ព័ត៌មានជាតិ

ក្រុមហ៊ុនបារាំងមួយវិនិយោគសណ្ឋាគារលំដាប់ពិភពលោកចំនួន ៩ កន្លែងនៅកម្ពុជា

បានផុស

២ years មុន

នៅ

ថ្ងៃអង្គារ ១៦ មករា ២០២៤

ដោយ

ក្នុងដំំណើរទស្សនកិច្ចសម្តេចធិបតី ហ៊ុន ម៉ាណែត ទៅប្រទេសបារាំង នាយកប្រតិបត្តិជាន់ឱ្យសម្ព័ន្ធក្រុមហ៊ុន Group ACCOR បានជម្រាបមេដឹកនាំកម្ពុជាពីដំណើរការអាជីវកម្មក្រុមហ៊ុននៅក្នុងប្រទេសកម្ពុជា។

លោកស្រី Maud BAILLY នាយិកាប្រតិបត្តិ Sofitel, MGallery និង Emblems ដែលតំណាងឱ្យ Group ACCOR បានគូសបញ្ជាក់ថា Group ACCOR ជាក្រុមហ៊ុនប្រតិបត្តិការសេវាកម្មសណ្ឋាគារ ដែលគ្រប់គ្រងលើសណ្ឋាគារចំនួនជាង ៤០ ម៉ាក (Brand) ទូទាំងពិភពលោក។

លោកស្រី Maud BAILLY ក្ពិភាក្សាការងារជាមួយសម្តេចធិបតី ហ៊ុន ម៉ាណែត

ទាក់ទងអាជីវកម្មនៅកម្ពុជា លោកស្រីបានបញ្ជាក់ថា Group ACCOR បានដាក់ទុនវិនិយោគសណ្ឋាការប្រណិតៗចំនួន ៩ ទីតាំង មាននៅរាជធានីភ្នំពេញ ខេត្តសៀមរាប និងខេត្តព្រះសីហនុមានដូចជា៖ Raffles Hotel Le Royal, Raffles Grand Hotel d’Angkor, Sofitel Angkor Phokeethra Golf & Spa Resort, Sofitel Phnom Penh Phokeethra, ibis budget Phnom Penh Riverside, ibis Styles Siem Reap, TRIBE Phnom Penh Post Office Square, Novotel Phnom Penh BKK 1 និង Novotel Sihanoukville Holiday Resort។

សណ្ឋាគារ Raffles Hotel Le Royal

នៅចំពោះមុខនាយករដ្ឋមន្រ្តីកម្ពុជា លោកស្រី Maud BAILLY ថ្លែងអំណរគុណដែលប្រមុខដឹកនាំកម្ពុជាបានឆ្លៀតពេលវេលាដ៏មមាញឹកអនុញ្ញាតឱ្យលោកស្រីនិងសហការី បានចូលជួបសម្តែងការគួរសម ព្រមទាំងបានជម្រាបអំពីវឌ្ឍនភាពរីកចម្រើននៃសកម្មភាពអាជីវកម្មរបស់ក្រុមហ៊ុន ACCOR Group នៅក្នុងប្រទេសកម្ពុជា។

ក្រុមហ៊ុន ACCOR Group កំពុងវិនិយោគក្នុងវិស័យសណ្ឋាគារដែលមានសណ្ឋាគារបែបទំនើប និងមធ្យម និងបែប Boutique។ តាមរយៈសណ្ឋាគារសូហ្វីតែលដែលមានប្រតិបត្តិការអាជីវកម្មនៅជុំវិញពិភពលោក បានចូលរួមផ្សព្វផ្សាយនូវវប្បធម៌ និងភាពល្អឥតខ្ចោះនៃតំបន់រមណីយដ្ឋានអង្គរ ដើម្បីជំរុញឱ្យអ្នកទេសចរណ៍មកទស្សនាខេត្តសៀមរាបនៅឆ្នាំ២០២៤ ឱ្យកាន់តែច្រើនថែមទៀត។

ជាការឆ្លើយតប សម្តេចធិបតីក៏បានអរគុណចំពោះការវិនិយោគរបស់ក្រុមហ៊ុននៅកម្ពុជានាពេលកន្លងមក។ សម្តេចធិបតីបានគូសបញ្ចាក់ថា រាជរដ្ឋាភិបាលកម្ពុជាបានដាក់ចេញកម្មវិធីពិសេស «ទស្សនាសៀមរាបឆ្នាំ ២០២៤» ដែលនឹងជួយលើកស្ទួយវិស័យទេសចរណ៍ឱ្យមានសន្ទុះឡើងវិញ និងវិវត្តទៅរកស្ថានភាពមុនវិបត្តិកូវីដ-១៩ និងបានបង្កើតការងារដល់ប្រជាពលរដ្ឋ និងជាការចូលរួមចំណែកដល់កំណើនសេដ្ឋកិច្ចជាតិ។

សម្ដេចបានលើកទឹកចិត្តដល់ក្រុមហ៊ុន ACCOR Group ពង្រីកការវិនិយោគបន្ថែមទៅលើវិស័យសណ្ឋាគារ និងវិស័យផ្សេងៗទៀត ក្នុងពេលដែលស្ថានភាពនៃវិស័យទេសចរណ៍បន្តងើបឡើងវិញ៕