ប្រជាជនស៊ុយអែត ចាប់ផ្តើមភ័យខ្លួន ក្រោយមេទ័ព២រូប ព្រមានកើតសង្គ្រាម

ធ្លាប់តែជាប្រទេសមានសន្តិភាព តែពេលនេះប្រជាជនស៊ុយអែត ចាប់ផ្តើមភ័យខ្លួន ក្រោយពេលមេទ័ព២រូប ចេញមុខព្រមានឲ្យត្រៀមលក្ខណៈចំពោះសង្គ្រាម។

រដ្ឋមន្ត្រីការពារជនស៊ីវិល លោក Carl-Oskar Bohlin បានប្រាប់សន្និសីទសង្គមនិងការពារជាតិ កាលពីចុងសប្តាហ៍ថា “អាចមានសង្រ្គាមនៅក្នុងប្រទេសស៊ុយអែត”។ លោកនិយាយថា គោលបំណងរបស់លោក គឺមិនចង់ឲ្យប្រជាជនគិតតែពីដេក ពោលគឺត្រូវដឹងអំពីព័ត៌មានឬរឿងហេតុដែលនឹងអាចកើតឡើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលជាមួយគ្នានោះ លោក​បាន​អំពាវនាវ​ដល់​អាជ្ញាធរ​មូលដ្ឋាន អ្នក​រៀបចំ​ផែនការ​សង្គ្រោះ​បន្ទាន់ និង​យោធា ត្រូវត្រៀមលក្ខណៈ​ឆ្លើយតបឲ្យបានគ្រប់គ្រាន់ផងដែរ ក្នុងករណីមានសង្គ្រាមពិតមែន។

ក្រោយមក មានមេបញ្ជាការយោធាម្នាក់ឈ្មោះ Micael Byden បានចេញគាំទ្រសារមួយនេះ ដោយព្រមានថា ប្រជាជនស៊ុយអែតទាំងអស់ គួរតែត្រៀមចិត្តត្រៀមកាយចំពោះរឿងនេះ។ លោកប្រាប់កាសែត Aftonbladet ថា “មតិរបស់ខ្ញុំជាមួយករណីនេះ គឺមិនមែនធ្វើឲ្យប្រជាជនព្រួយបារម្ភទេ ប៉ុន្តែខ្ញុំចង់ឲ្យមានប្រជាជនកាន់តែច្រើន គិតអំពីស្ថានភាពរបស់ពួកគេ និងទំនួលខុសត្រូវរបស់ពួកគេ”។

ការលើកឡើងរបស់មេទ័ពទាំង២ ត្រូវបានគេមើលឃើញថា ចង់សំដៅទៅលើសង្គ្រាមជាមួយប្រទេសរុស្ស៊ី ដែលបានព្រមានម្តងហើយម្តងទៀត កុំឲ្យស៊ុយអែត ចូលអង្គការណាតូ ឲ្យសោះ។

ទោះបីជាយ៉ាងណាក៏ដោយ ការព្រមានខាងលើ ត្រូវបានគណបក្សប្រឆាំងថ្កោលទោសយ៉ាងខ្លាំង ថាជាការបំភ័យប្រជាជន និងអាចបង្កអស្ថិរភាពក្នុងសង្គមទៀតផង។

បន្ទាប់ពីមានសន្តិភាពជាងពីរសតវត្សរ៍មកនេះ ប្រទេសស៊ុយអែត កាន់តែកៀកចូលរួមក្នុងសម្ព័ន្ធភាពរបស់ណាតូមែនទែនហើយ ពោលគឺនៅតែរង់ចាំភ្លើងខៀវ ពីសភារបស់ប្រទេសតួកគី និងបន្ទាប់មកពីប្រទេសហុងគ្រី ប៉ុណ្ណោះ។

ដោយឡែក ហ្វាំងឡង់ បានចូលជាមួយណាតូរួចទៅហើយ ហើយរុស្ស៊ី គំរាមថា បើជម្លោះជាមួយណាតូផ្ទុះឡើងមែន ប្រទេសហ្វាំងឡង់ នឹងត្រូវខ្ទេចមុនគេ៕

ប្រែសម្រួល៖ Vann Vann

ប្រភព៖ BBC

ចុចអាន៖ ស៊ុយអែត ព្រមានថា សង្គ្រាមអាចមកដល់ទឹកដីរបស់ខ្លួនគ្រប់នាទី