រដ្ឋបាលស្រុកចន្ទ្រា បើកវគ្គបណ្តុះបណ្តាល ដើម្បីពង្រឹង និងអភិវឌ្ឍន៍សមត្ថភាពមន្ត្រីបន្ថែមទៀត

លោក គង់ វស្សា ប្រធានក្រុមប្រឹក្សាស្រុកចន្ទ្រា និងលោក ថន ថាវុទ្ធា អភិបាលស្រុកចន្ទ្រា បានចូលរួមបើកវគ្គបណ្តុះបណ្តាលស្តីពី «ការតាក់តែងលិខិតរដ្ឋបាល» ជួនដល់ថ្នាក់ដឹកនាំ មន្ត្រីរាជការចំណុះសាលាស្រុកចន្ទ្រា លោកនាយកសាលាបឋមសិក្សា និងមត្តេយ្យ សរុបទាំង១៨ ទូទាំងស្រុកចន្ទ្រា។ វគ្គបណ្តុះបណ្តាលនេះធ្វើឡើង នៅថ្ងៃទី១៩ ខែមករា ឆ្នាំ២០២៤។

ការបើកវគ្គបណ្តុះបណ្តាលនេះ ក្នុងគោលបំណងដើម្បីពង្រឹង និងអភិវឌ្ឍន៍សមត្ថភាពមន្ត្រីបន្ថែមទៀតទៅលើការងាររដ្ឋបាល ជាពិសេសការៀបចំលិខិតរដ្ឋបាលមួយដែលត្រឹមត្រូវទៅបទដ្ឋានរដ្ឋបាលទៅតាមទម្រង់តែមួយក្នុងក្របខណ្ឌនៃការអនុវត្តការងារប្រចាំថ្ងៃ។

លោក ថន ថាវុទ្ធា បានលើកឡើងថា «ការរៀបចំលិខិតបែបបត់រដ្ឋបាល ដែលមានលក្ខណៈត្រឹមត្រូវក្នុងទម្រង់តែមួយ គឺទាមទារឱ្យយើងត្រូវយកចិត្តទុកដាក់ ដល់ការអភិវឌ្ឍន៍សមត្ថភាពមន្ត្រីទាំងអស់ ដើម្បីពង្រឹងការអនុវត្តមុខងារប្រចាំថ្ងៃប្រកបដោយប្រសិទ្ធភាពខ្ពស់»។ លោកសង្ឃឹមយ៉ាងមុតមាំថា បន្ទាប់ពីបញ្ចប់វគ្គបណ្តុះបណ្តានេះមន្ត្រីទាំងអស់នឹងទទួលបាននូវការយល់ដឹងច្បាស់លាស់ពាក់ព័ន្ធនឹងការរៀបចំបែបបទលិខិតរដ្ឋបាលបានកាន់តែប្រសើរ។

បន្ថែមពីនេះ លោកបានថ្លែងអំណរគុណយ៉ាងជ្រាលជ្រៅចំពោះដល់ថ្នាក់ដឹកនាំមន្ត្រីរាជការ លោកនាយកសាលាបឋមសិក្សា និងមត្តេយ្យសរុបទាំង១៨ ទូទាំងស្រុកដែលបានចូលរួមរៀនវគ្គបណ្តុះបណ្តាលរៀនសូត្របន្ថែមទៀត ដើម្បីអាចយកទៅអភិវឌ្ឍន៍ក្នុងការងារប្រចាំថ្ងៃរបស់ពួកគាត់ ឱ្យកាន់តែមានប្រសិទ្ធភាពខ្ពស់។ ថែមទាំងបានផ្តោតការយកចិត្តទុកដាក់ក្នុងការសិក្សារៀនសូត្រ និងលើកជាសំណួរយ៉ាងផុសផុល ទៅតាមមេរៀនដែលលោកគ្រូបានបង្រៀនក្នុងរយៈពេលពេញមួយថ្ងៃនេះ។

​ជាមួគ្នានេះដែរ លោក ថន ថាវុទ្ធា ក៏បានថ្លែងអំណរគុណដល់សិក្ខាកាមទាំងអស់ដែលចំណាយពេលដ៏មានតម្លៃចូលរួមក្នុងវគ្គបណ្តុះបណ្តាលមួយនេះ៕

ដោយ៖ភក្ដី