មន្ត្រីជាន់ខ្ពស់ អំពាវនាវយុវជនពង្រឹងសិក្សាជំនាញវិជ្ជាជីវៈ ដើម្បីឱកាសធ្វើការនៅជប៉ុន

លោក កត្តា អ៊ន រដ្ឋលេខាធិការ និងជាអ្នកនាំពាក្យ ក្រសួងការងារ និងបណ្តុះបណ្តាលវិជ្ជាជីវៈ បានអំពាវនាវដល់យុវជនអញ្ជើញមកចុះឈ្មោះសិក្សាជំនាញវិជ្ជាជីវៈ និងបច្ចេកទេស ពង្រឹងសមត្ថភាពបន្ថែមដើម្បីមានឱកាសបានទៅធ្វើការនៅជប៉ុន ខណៈ ឆ្នាំ២០២៤ ជប៉ុនមានតម្រូវការពលករប្រមាណ ៨ ពាន់នាក់។

លោក កត្តា អ៊ន មានប្រសាសន៍នៅរសៀល ថ្ងៃទី១៨ ខែធ្នូនេះថា ការងារដែលមានតម្រូវការខ្ពស់នៅជប៉ុនមានដូចជា ផ្នែកឧស្សាហកម្ម កសិកម្ម សំណង់ និងការងារតាមផ្ទះ។

លោក កត្តា អ៊ន លើកឡើងថា៖ “ខ្ញុំសូមអំពាវនាវដល់យុវជនដែលចង់ទៅធ្វើការនៅជប៉ុន ត្រូវពង្រឹងសមត្ថភាពជំនាញវិជ្ជាជីវៈ តាមរយៈការចុះឈ្មោះសិក្សាជំនាញវិជ្ជាជីវៈ និងបច្ចេកទេស ព្រោះថាប្រទេសជប៉ុនត្រូវការអ្នកមានជំនាញវិជ្ជាជីវៈច្បាស់លាស់ និងមានសីលធម៌ និងអំណត់អត់ធ្មត់ក្នុងការងារ។ សូមទាក់ទងមកក្រសួងការងារ ដើម្បីទទួលបានឱកាសការងារ ការយល់ដឹងពីការងារ វប្បធម៌ប្រពៃណី ទំនៀមទម្លាប់របស់ជនជាតិជប៉ុនផងដែរ”។

នៅក្នុងជំនួបសំណេះសំណាលជាមួយប្រជាពលរដ្ឋខ្មែររស់នៅប្រទេសជប៉ុន កាលពីរសៀលថ្ងៃទី១៦ ខែធ្នូ សម្តេចធិបតី ហ៊ុន ម៉ាណែត បានលើកឡើងថា នៅឆ្នាំ២០២៤ ពលរដ្ឋខ្មែរ នឹងទទួលបានការងារប្រមាណ ៨ ពាន់នាក់បន្ថែមទៀត នៅប្រទេសជប៉ុន ខណៈពេលនេះ ពលរដ្ឋកម្ពុជារស់នៅប្រទេសជប៉ុន មានប្រមាណជាង ៣ ម៉ឺននាក់ ក្នុងនោះ ភាគច្រើនគឺជាកម្មសិក្សាការងារ។ ក្រៅពីនោះមាននិស្សិត និងពលរដ្ឋរស់នៅយូរឆ្នាំ។

សម្តេចធិបតី បានសង្កត់ធ្ងន់ថា រាជរដ្ឋាភិបាល បញ្ជូនពលរដ្ឋទៅប្រទេសជប៉ុននេះ គឺទៅតាមសមត្ថភាពការងារ ដើម្បីបាន​ចំណូលចិញ្ចឹមគ្រួសារ និងបង្កើនជំនាញផ្សេងៗទៀត សម្រាប់អនាគត។

យោងតាមរបាយការណ៍របស់ ក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា បច្ចុប្បន្នមានទីភ្នាក់ងារជ្រើសរើសកម្លាំងពលកម្មឯកជន ដែលបានទទួលការអនុញ្ញាតឱ្យធ្វើការជ្រើសរើសបណ្តុះបណ្តាល បញ្ជូន និងគ្រប់គ្រងកម្មសិក្សាការី-ពលករជំនាញទៅធ្វើកម្មសិក្សា និងធ្វើការនៅប្រទេសជប៉ុនមានចំនួន ១០៣ ក្រុមហ៊ុន៕

អត្ថបទ៖ សំអឿន