Son យកឈ្នះ Min-jae, Ronaldo ក្លាយជាកីឡាករល្អបំផុតប្រចាំអាស៊ីលើកទី៩

តារាឆ្នើមជម្រើសជាតិ​កូរ៉េខាងត្បូង Son Heung-Min ​បានឈ្នះពានរង្វាន់កីឡាកល្អ​បំផុត​ប្រចាំទ្វីបអាស៊ីឆ្នាំ២០២៣ ក្រោយការបង្ហាញទម្រង់លេងបានយ៉ាងល្អនៅក្លិប Tottenham Hotspur នៅក្នុងប្រទេសអង់គេ្លស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្នាំ២០២៣ Son Heung-Min ទទួលបានសំឡេង​បោះឆ្នោតគាំទ្រចំនួន២៣១ពិន្ទុ ខណៈខ្សែការពារកូរ៉េខាងត្បូង Kim Min-jae របស់ក្លិប Bayern Munich ទទួលបាន១៩៧ពិន្ទុ និងកីឡាករ Cristiano Ronaldo របស់ក្លិប Al-Nassr ទទួលបាន១៧២ពិន្ទុ។

តារាធ្នើម Ronaldo ជម្រើស​ជាតិ​ព័រទុយហ្គាល់ មានឈ្មោះក្នុងការបោះឆ្នោតពានរង្វាន់កីឡាករល្អប្រចាំទ្វីបអាស៊ី ដោយសាររូបគេផ្លាស់មកលេងនៅលីគអារ៉ាប៊ីសាអ៊ូឌីត​ ដែលស្ថិតក្នុងទ្វីបអាស៊ី ខណៈ Son Heung-Min និង Kim Min-jae ជាកីឡាករអាស៊ីស្រាប់ ដូច្នេះទោះបីរូបគេលេងនៅអឺរ៉ុបក៏នៅតែអាចចូលប្រជែងក្នុងពានរង្វាន់កីឡាកល្អ​បំផុត​ប្រចាំទ្វីបអាស៊ី។

Son បានឈ្នះពានរង្វាន់កីឡាកល្អ​បំផុត​ប្រចាំទ្វីបអាស៊ីនេះ​ចំនួន៩លើក​ហើយ​គឺ​ឆ្នាំ២០១៤ ២០១៥ ២០១៧ ២០១៨ ២០១៩ ២០២០ ២០២១ ២០២២ និង២០២៣។ អ្វីដែលពិសេសក្នុងរយៈពេល៧ឆ្នាំចុងក្រោយគ្មានកីឡាករណាអាចប្រជែងយកពានរង្វាន់នេះជាមួយគេបានទេ។

ពានរង្វាន់កីឡាករបាល់ទាត់ល្អបំផុតនៅអាស៊ីជាពានរង្វាន់បាល់ទាត់ប្រចាំឆ្នាំរបស់សមាគម​កីឡា​បាល់ទាត់​អាស៊ី ដែលរៀបចំដោយ Titan Sports ហើយពាននេះបានផ្តល់ទៅកីឡាករដែលមានទម្រង់លេងល្អបំផុត​ប្រចាំ​​ឆ្នាំ​សម្រាប់កីឡាករបាល់ទាត់នៅទ្វីបអាស៊ី៕

អត្ថបទ៖ ផា រតនា