កម្ពុជា-វៀតណាម មិនអនុញ្ញាតឲ្យកងកម្លាំងអរិភាពណាមួយ ប្រើប្រាស់ទឹកដីនៃប្រទេសមួយ ប្រឆាំងនឹងប្រទេសមួយទៀតឡើយ

នាយករដ្ឋមន្ត្រីកម្ពុជា-វៀតណាម បានលើកឡើងដូចគ្នាថា ប្រទេសទាំងពីរ ប្រកាន់ខ្ជាប់គោលការណ៍មិនអនុញ្ញាតឲ្យកងកម្លាំងអរិភាពណាមួយ ប្រើប្រាស់ទឹកដីនៃប្រទេសមួយ ប្រឆាំងនឹងប្រទេសមួយទៀតឡើយ។ នេះបើយោងតាមការចុះផ្សាយរបស់សារព័ត៌មាន Vn Express។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា កាលពីថ្ងៃទី ១១ ខែធ្នូ ឆ្នាំ ២០២៣ បានជួបប្រជុំពិភាក្សាការងារទ្វេភាគីជាមួយលោក ផាម មិញជិញ នាយករដ្ឋមន្រ្តីវៀតណាម ក្នុងឱកាសដែលសម្ដេចធិបតី អញ្ជើញបំពេញទស្សនកិច្ចផ្លូវការរយៈពេល ២ថ្ងៃ នៅប្រទេសវៀតណាម។   

នៅក្នុងជំនួបនេះ នាយករដ្ឋមន្ត្រីកម្ពុជា និងនាយករដ្ឋមន្ត្រីវៀតណាម បានលើកឡើងដូចគ្នាថា នឹងប្រកាន់ខ្ជាប់នូវគោលការណ៍ មិនអនុញ្ញាតឲ្យកងកម្លាំងអរិភាពណាមួយ ប្រើប្រាស់ទឹកដីនៃប្រទេសមួយ ប្រឆាំងនឹងប្រទេសមួយទៀតឡើយ។

នាយករដ្ឋមន្ត្រី នៃប្រទេសទាំងពីរ ក៏បានឯកភាពគ្នាក្នុងការសម្របសម្រួលយ៉ាងជិតស្និទ្ធ លើការគ្រប់គ្រង បង្ការ និងប្រយុទ្ធប្រឆាំងនឹងឧក្រិដ្ឋកម្មឆ្លងដែន ក៏ដូចជាសហការរួមគ្នាដើម្បីដោះស្រាយបញ្ហាប្រឈម នៃសន្តិសុខមិនមែនជាប្រពៃណីផងដែរ។

នៅក្នុងឱកាសនោះ ភាគីកម្ពុជា ក៏បានអះអាងពីការបន្តសម្របសម្រួល ក៏ដូចជាគាំទ្រដល់ការស្វែងរក ការធ្វើពិធីដង្ហែ និងការធ្វើមាតុភូមិនិវត្តន៍អដ្ឋិធាតុ ទាហានស្ម័គ្រចិត្តវៀតណាម និងអ្នកជំនាញដែលបានស្លាប់នៅកម្ពុជា ជាប​ន្តបន្ទាប់ដែរ។

បន្ថែមពីលើនេះទៀត នាយករដ្ឋមន្ត្រីទាំងពីរ ក៏បានឯកភាពបន្តសម្របសម្រួល និងជំរុញការដោះស្រាយតំបន់ព្រំដែន ដែលមិនទាន់ឯកភាពគ្នាចំនួន ១៦ភាគរយ ក្នុងគោលបំណងបង្កើនប្រសិទ្ធភាព នៃកិច្ចសហប្រតិបត្តិការ រវាងកងកម្លាំងពាក់ព័ន្ធ និងមូលដ្ឋាននៅតាមព្រំដែន នៃប្រទេសទាំងពីរ៕