ព័ត៌មានជាតិ

ការបាក់ស្រុតច្រាំងទន្លេនៅខេត្តត្បូងឃ្មុំ មន្ទីរធនធានទឹក លើកសំណើទៅក្រសួងហើយ ត្រៀមជួសជុលឆាប់ៗ នេះ

បានផុស

២ years មុន

នៅ

ថ្ងៃពុធ ៣ មករា ២០២៤

ដោយ

ការបាក់ស្រុតច្រាំងទន្លេនៅខេត្តត្បូងឃ្មុំ មន្ទីរធនធានទឹក និងឧតុនិយមខេត្ត បានជំរុញលើកសំណើទៅក្រសួងហើយ និងដាក់ក្នុងផែនការក្រសួងហិរញ្ញវត្ថុ ត្រៀមជួសជុលឆាប់ៗ នេះ។

លោក ភិន ឈុន មេឃុំទន្លេបិទ បានឲ្យដឹងនៅព្រឹកថ្ងៃទី ៣ ខែមករា ឆ្នាំ ២០២៤ នេះថា ករណីស្រុតច្រាំង និងនាំយកស្មាផ្លូវបេតុង នៅចំណុចខាងលើនេះ កាលពីថ្ងៃទី ២៣-២៤ ខែធ្នូ ឆ្នាំ ២០២៣ កន្លងទៅ ថ្មីៗ នេះ អស់ប្រវែង ២៥ ម៉ែត្រ។ លោកមេឃុំ បន្តថា លោកបានជម្រាបទៅ លោក សេង សុខខឿន អភិបាលស្រុកត្បូងឃ្មុំ រួចមកហើយដែរពីករណីខាងលើនេះ។

ដោយឡែក លោក សុខ ឡេងម៉េង ប្រធានមន្ទីរធនធានទឹក និងឧតុនិយមខេត្តត្បូងឃ្មុំ បានឲ្យដឹងថា ការបាក់ស្រុតច្រាំងទន្លេនេះ មន្ទីរធនធានទឹក និងឧតុនិយមខេត្ត ក៏ដូចជាអាជ្ញាធរខេត្ត បានជំរុញលើកសំណើទៅក្រសួងហើយ និងដាក់ក្នុងផែនការក្រសួងហិរញ្ញវត្ថុ ដើម្បីទម្លាក់ថវិកាឲ្យខាងជំនាញជលសាស្ត្រចុះទប់ច្រាំងទន្លេនេះ នាពេលខាងមុខឆាប់ៗ នេះ។ ចំពោះគម្រោងទប់ច្រាំងនេះ មានប្រវែង ២០០ ម៉ែត្រ រួមទាំងច្រាំងបាក់ ដែលគំរាមកំហែងដល់លំនៅដ្ឋានរបស់ប្រជាពលរដ្ឋ ក្នុងភូមិទួលគរ ឃុំទន្លេបិទ ផងដែរ។

គួរជម្រាបថា ស្មាផ្លូវបេតុងមួយកន្លែង ដែលកំពុងតែរងការបាក់ស្រុតចូលទៅក្នុងទន្លេមេគង្គ ស្ថិតនៅចំណុចចុងភូមិទួលគរ ឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ។ ផ្លូវបេតុងនេះ សំខាន់ណាស់សម្រាប់ប្រជាពលរដ្ឋធ្វើដំណើរ ដោយភ្ជាប់ពីស្រុកត្បូងឃ្មុំ ខេត្តត្បូងឃ្មុំ ឆ្ពោះទៅកាន់ស្រុកកោះសូទិន ខេត្តកំពង់ចាម៕

អត្ថបទ ៖ សាន វិឡែម