម្បីឆាប់បានទទួលការព្យាបាលនៅទីតាំងទាំង ៧៣ កន្លែង នៅទូទាំង២៥ រាជធានី ខេត្ត និងបានចុះបញ្ជីទទួលបានបណ្ណមូលនិធិសមធម៌ដើម្បីទទួលបាននូវសេវាព្យាបាលដោយឥតបង់ប្រាក់ដោយយកមកភ្ជាប់ជាមួយនូវឯកសារតម្រូវ មួយក្នុងចំណោមទាំងបី រួមមាន អត្តសញ្ញាណប័ណ្ណសញ្ជាតិខ្មែរ ឬសំបុត្រកំណើត ឬលិខិតឆ្លងដែនព្រះរាជាណាចក្រកម្ពុជា។

គួរបញ្ជាក់ថាតាមការសិក្សាឆ្នាំ២០២២កម្ពុជាមានអ្នកឆ្លងជំងឺអេដស៍ថ្មីប្រមាណ ១ ៤០០ ក្នុង១ឆ្នាំឬស្មើ៤នាក់ក្នុង១ថ្ងៃនិងមានអ្នកស្លាប់ប្រមាណ ១ ១០០ នាក់ក្នុង១ឆ្នាំ ឬ៣នាក់ ក្នុង១ថ្ងៃក្នុងនោះមាន ៨៣% នៃអ្នកឆ្លងថ្មីនៃមេរោគអេដស៍គឺស្ថិតក្នុងចំណោមប្រជាជនគន្លឹះ ដែលរួមមានក្រុមបុរសរួមភេទជាមួយបុរស(MSM)ក្រុមបំប្លែងភេទ (TG) អាយុពី១៥-២៤ឆ្នាំក្រុមស្ត្រីបម្រើក្នុងសេវាកម្សាន្ត (EW) និងអ្នកប្រើប្រាស់គ្រឿងញៀន (PWUD/PWID)៕